YOHANES 15 - ANKANKINEM ḆEḆYE RO FAFISU INE

Yesus anggur knam ḇenapes 15:1-8

¹ Yesus ikofen wer, “Aya ine anggur knam ḇenapesya ma Mamiso ḇefrur yaf ani.

² Snaw ayena ḇeḇuk bon ḇana kyaruk na mboi snaw ḇeḇuk bon na ifron sren na, insa namarem syadi wer.

³ Mkokada mkosren kwar snar farkarkor yaḇuk faro mko kwarna.

⁴ Mkoḇe oser faswef kuker aya, ma ayano nari yaḇe oser faswef kuker mko. Imnis snawya imarem ro mankundiḇa, rofyor ḇyeoser faswef kuker knamyaḇa, rarirya ido nari mko maremba, rofyor mkoḇe oser faswef kuker ayaḇa.

⁵ Aya ine anggur knam ma mkoḇe snaw ro aya. Mansei ḇeḇeoser kuker aya nari ayano yaḇe oser kukeri, ikada ḇyuk bon nabor, snar roḇondibur aya mkopok mkofrur royoḇa.

⁶ Mansei ḇeḇeoser kuker ayaḇa, nari ḇyeḇesawen imnis snaw ma nari myas, ḇarpurya snonkakusya siryur na ma sisawen na ro forya fa nananem.

⁷ Rofyor mkoḇe oser kuker aya ma farkarkor ayena nkain ro mkosnemna, mkor rosai mko marisen na ro Mami, nari mkosma na.

⁸ Rofyor mkoḇuk bon nabor, Mami isma baba, rarirya mko fasna mkoḇe manfamyan ḇeaya.”

Sasoser insa koswar yae ko 15:9-17

⁹ “Raris Mami iswar aya kwar, rarirya kako yakswar mko; mko kain ro saswar ayedi kada.

¹⁰ Rofyor mkoḇeuser sasoser ayena ido, nari mko kain ro saswar ayena, imnis raris yaḇeuser Mami sasoser ḇyena rarirya yakain ro saswar ḇyedi.

¹¹ Roi ḇeḇor nane kam yakofen na faro mko, insa raryaḇ ayena naisya ro mkosnemna ma marisen mkoḇena namnis.

¹² Sasoser ayena naiso nane, insa mkoswar yae mko, raris moḇ yaswar mko raya.

¹³ Snonkaku ḇeswar syadi bati ḇyesi isoine, snonkaku ḇeḇuk kankenem ḇyedi faro bati ansi.

¹⁴ Bati ayesiso mko, rofyor mko frur rosai yasoser faro mko.

¹⁵ Yor mkoḇe manfyan wer ḇa, snar manfyanya ifawi roi tuan ḇyedi ifrur naba, ḇape yor mkoḇe bati, snar yakofen ḇadir faro mko kwar roi ḇeḇor nakam yamnaf kwar ro Mami na.

¹⁶ Mkoi ḇekimfir ayaḇa ḇape ayaiso ḇekimfir mko. Ma yaḇeasas faro mko kwar, insa mkora ma mkoḇuk bon ma bon mkoḇena nako, insa rosai mkor ro Kmaya kuker snonsnon ayedi, Mami ḇyuk na faro mko.

¹⁷ Sasoser ayena naiso nane faro mko: Mkoswar yae mko.”

Supswan ine dayin Yesus ma manfamyan ḇyesi 15:18-27

¹⁸ “Rofyor supswan ine dayin mko, mko swarepen mboi dayin ḇepon aya kwar ro mko.

¹⁹ Rofyor supswan ine i ḇena mkonya, nari iswar mko imnis snonkaku ḇyesi. Ḇape snar supswan ine i ḇena mkonyaḇa, mboi yakimfir mko kwar ro supswan ine, eḇedari supswan ine dayin mko.

²⁰ Mko swarepen rosai yakofen faro mko kwar: manfamyan oso ikaki syadi tuan ḇyediḇa. Rofyor sewayam aya kwar, rarirya nari sewayam mko kako; rofyor siso farkarkor ayena, nari siso farkarkor mkoḇena kako.

²¹ Ḇape roi ḇeḇor nakam nari sifrur na faro mko snar aya, snar ssmambaḇir ḇewan ayanyaḇa.

²² Rofyor yarama ḇaim ma yawawos faro siḇa, nari sesasar ḇa. Ḇape baboine sisma sanoḇa faro sasar sena!

²³ Mansei ḇeyayin aya, ikako dayin Mami.

²⁴ Rofyor yafrur fararur nane ro fadu senaḇa imnis raris snonkaku ḇesesya moḇ sifararur ḇaḇeri raya nari sesasarḇa. Ḇape baboine smam roi ḇeḇor yafrur nakam kwar ḇesyaḇo sayin faro aya ma Mami kako.

²⁵ Ḇape fasfas ro Refo Yahudi sedi nari seimnisi: Sayin aya kuker knamoḇa.

²⁶ Nari yawan faro mko Rur Ḇeḇuk sneprei ḇeḇeknam ro Kmaya iso nari ḇafasna napnapes ro Allah ya. Rofyor ryama kwar, nari ḇyesaksi ro aya.

²⁷ Ma mko kako nari mkoḇe saksi ro aya, snar mko kada ro randakya mko fnoḇek aya kwar.”