YOHANES 19 - ANKANKINEM ḆEḆYE RO FAFISU INE

¹ Raimnai Pilatus duni ma iwan fa sipreri.

² Sordadesya siyanem wower borek oso ro kaḇrai borek posa sriri ro ḇukor ḇyedi. Ma ssansuni kuker syatuḇefuk,

³ Ma sikofen faroi, ḇo soḇo: “Jow suba, ne wairek Yahudi!” Raimnai sḇaseri.

⁴ Raimnai Pilatus isasyar wer ma ikofen faro kawasa ḇeḇor ansi, ḇo doḇo: “Mkomam, yuni fa isasyar faro mko, insa mkofawi, yasma sasar oso roi ḇaḇeri.”

⁵ Raimnai Yesus isasyar, isaswo wower borek ma syansun syatu ḇefuk. Ma Pilatus ikofen farosi, ḇo doḇo: “Mkomam snonkaku ine!”

⁶ Rofyor mananir imam-imam ma manwarwaren ansi smami, sibras kam ḇo soḇo: “Ḇye ḇepai ro aprop, ḇye ḇepai ro aprop!” Pilatus ikofen farosi, ḇo doḇo: “Mkuni ma mkopai ro mankun mko; snar yasma sasar oso roi ḇaḇeri.”

⁷ Kawasa Yahudi skarem faroi, ḇo soḇo: “Nkona sasoser ma sasoser ani doḇo nari imar snar kyarem mankundi ḇe Allah Rumkun ḇyedi.”

⁸ Rofafisu Pilatus imnaf wos ḇerarirya imkak syadi wer,

⁹ raimnai syun kaḇer wer ḇe rum karkara ḇenapes ma ikofen faro Yesus, ḇo doḇo: “Aw ido beknam roriso?” Ḇape Yesus kyaremba.

¹⁰ Inja Pilatus ikofen faroi wer, ḇo doḇo: “Inja wamewer wawos kuker ayake? Wafawi ḇake yasma papoik fa yafaspar aw, ma papoik kako fa yawan ḇo spai aw ro aprop?”

¹¹ Yesus kyarem: “Wasma papoik oḇa beri kako faro aya, rofyor papoik ani ḇyeḇeḇuk faro aw ro boiyaswaḇa. Eḇedari: ḇeḇuk aya faro awsya sasar sena naba syadi ro aw.”

¹² Rofyor ani Pilatus ḇyesewar fa fyaspar Yesus, ḇape kawasa Yahudisya sibras, ḇo soḇo: “Rofyor faspari ido Kaisar bati ḇyediso awḇa. Snonkaku oso ḇekara mankundi ḇe wairek ikada isampum Kaisar.”

¹³ Rofyor Pilatus imnaf wos anna, iwan fa ssun Yesus ḇe ḇondi, ma kyain ro karapesa napnapesya, ro moḇ ḇenirḇe Litostrotos, (ansan karui) ro wos Ibrani Gabata.

¹⁴ Ras ani kada ras fasasos Paskah, indokada oras samfur seser risuru. Pilatus ikofen faro kawasa Yahudi ansi; ḇo doḇo: “Inekada wairek mkoḇedi!”

¹⁵ Inja sibras ḇo soḇo: “Mkomuni! Mkomuni! Mko pai ro aprop!” Pilatus ikofen farosi, ḇo doḇo: “Inja mkomarisen ḇoyapai wairek mkoḇedi ro aprop?” Mananir imam-imam ansi skarem, ḇo soḇo: “Nkona wairek oso ḇese ḇa mboi Kaisar ikada wairek nkoḇedirya!”

^16a Ḇarpurya Pilatus ḇyuk Yesus farosi fa spai ro aprop.

Yesus ḇyeḇepai ro aprop 19:16b-27

^16b Ssun Yesus raimnai sra.

¹⁷ Yesus mankundi ḇyar aprop ḇyedi ḇo isasyar ḇe moḇ ḇenirḇe Ḇukorbei, ro wos Ibrani: Golgota.

¹⁸ Ma rodia spai ro aprop ma spai fnoḇeki kako snon risuru oso ro ḇar raku ma oso ro ḇar rasar ḇoi Yesus ro fadu.

¹⁹ Ma Pilatus iwan fa sfas ro Yesus aprop ḇyedi: “Yesus ro Nazaret, wairek kawasa Yahudi.”

²⁰ Kawasa Yahudi sibor siwasya fasfas ani, snar moḇ spai Yesus ro ani fyanam mnuya ma fasfas anna neḇefas ro wos Ibrani, Latin (Roma) ma wos Yunani.

