YOHANES 7 - ANKANKINEM ḆEḆYE RO FAFISU INE

Yesus dekḇe Yerusalem fa dakso munara soyai undam 7:1-13

¹ Raimnai Yesus imbran yaryar Galilea, snar imewer kyain faswef ro Yudea, snar kawasa Yahudi sesewar fa siḇe smuni.

² Fafisu ani ras munara kawasa Yahudi, isoine ras munara Soyai Undam fyanam kwar.

³ Rarirya Yesus naek ḇyesi sikofen faroi, ḇo soḇo: “Mkombran rodine ma mkora ḇe Yudea, insa manfamyan-manfamyan besi sakmam fararur wafrur na.

⁴ Snar snonkaku oso ḇaḇeri iyokef rosai ifrur na rofyor imarisen ḇye snonsnon ro ḇarpon kawasa. Rofyor wafrur roi ḇerarirya, fasnai mankundaw faro supswan ine.”

⁵ Snar naek ma srar ḇyesi kako sakkyari ḇa.

⁶ Inja Yesus kyarem farosi: “Fafisu ayedi ryama ḇaim, ḇape faro mko fafisu na naisya ḇesya kwar.

⁷ Supswan ipok dayin mkoḇa, ḇape aya kada dayin aya, snar yakofen ḇesya kwar faro supswan ine roi ifrur na nḇarḇor.

⁸ Mkoramura ḇemunara ani. Aya kada yakra ḇaim, snar fafisu ayedi imnis ḇaim.”

⁹ Rarirya wos ḇyena farosi, ma ikada kyain ro Galilea.

¹⁰ Ḇape rofyor naek srar ḇyesi sra kwar ḇe munara ani, insape ikako dakra, ḇape kuker kankunes.

¹¹ Kawasa Yahudi ssasewar i ro munara ani ma sikofen, ḇo soḇo: “Isya ro?”

¹² Ma kawasa sibor sawos fasasis roi. Ono sikofen, ḇo soḇo: “I, snon ḇeḇye rirya.” Ono wer sikofen, ḇo soḇo: “Roḇa, fyarkor ninyan kawasa ḇeḇor.”

¹³ Ḇape snonkaku oso ḇaḇeri ḇemku fa ḇeyawos fababa roi snar simkak kawasa Yahudisya.

Yesus ḇyesaksi mankundi 7:14-24

¹⁴ Fafisu munara ani ḇyedodo, Yesus syun ro Allah Rum byedi ma ḇyuk farkarkor.

¹⁵ Inja kawasa Yahudisya sikandor ma sikofen, ḇo soḇo: “Rariso, snon ine daksun farkarkorḇa ḇesyaḇo isma fawawi ḇeradine!”

¹⁶ Yesus kyarem farosi: “Farkarkor yaḇuk nane neknam ro mankundaya ḇa, ḇape neknam ro Allah ḇewan aya kwarya.

¹⁷ Mansei ḇemarisen ḇefrur Allah marisen ḇyedi, nari ifawi farkarkor ayena ndamuma ro Allah, roḇaido yawawos ro mankundaya ḇardi.

¹⁸ Mansei ḇeyawawos ro mankundi ḇardi, syewar sanandik faro mankundi, ḇape mansei ḇesewar syom faro Allah ḇewaniya, ikada inapes ma dankar ḇa.

¹⁹ Moses iso ḇeḇuk sasoser Refo Yahudi faro mkoke? Ḇape oso ḇaḇeri rofandu mko ifrur sasoser anna. Snaro mkosewar fa mkomun aya?”

²⁰ Snonkaku ḇeḇor ansi skarem, ḇo soḇo: “Setansya siswoḇer aw; mansei ḇeḇesewar fa ḇemun awya?”

²¹ Yesus kyarem farosi: “Fararur oser monda iso yafrur ro ras Mananai Yahudi ma mkokam mkokandor.

²² Inja: Moses ḇyuk fa insa mkofrur sofakfuk ḇape sofakfuk ani ḇyeknam ro Moses ḇa ḇoi ḇyeknam ro up mkoḇesi –mkomarisen sofakfuk ro ras Mananai Yahudi!

²³ Rofyor snon oso isma sofakfuk ro ras Mananai Yahudi, insa seyuk awer Moses sasoser ḇyena, snaro mkomsor aya, snar yaḇuk pararei faro baken ḇesiper ro snonkaku oso ro ras Mananai Yahudi.

²⁴ Mkoḇe mankara awer imnis rosai ḇeḇair, ḇape mkoḇe mankara kuker napnapes.”

Kakuke Yesus Wairek ḇeḇuk koreri? 7:25-36

²⁵ Snon Yerusalem ono sikofen, ḇo soḇo: “Snonkaku ine iso simarisen smunya?

²⁶ Ma mkomam kada, dawawos kuker fababa ma sipok sawos roi oso faroi ḇa. Imbude manfarkin koḇesi sifawi kaku kwar, mboi i Wairek ḇeḇuk koreri?

²⁷ Ḇape snon inekada kofawi moḇsai ryamuma roya, ḇape rofyor Wairek ḇeḇuk koreri ryama, snon osero ḇaḇeri ifawi moḇsai ryamuma roya.”

