YOHANES 8 - ANKANKINEM ḆEḆYE RO FAFISU INE

¹ ḇape Yesus ryaḇe urek Zaitun.

² Meserdi arwo prim kaku Yesus isya wer ro Allah Rum ḇyedi, ma kawasa ḇeḇor ansi kam srama yoḇi. Kyain ma ḇyuk farkarkor farosi.

³ Mboi ḇefawinananem Refo Yahudi ma snon Farisi sun faro Yesus bin oso sisrow ḇefrur farbuk. Siwan bin ani fa dores rofadu,

⁴ raimnai sikofen faro Yesus, ḇo soḇo: “Guru, bin ine nkosrow ro fafisu isya ifrur farbuk.

⁵ Ro sasoser Refo Yahudi Moses doḇo bin ḇeradine sḇeḇeso kuker karui isof simar. Rosai wakkara ro mnuk ine?”

⁶ Sikofen rarirya fa sifrowes biri, insa sisma roi oso fa ssḇuk sofi. Ḇape Yesus kyankunem ma fyas kuker ḇrampin ḇyesi ro sapropya.

⁷ Ma snar sifuken yayayu ḇesya kwar, inja ikḇawes ma dores, raimnai ikofen farosi: “Mansei rofandu mko ḇeyaksasar ḇa, iḇye syadi iso ḇeso ḇepon karui faro bin ine.”

⁸ Raimnai kyankunem wer ma fyas ro sapropya.

⁹ Ḇape rofyor simnaf wos ani, sibur ḇesisye kam, randak ro ḇeḇesinansya. Papupesya Yesus derer dores kuker bin ani, ḇeyores faswef ro moḇ ḇyedi.

¹⁰ Raimnai Yesus iyori ma ikofen faro bin ani: “Kawasa ansi sraiso? Snonkaku oso isyaḇake fa ḇyuk samamyai faro aw?”

¹¹ Kyarem, ḇo doḇo: “Oroḇa, Manseren.” Raimnai Yesus ikofen: “Aya kako yaḇuk samamyai faro awḇa. Wabur ma randak ro knikine wafrur sasar wer awer.”

Yesus isnai supswan 8:12-20

¹² Inja Yesus ikofen faro kawasa ḇeḇor ansi: “Aya ine isnai supswan ine; mansei ḇeso aya, ikada nari imbrain ro pampan ḇa, mboi nari isma isnai ḇekenemya.”

¹³ Kawasa Farisi sikofen faroi, ḇo soḇo: “Mankundaw buk ḇaḇesaksi ḇekur aw, inja ḇaḇesaksi bedi kyakuḇa.”

¹⁴ Yesus kyarem farosi: “Yaḇuk ḇaḇesaksi ḇekur mankundayano, mboi ḇaḇesaksi ayena nkaku, snar yafawi, moḇ yarama roya ma moḇ yarayoḇya. Ḇape mkokada mkofawiḇa, moḇsai yaramuma roya ma moḇsai yarayoḇya.

¹⁵ Mkokada mkoḇuk samamyai imnis warnkyara snonkaku, ayakada yaḇuk samamyai faro snonkaku osero ḇaḇeri,

¹⁶ ma rofyor yaḇuk samamyai mboi samamyai yaḇuk na nkaku, snar yerer ro mankundaya ḇa, mboi yafnoḇek kuker Kma yedi ḇewan ayanya.

¹⁷ Ma ro Refo Yahudi mkoḇedi fasfas isya, mboi ḇaḇesaksi ro snonkaku risuru irya kyaku.

¹⁸ Aya ine yaḇuk ḇaḇesaksi ḇekur mankundaya ḇardi, ma Mami, ḇewan ayanya, dakḇuk ḇaḇesaksi ḇekur aya.”

¹⁹ Ma sikofen faroi, ḇo soḇo: “Kma bedi isyaro?” Yesus kyarem: “Iḇye aya, ma Kma yedi mkomambaḇir nuḇa. Rofyor mkomambaḇir ayakada, mkomambaḇir Mami kako.”

²⁰ Wos nane Yesus ikofen na fanam burua pipi rofyor ḇyuk farkarkor ro Allah Rum ḇyedi. Ma snonkaku oso fyoriḇa snar fafisu ḇyedi ryama ḇaim.

