YOHANES 16 - ANKANKINEM ḆEḆYE RO FAFISU INE

Farmku 16:1-4a

¹ “Yakofen roi ḇeḇor nane kam faro mko, insa mkoḇe ḇirḇar awer.

² Nari spampum mkobur rum nadi na, ma nari fafisuya ryama nari snonkaku ḇemun mko skara ḇo soḇo: sesyowi faro Allah.

³ Nari sifrur rarirya faro mko, snar ssmambaḇir faro Mami ma ayaḇa.

^4a Ḇape yakofen roi ḇeḇor nane kam faro mko, insa rofyor fafisuya ryama ido mko swarepen mboi yakofen na kwar faro mko.”

Rur Allah fararur ḇyedi 16:4b-15

^4b “Roi nane kam yakofen na faro mko ro randakyaḇa, snar fyor ine aya isya fnoḇek mko,

⁵ ḇape baboine nari yakaḇer faro ḇewan aya kwarya ma mkono osero ḇaḇeri ḇefuken maro aya: Waḇe rwa ḇeso?

⁶ Ḇape snar yakofen roi ḇeḇor nane faro mko, eḇedari mkosnemna nfafardun.

⁷ Rarirya roi yakofen faro mko nane nkaku: Iḇye syadi faro mko, fa yara. Snar rofyor yaraḇa, nari yawan Rur Ḇeḇuk snepreiya faro mkoḇa. Ḇape rofyor yara, nari yawani faro mko.

⁸ Ma rofyor ryama ido, iso nari ḇeḇuk fa supswan ine ssmambaḇir sasarna, napnapes ma ḇaḇesamamyaiya;

⁹ ro sasarna, snar sikyar faswef faro ayaḇa;

¹⁰ faro napnapesya, snar yara faro Mami ma mkomam aya werḇa;

¹¹ ro ḇaḇesamamyaiya, snar samambraḇ supswan ine isma samamyai kwar.

¹² Roi ono naisya nabor kaker fa yakofen faro mko wer, ḇape baboine mko sambraḇ ḇaim fa mko kamar na.

¹³ Ḇape rofyor Rur ḇenapesya ryama, ikada nari dun mko faro napnapesya; snar nari iwos ro roi ḇekur mankundi ḇardiḇa, ḇape dawos roi ḇeḇor kam imnaf na naiso ikofen na ma nari ḇyaryas faro mko ro roi nari ḇerama na.

¹⁴ Ikada nari ḇyuk baba maḇe aya, snar nari ḇyaryas faro mko rosai isma ro aya.

¹⁵ Roi ḇeḇor kam Mami ḇyena, roi yana nairya, eḇedari yakofen: Rur ani nari ḇyaryas faro mko rosai isma ro aya.”

Mandak ma raryaḇ 16:16-33

¹⁶ “Fafisu kermkun monda nari mkomam aya werḇa ma fafisu kermkun monda nari mkomam aya wer.”

¹⁷ Simnaf rarirya manfamyan ḇyesi ono sifuken yae farosi: “Rosai ikofen ḇesyani: Fafisu kermkun monda nari mkomam aya werḇa, ma fafisu kermkun monda nari mkomam aya wer? Ma: Yara faro Kmaya?”

¹⁸ Inja sikofen, ḇo soḇo: “Rosai ikofen ḇesya maroko: Fafisu kermkun monda wer? Kofawi rosai ikofenyaḇa.”

¹⁹ Yesus ifawi, mboi simarisen sifuken roi oso faroi, inja ikofen farosi: “Inja roi yakofen ro insanja anna naiso mko fuken yae mko kuker na, isoine: Fafisu kermkun monda nari mkomam ayaḇa ma fafisu kermkun monda wer kako nari mkomam aya?

²⁰ Kaku ḇeri yakofen faro mko: Nari mko kanes mboi supswan ine nari siryaḇ; mko kada nari mkomandak, ḇape mandak mkoḇena nari nfarwe ḇe raryaḇ.

²¹ Bin oso fyafardun rofafisu fanam iḇe daḇenya, ḇape rofafisu daḇen romawa ḇyedi kwar, bin ani ḇyepro kandera ḇyena, snar wombrek mkun oso ḇyeḇeaḇen kwar ḇe supswan ine.

²² Rarirya kako fafisu ine mkoḇe mandak, ḇape nari yasrow mko wer ma nari mkoryaḇ ma snonkaku oso ḇaḇeri fa dun raryaḇ mkoḇena burmko.

²³ Ma ro ras ani mkono nari ifuken roi ono faro aya ḇa. Kaku ḇeri yakofen faro mko: Roi ḇeḇor kam mkor faro Mami kuker snonsnon ayedi nari ḇyukna faro mko.

²⁴ Isof ro ras ine mkor roi oso ḇaim kuker snonsnon ayedi. Mkor nari mkosma, insa raryaḇ mkoḇedi imnis.

²⁵ Roi ḇeḇor nane kam yakofen na faro mko kuker sarḇer. Mboi fafisuya nari ryama yawos faro mko kuker sarḇer wer ḇa, ḇape yawos isnabos beri ro Mami faro mko.

²⁶ Ro ras ani nari mkonadi kuker snonsnon ayedi. Ma yakofen faro mkoḇa mboi yor ro Mami faro mko;

²⁷ snar Mami mankundi iswar mko, snar mkoswar aya kwar ma mkokyar mboi yarama ro Allah.

²⁸ Yarama ro Mami ma yarama ḇe supswan ine; yabur supswan ine wer ma yara faro Mami wer.”

²⁹ Manfamyan ḇyesi sikofen faroi, ḇo soḇo: “Babo ine Manseren wawos isna bosḇeri ma swarḇer werḇa.

³⁰ Insape nkofawi, mboi wafawi roi ḇeḇor nane kam ma fandun fa snonkaku sifuken wer ro awḇa. Eḇedari nkokyar mboi rwama ro Allah.”

³¹ Yesus kyarem farosi: “Inja insape mkokyare?

³² Mkomam, fafisuya ryama ma ryama kwar, mboi mkoḇe ḇekakek oser-oser ḇe moḇ ḇyedi ma mkobur ayaḇo yerer ro mankundaya. Mboi yemir ḇardiḇa, snar Mami ryous aya.

³³ Yakofen faro mko, roi ḇeḇor nane, insa mkosma aski snar mkoḇe oser kuker aya. Ro supswan ine sewayam mko ma mkoḇe kandera ḇape mkosambraḇser mkosnemna, snar yakafyo supswan ine kwar.”