²⁸ Rofyor Yesus ḇyuk farkarkor ro Allah Rum ḇyedi, dor naba: “Mboi ayakada mkomambaḇir ma mko fawi moḇ yaramuma roya; ḇape yarama ro mankundaya marisen ayediḇa, ḇape aya ine yaser wawan ro ḇenapesya ikada mkomamḇaḇiri ḇa.

²⁹ Ayakada yamambaḇiri, snar yaramuma roi ma iso ḇewan aya.”

³⁰ Sesewar fa sfor Yesus, ḇape snonkaku osero ḇaḇeri fa iserepen i, snar fafisu ḇyedi ryama ḇaim.

³¹ Ḇape rofandu kawasa ḇeḇor ansi ono sibor sikyar faroi ma sikofen, ḇo soḇo: “Rofyor Kristus ryama, nari ifrur aḇyair kanandor nabor syadi ro snonkaku ine ifrurnake?”

³² Snon Farisi simnaf snonkaku ḇeḇor ansi roi sfararum fa ḇekur Yesus, inja mananir imam-imam ma snon Farisi siwan fa ḇewaren Allah Rum ḇyedi sfor Yesus.

³³ Inja Yesus ikofen: “Fafisu kermkun monda aya isya kuker mko ma ḇarpurya nari yakaḇer faro ḇewan ayanya.

³⁴ Nari mkosewar aya, ḇape nari mkosrow ayaḇa, snar nari mkopok mkoramuma ro moḇ ayaisya royaḇa.”

³⁵ Snon Yahudi ansi sikofen yae farosi, ḇo soḇo: “Moḇ rosai iḇe ryaḇeya, isof kopok kosrowi ḇa? Imbude iḇe ryaḇe moḇ kawasa Yahudi ḇekon imnis ambersya rofandu kawasa Yunanisya fa ḇyuk farkar farosike?

³⁶ Rosaiso kyara ḇesya ro wos iwos nane: Nari mkosewar aya, ḇape nari mkosrow ayaḇa, ma: mkopok mkora faro moḇ rosai aya isya royaḇa?”

War sun ḇeḇuk kankenem 7:37-44

³⁷ Ma ro ras ḇepupes ro munara ani ḇyedodo Yesus dores ro Allah Rum ḇyedi ma dor naba: “Mansei ḇembrowya, iḇye ryama faro aya ma dinem!

³⁸ Mansei ḇekyar faro aya, imnis raris Refo moḇ ikofen raya: Rosne ḇyedi nari war ḇeryuḇerya idaf fa ḇyuk kankenem.”

³⁹ Roi kyaraya isoine ḇekyar faroisya nari sisma Rur ḇesrenya; snar rurya ryama ḇaim, snar Yesus isma payamyum ḇaim ro marmar ḇyedi.

⁴⁰ Snonkaku ono rofandu kawasa ḇeḇor ansi, ḇemnaf wos anna, sikofen ḇo soḇo: “Snon ine nabi rirya.”

⁴¹ Ono wer sikofen, ḇo soḇo: “Ineido Wairek.” Ḇape ono wer sikofen, ḇo soḇo: “Roḇa, Wairekya ryama ro Galilea ḇa!

⁴² Snar Refoya ikofen, mboi Wairek ḇyeḇarpur ro Daud ma ro mnu Betlehem, moḇ Daud kyon ḇepon roya.”

⁴³ Inja rofandu kawasa ḇeḇor ansi sfamfaḇri snar Yesus.

⁴⁴ Snonkaku ono rofandusi simarisen sfori, ḇape snonkaku oso ḇaḇeri iserepeni.

Nikodemus ḇyesano warek Yesus 7:45-52

⁴⁵ Inja manwarwaren-manwarwaren ansi sra faro mananir imam-imam ma snon Farisi ansi sikofen farosi, ḇo soḇo: “Snaro mkuni ḇa?”

⁴⁶ Manwarwaren-manwarwaren ansi skarem, ḇo soḇo: “Snonkaku oso ḇaim dawos imnis snon ani!”

⁴⁷ Snon Farisi ansi skarem farosi, ḇo soḇo: “Inja ḇyeninyan mko kwarke?

⁴⁸ Inja snon ono fandu manfarkin-manfarkin ma Farisisya sakyar faroike?

⁴⁹ Ḇape kawasa ḇeḇor sine ḇeyakfawi Refo Yahudiḇa, frasya kyursi!”

⁵⁰ Nikodemus, snon oso ro si, ḇerama yoḇ Yesus kwar ani ikofen farosi, ḇo doḇo:

⁵¹ “Inja sasoser Refo Yahudi koḇedi ḇyuk samamyai faro snonkaku ḇesasar oso, rofafisu ḇyeḇemnaf ma ḇyeḇekukeḇ ḇaim?”

⁵² Skarem, ḇo soḇo: “Inja aw kako snon Galileake? Kwukeḇ Refo ma nari wafawi mboi nabi oso isya ryama ro Galilea ḇa.”

Bin ḇefrur farbuk 7:53–8:11

⁵³ Raimnai sibur ḇerum sena,