²¹ Inja mananir imam-imamsya sikofen faro Pilatus, ḇo soḇo: “Fas awer: ‘Yahudisya wairek sedi,’ mboi fas radine: ‘Snon ine ikofen, Aya Wairek kawasa Yahudi.’ ”

²² Pilatus kyarem farosi, ḇo doḇo: “Rosai yafas kwar, kyain raririrya.”

²³ Sordade ansi spai Yesus kwar, ssun sansun ḇyena ma serwas na ḇefiak: Oser-oser isma rarwas oser ma syatu ḇyedi suni kako. Syatu ani ḇyeḇesipḇa mboi ḇyeḇesnai robo ḇe sop monda.

²⁴ Eḇedari sikofen yae farosi, ḇo soḇo: “Korwas iḇe mnuk-mnuk awer, mboi iḇye kokinsor fa kofawi mansei ḇenaiya.” Sifrur rarirya insa seimnis fas-fas ro Refo: “Sḇerarwas sansun ayena, ma skinsor faro syatu ayedi.” Ma sordade ansi sifrur rarirya.

²⁵ Ma ro fanam Yesus aprop ḇyedi, snari dores ma sna ḇedar ḇyedi Maria, Kleopas swari ma Maria Magdalena.

²⁶ Fafisu Yesus myam snari ma manfamyan iswar ani dores fanami, inja ikofen faro snari: “Awine, inekada romawa bedi!”

²⁷ Raimnai ikofen faro manfamyan ḇyedi: “Inekada sna bedi!” Randak ro ras ani beri manfamyan ani dun Yesus snari ḇe rum ḇyedi.

Yesus imar 19:28-30

²⁸ Raimnai, Yesus ifawi, mboi roi ḇeḇor kam namnis kwar, ma insa rosai sfas ro Refo ndarirya, inja ikofen: “Yambrow!”

²⁹ Rodia isya sek oso ifo kuker anggur ḇemnir. Inja skokukser bunek ḇesowen kwar ro anggur ḇemnir ansi ro amfriwen oso ma skosui ro Yesus sḇardip ḇyedi.

³⁰ Yesus dinem anggur ḇemnir ani kwar, ikofen: “Imnis kwar.” Raimnai kyankunem ma imar.

Yesus pe ḇyedi ḇye ḇewan kir 19:31-37

³¹ Snar ras ani ras fasasos ma insa ro ras Mananai Yahudi ani kekḇa ansi skaf awer ro aprop-snar ras Mananai Yahudi ani ras ḇeba rirya-inja kawasa Yahudi sra faro Pilatus ma sor faroi insa snonkaku spai ansi wemin sena neḇepankar ma kekḇa ansi seḇesabu.

³² Inja sordade ansi sra ma spankar ḇepon snon risuru spai fnoḇek Yesus ansuya wemin suḇesi;

³³ ḇape rofyor srama faro Yesus ma smam imar kwar, inja sakpankar wemin ḇyesuya ḇa,

³⁴ ḇape snon oso ro sordade ansi iwankir pe ḇyedi kuker bom, ma rik kuker war nasar beri.

³⁵ Ma snonkaku ḇemam roi ḇeḇesya ani iso ḇeḇuk ḇaḇesaksi kako ma ifawi ḇaḇesaksi ḇyedi kyaku, ma ifawi, mboi ikofen roi ḇenapes, insa mkokyar kako.

³⁶ Roi ḇeradine ndarirya, insa fasfas ro Refo imnis isoine: “Kor ḇyesi oso nari ḇyeḇepankarḇa.”

³⁷ Ro Refo sfas kako radine: “Nari smam Yesus siwankir ani.”

Yesus ḇyeḇekrir 19:38-42

³⁸ Posa kwar Yusuf ro Arimatea rya faro Pilatus ma dor insa dun Yesus kekḇa ḇyedi ro apropya. (Yusuf manfamyan ro Yesus ḇeso fasis, snar imkak kawasa Yahudisya.) Ma Pilatus ḇyuk raris fararyor ani. Inja rya dun Yesus kekḇa ḇyedi.

³⁹ Nikodemus, ro randakya ḇera faro Yesus rofafisu roḇ, dakso Yusuf kako. Nikodemus dun mani mur ḇefawas mampasa marḇakḇakya indokada kati samfur ririm.

⁴⁰ Snon ansuine suyun Yesus kekḇa ḇyedi, suparek epeni kuker kruḇen ḇepyoper ma supyosi kuker kefi-kefi imnis rari kawasa Yahudi rofyor sikrir ḇemarsya.

⁴¹ Fanam moḇ spai Yesus ro ani yaf pampen oso isya, ma ro yaf ani ureren babo oso isya, ḇape sikrir snon oso roi ḇaim.

⁴² Snar ras ani ras fasasos kawasa Yahudi ma ureren ani ḇyinkwanḇa, inja sfaryaker Yesus kekḇa ḇyedi ro dia.