YOHANES 18 - ANKANKINEM ḆEḆYE RO FAFISU INE

Yesus ḇye ḇefor 18:1-11

¹ Yesus ḇyenadi rarirya kwar isasyar ro moḇ ani kuker manfamyan ḇyesi skunuk war Kidron. Rodia yaf oso isya ma Yesus syun ro yaf ani fnoḇek manfamyan ḇyesi.

² Yudas ḇeḇoḇ Yesus, dakfawi moḇ ani kako, snar fafisu ono Yesus fyananjur kuker manfamyan ḇyesi ro moḇ ani.

³ Inja mananir imam-imam ma snon Farisisya siwan Yudas fa dun sarar sordade Romawi ma manwarwaren Allah Rum ḇyedi, ssun romamun ma ambar, ḇo sakrama ro moḇ ani.

⁴ Yesus ifawi kwar rosai nari ḇekuri, inja imbran fa isrowsi ma ikofen farosi: “Manseiso mko sewarya?”

⁵ Skarem faroi, ḇo soḇo: “Yesus ro Nazaret.” Ikofen farosi: “Aya isoine.” Yudas ḇeḇoḇi ani isya kako rodia fnoḇeksi.

⁶ Rofafisu ikofen farosi: “Aya isoine,” sisusu ma sisapi kam.

⁷ Raimnai ifuken wer: “Manseiso mko sewarya?” Sikofen, ḇo soḇo: “Yesus ro Nazaret.”

⁸ Yesus kyarem: “Yakofen kwar faro mko, aya isoine. Rofyor ayai mkosewarya ido, mkorir ḇese sine fa sibur.”

⁹ Rarirya insa Yesus wos ikofen kwar imnis: “Mami manseiso buk kwar maro aya, yamam mondasi ḇo oso ryoḇa.”

¹⁰ Inja Simon Petrus, ḇeyun sumber oso, pyas sumber ani ro sowerya ma pyapek bas imam ḇeba manfyan ḇyedi knaram byedi ḇar rakuya. Manfyan ani snonsnon ḇyedi Malkus.

¹¹ Yesus ikofen faro Petrus: “Swower sumber bedi; kwara woḇo yamewer yinem ro sekaninem kandera Mami ḇyuk kwar maro aya?”

Yesus ḇye ḇeyun ḇe ḇarpon Hanas – Petrus fyamyunepen Yesus 18:12-27

¹² Inja sarar sordade Romawi mananir sedi ma Yahudisya manwarwaren siwansya sfor Yesus ma sewankai.

¹³ Raimnai suni ḇepon faro Hanas, Kayafas manbanyori, Kayafas ine iso ḇeḇe Imam Ḇeba ro wampasi wambarek ani.

¹⁴ Kayafas ine iso ḇeḇuk swarepen kwar faro kawasa Yahudisya: “Iḇye syadi snonkaku oser imar sadwer er ḇeḇor kam.”

¹⁵ Simon Petrus ma manfamyan ḇese ani suso Yesus. Manfamyan ḇese anikada ifawi Imam Ḇebaya, inja daksun fnoḇek Yesus ḇe buḇes Imam Ḇeba rum ḇyedi,

¹⁶ mboi Petrus iwaf ro ḇondi fanam kedwaya. Manfamyan ḇese ḇefawi Imam Ḇeba ani, kyaḇer randi, dawawos faro ḇinfyan ḇewaren kedwaya, raimnai dun Petrus fa syun.

¹⁷ Ḇinfyan ḇewaren kadwai ani ikofen faro Petrus, ḇo doḇo: “Awne kako manfamyan oso ro snon iwa?” Petrus kyarem ḇo doḇo: “Roḇa!”

¹⁸ Rofafisu ani manfyan manwarwaren Allah Rum ḇyedi ono sikaḇen for oso kwar, snar pnunek iba ro fafisu ani, ma sores sidapen rodia. Petrus kako dores dakdapen fnoḇeksi.

¹⁹ Ma Imam Ḇebaya irandak ifuken Yesus ro manfamyan ḇyesi ma farkarkor ḇyena kako.

²⁰ Yesus kyarem farosi: “Yawos isna ro fababa faro supswan ine: Yaḇuk farkarkor ḇesya kwar ro rum nadi ma Allah Rum ḇyedi moḇ kawasa Yahudisya siryur ro na; yawos roi ono kuker kankunes ḇaim.

²¹ Snaro wafuken aya? Wafukensi rosai yakofen kwar farosi; kaku ḇeri sifawi rosai yafarkor kwar farosi.”