Yesus ḇyeknam ro supswan ine ḇa 8:21-29

²¹ Raimnai Yesus ikofen wer faro snonkaku ḇeḇor ansi: “Nari yara ma nari mkosewar aya, ḇape nari mkomar snar sasar mkoḇena. Moḇ yara ḇeya nari mkorama ro iba.”

²² Inja kawasa Yahudi ansi sikofen, ḇo soḇo: “Inja iḇe myun mankundike eḇedari ikofen, ḇo doḇo: Ḇemoḇ yaraḇeya, mkopok mkora faroi ḇa?”

²³ Raimnai ikofen farosi: “Mkoine mkoḇe knam ro supswan ine, ayakada yarama ro boiyaswa; mkokada mkoraker supswan ine, aya yaraker supswan ineḇa.

²⁴ Eḇedari insanja yakofen faro mko, mboi nari mkomar snar sasar mkoḇena; rofyor mkokyarḇa, mboi aya irya nari mkomar rodo sasar mkoḇena.”

²⁵ Inja sikofen faroi, ḇo soḇo: “Manseiso aw?” Yesus kyarem farosi: “Fainda rosai yawawos kuker mko kaker?

²⁶ Nabor kaku roi yamarisen yawos ma yaḇemankara fa ḇekur mko; ḇape i ḇewan aya, ikada inapes ma rosai yarower roi, naiso yakofen faro supswan ine.”

²⁷ Sifawiḇa, mboi dawawos farosi ro Kmari.

²⁸ Inja Yesus ikofen: “Rofyor mkoyer nakaki Rumkun Snonkaku kwar, insape mkofawi mboi aya ine Aya Isya, ma rarirya yafrur roi oso ro mankundaya ḇardiḇa, ḇape yawawos monda, imnis raris Mami fyarkor maro aya.

²⁹ Ma i ḇewan aya kwar, ifnoḇek aya. Ipok ryir ayaḇa, snar yafrur ḇesya kwar rosai ḇefrur i marisen na.”

Napnapes ḇeḇuk ḇaḇe mkei 8:30-36

³⁰ Yesus ikofen roi anna kam kwar, snonkaku sibor sikyar faroi.

³¹ Rarirya ikofen faro kawasa Yahudi ḇekyar faroisya: “Kaku ḇeri rofyor mkokin nako wos ayena, rarirya mkoḇe manfamyan kaku ḇe aya

³² ma nari mkofawi napnapesya ma napnapesya nari ḇyuk ḇaḇemkei faro mko.”

³³ Skarem ḇo soḇo: “Nkoine nkoḇe ḇarpur ro Abraham ma nkoḇe manfyan ḇaim faro manseiryawer. Rosai wakofen”, ḇo woḇo: “Nari mkosma ḇaḇemkei?”

³⁴ Yesus ikofen farosi: “Kaku ḇeri snonkaku ḇefrur sasarsya, nari semanfyan faro sasarya.

³⁵ Ma manfyan oso kyain faswef ro rumya doriḇa, ḇape romawaya kada kyain faswef ro rumya dori.

³⁶ Inja rofyor Rumkunya ḇyuk ḇaḇemkei faro mko, kaku ḇeri nari mkoḇe mkei.”

Ḇaḇeḇarpur ro Abraham seknam ro Allah ḇa 8:37-47

³⁷ “Yafawi, mboi mkoḇe ḇarpur ro Abraham, ḇape mkosewar fa mkomun aya snar mkomewer mkoso farkarkor ayenari.

³⁸ Rosai yamam ro Mami, naiso yakofen na ma rarirya kako mkofrur rosai mkomnaf ro kma mkoḇesi.”

³⁹ Skarem faroi, ḇo soḇo: “Kma nkoḇedi isoine Abraham.” Yesus ikofen farosi: “Rofyor mkokofen kaku mko romawa Abraham, rarirya ido nari mkofrur fararur Abraham ifrur na.

⁴⁰ Ḇape roi mkofrur na isoine mkoḇesewar fa mko mun aya, aya ine, snonkaku ḇekofen napnapes faro mko, isoine napnapes yamnaf ro Allah; fararur ḇerarirya Abraham dakfrur naba.