²² Rofafisu ikofen rarirya, snon ḇewaren oso ḇeyores ro dia, ḇyaser Yesus, ḇo doḇo: “Kwarem rarirya faro Imam Ḇeba?”

²³ Yesus kyarem faroi: “Rofyor wos ayedi syasar ido, fasna sasarya, ḇape rofyor wos ayedi kyaku ido, snaro baser aya?”

²⁴ Ma Hanas fyaremi kuker ḇramin ḇeḇewanka faro Imam Ḇeba Kayafas.

²⁵ Simon Petrus dores dakdapen for kaker rodia. Snonkaku ḇeyores rodia sikofen faroi, ḇo soḇo: “Aw kako manfamyan oso roi?”

²⁶ Fyamyuni ḇo doḇo: “Roḇa.” Manfyan oso ro Imam Ḇeba isoine kina ro snon Petrus pyapekbas knaram ani ikofen, ḇo doḇo: “Insanja yamam aw kako ro yaf ani fnoḇek snon ani?”

²⁷ Ma Petrus fyamyun wer ma rofyorya mankokosya sor.

Yesus ḇye ḇeyun ḇe ḇarpon Pilatus 18:28-38a

²⁸ Ma arwo prim kaku Yesus ḇyeḇeyun ro Kayafas rum ḇyedi ḇe rum karkara ḇenapes. Sikada saksun ro rum karkara ḇenapesḇa snar simkak ḇude sifrur mamas mankunsi, snar siḇe san Paskah.

²⁹ Eḇedari Pilatus isasyar fa isrowsi ma ikofen ḇo doḇo: “Rosai mkoḇuksof snon ineya?”

³⁰ Skarem faroi ḇo soḇo: “Rofyor snon ḇeḇarḇor risyaḇa kada nari nkuni fa nkoḇuki faro awḇa!”

³¹ Pilatus ikofen faroi, ḇo doḇo: “Mkuni ma mkoḇe mankarai raris sasoser Refo Yahudi mkoḇedi.” Yahudi ansi soḇo: “Nkopok nkoḇuk samamyai marmari faro snonkakuḇa.”

³² Rarirya insa imnis Yesus wos ikofen, fa ḇekur marmar ḇyedi.

³³ Raimnai Pilatus syun kaḇer ḇerum karkara ḇenapesya, raimnai dor Yesus ma ifukeni, ḇo doḇo: “Aw ine wairek Yahudisya sediso awke?”

³⁴ Yesus kyarem: “Inja fakfuken ḇedine dekro snembrike roḇaido ono ḇese ḇekofen faro aw ro aya?”

³⁵ Pilatus ikofen, ḇo doḇo: “Inja aya ine snon Yahudike? Er ḇesi ḇardi ma mananir imam-imam siso ḇeḇuk aw faro aya kwar; rosai wafrur kwarya?”

³⁶ Yesus kyarem: “Ḇaḇesasoser ayedi isya ro supswan ineḇa; rofyor Ḇaḇesasoser ayadi isya ro supswan inekada, nari manfamyan ayesi sisampum, ma siḇri warek aya insa ssḇuk aya faro Yahudisya ḇa, ḇape Ḇaḇesasoser ayedi ro dineḇa.”

³⁷ Inja Pilatus ikofen faroi, ḇo doḇo: “Inja wairek risawke?” Yesus kyarem: “Imnis raris moḇ wakofen raya, kaku aya ine wairek. Iso eḇedari yaḇe ḇeaḇen ma iso eḇedari yarama ḇe supswan ine, insa yaḇuk ḇaḇesaksi ro ḇaḇenapnapesya; snonkaku oser-oser ḇeḇeknam ro napnapesya simnaf mkaren ayedi.”

^38a Pilatus ikofen faroi, ḇo doḇo: “Rosai ḇaḇenapnapes ani?”

Ssḇuk samamyai marmari faro Yesus 18:38b–19:16a

^38b Raimnai Pilatus isasyar ro rum karkara ḇenapes wer faro kawasa ansi ma ikofen farosi, ḇo doḇo: “Yasma sasar oso ḇaḇeri ro snon ine.

³⁹ Ḇape faro mko ro ras Paskah yasasyar snon oso ro ḇesmaisya faro mko. Mko marisenke yasasyar wairek Yahudi faro mko?”

⁴⁰ Skarem kuker ḇararas, ḇo soḇo: “Roḇa, iba ḇoi Barabas!” Barabas ikada snon oso ḇefasyar.