⁴¹ Mboi kma mkoḇesi roi sifrur naiso mkakfrur na.” Skarem, ḇo soḇo: “Nkoine romawa soneiḇa. Kma nkoḇedi isoine Allah.”

⁴² Yesus ikofen farosi: “Rofyor Kma mkoḇedi Allah, nari mkoswar aya, snar yarama ro Allah. Ma yarama kuker marisen ro mankundayaḇa, mboi iso ḇewan ayanya.

⁴³ Rosai ḇeḇewar fa mkofawi roi yakofen naba? Snar mkosambraḇ fa mkomnaf farkarkor ayenaḇa.

⁴⁴ Kma mkoḇedi Ibirisya inja mko marisen mkoso marisen ḇyena. Ro randakya Ibirisya myamun, ikada iso napnapes yaḇa, snar napnapesya isya roiḇa. Rofyor ḇyeankar, ima kaku snar rari ḇyedi moḇ ryairi, snar ḇyeankarkar ma ḇye kma ro ankarkar na kam.

⁴⁵ Ḇape snar yawos ro napnapesya, faro mko snaro mkokyar ayaḇa.

⁴⁶ Mansei rofandu mko ḇeḇuk fasasna mboi yafrur sasar? Rofyor yawos ro napnapesya, snaro mkokyar ayaḇa?

⁴⁷ Mansei ḇeḇeknam ro Allah ikada, imnaf Allah wos ḇyena; snar mkoḇe knam ro Allah ḇa, eḇedari mkomewer mkomnafi.”

Yesus ma Abraham 8:48-59

⁴⁸ Kawasa Yahudi skarem faro Yesus, ḇo soḇo: “Kaku ḇake rofyor nkokofen mboi aw snon Samaria ma rur ḇemaḇakya iswoḇer aw?”

⁴⁹ Yesus kyarem farosi: “Rur ḇemaḇakya iswoḇer ayaḇa, ḇape yaḇe syowi Mami yedi ma mkokada mkoḇe syowi ayaḇa.

⁵⁰ Ḇape yasewar syowi faro ayaḇa: Oser isya ḇesewar syowiya ma ikako ḇye mankara.

⁵¹ Yakofen faro mko: Kaku ḇeri mansei ḇeḇeuser wos ayena, ima nari daksma marmariḇa isof fyoro-fyoro.”

⁵² Yahudisya sikofen faroi wer, soḇo: “Insape nkofawi, rur ḇemaḇakya iswoḇer aw. Snar Abraham imar kwar ma rarirya kako nabi-nabisya, ḇesyaḇo woḇo: mansei ḇeḇeuser wos ayena, ima nari daksma marmariḇa isof fyoro-fyoro.

⁵³ Inja waba syadike ro kma nkoḇedi Abraham, ḇemar kwarya! Nabi-nabisya kako simar kwar; kuker mansei bukmnis aw?”

⁵⁴ Yesus kyarem: “Rofyor yasandik mankundaya, rarirya ido sanandik ayedi ḇyemaeja kermkuno ḇaḇeri. Kma ayedi ḇeḇuk sanandik ḇe aya, iso mkofen ḇo mkoḇo: Ikada Allah nkoḇedi,

⁵⁵ ḇesyaḇo mkomambaḇiri ḇa, ḇape ayakada yamambaḇiri. Ma rofyor yakofen: Yamambaḇiri ḇa, rarirya aya ine manankarkar, imnis raris mko, ḇape yafawi i ma yaḇeuser wos ḇyena.

⁵⁶ Abraham kma mkoḇedi iryaḇ kaku mboi nari myam ras ayedi ma myami kwar ma iryaḇ kaku.”

⁵⁷ Inja kawasa Yahudi ansi sikofen faroi, ḇo soḇo: “Umur bedi ḇyewampasi wambarek samfur ririm ḇaim ḇesyaḇo wamam Abraham kwarke?”

⁵⁸ Yesus ikofen farosi: “Yakofen faro mko, kaku ḇeri Abraham ḇyeḇeaḇen ḇaim, aya isya kwar.”

⁵⁹ Raimnai sun karui fa siḇe ssḇuk soi; ḇape Yesus smamiḇa ma ibur Allah Rum ḇyedi.