YOHANES 12 - ANKANKINEM ḆEḆYE RO FAFISU INE

Yesus ḇye ḇerem ro Betania 12:1-8

¹ Ras riwonem ḇepon ro Paskahya Yesus ryama ro Betania, ro moḇsai Yesus ḇyuk aḇiḇer faro Lazarus fandu ḇemarsya ro ani.

² Rodia sfasos roḇean faro Yesus, ḇeyanan fnoḇek Yesus sya oso snonsnon ḇyedi Lazarus, Marta ḇeyuf farmyan si.

³ Ma Maria dun mani ḇespum ḇekakur kaku, kati mun ono fa ḇyuki ryem Yesus wemin ḇyesuya ma ipyos su kuker snonburyam ḇyena; ma rum ani ḇesiper isnarem apan ḇemani spum.

⁴ Ḇape Yudas Iskariot snon oso fandu Yesus manfamyan ḇyesi, nari ḇeḇoḇ fasawi, ikofen ḇo doḇo:

⁵ “Snaro mani ḇespum ine ḇyeḇeḇoḇ ḇa kuker maeja kumpan sarak utin rikior ma pipisya seḇeḇerwas faro ḇesaḇararsya?”

⁶ Wos ikofen ine, ikofen rarirya snar iswar kawasa ḇesaḇarar syaḇa mboi snar i snon ḇekaraw-raw rirya; snar ikada dun ḇesya kwar pipi ḇekram ro rosaser dufya.

⁷ Inja Yesus ikofen: “Mkomam monda bin ine ifrur rarirya fa ḇyeswarapepen ro ras kardir ayedi.

⁸ Snar snonkaku ḇesaḇararsya sisya ro fandu mko ḇesya kwar, ḇape ayama roḇa.”

Yahudi sna awi fa smun Lazarus 12:9-11

⁹ Kawasa Yahudi sibor simnaf, mboi Yesus isya ro Betania ma srama snar Yesus mondaḇa, mboi srama insa sakmam kako Lazarus ḇesma aḇiḇer kwar rofandu snonkaku ḇemarsya.

¹⁰ Raimnai mananir imam-imam sna awi fa smun Lazarus kako,

¹¹ snar kukeri kawasa Yahudi sibor sibursi ma sikyar faro Yesus.

Yesus ḇye ḇeyaker ro Yerusalem 12:12-19

¹² Meserdi fafisu snonkaku ḇeḇor ḇerama ḇeyakso munara simnaf, mboi Yesus isya ro nyanya faduri fa ryama ḇe Yerusalem,

¹³ sun yar ram ono, ma sra sisrowi kuker bararas, ḇo soḇo: “Hosana! (Wakenem!) Ḇerama kuker snonsnon Manseren isma ḇok, Wairek Israel!”

¹⁴ Yesus isma keledai kuḇ oso raimnai dekroi, imnis fasfas ro Refo:

¹⁵ “Mkomkak awer inai infun Sion, mkomame Wairek mkoḇedi ryama, dek keledai mkun oso!”

¹⁶ Randakya Yesus manfamyan ḇyesi sifawi roi ḇeḇesya ineḇa, ḇape rofyor Yesus isma baba ḇyedi, si swarepen mboi mnuk ani kyuri, ma sifrur rarirya faroi.

¹⁷ Snonkaku ḇeḇor ḇefnoḇek i ro fafisu dor Lazarus fa isasyar ro rus ma ḇeḇuk aḇiḇer faroi rofandu ḇemarsya si ḇeḇesaksi ro Yesus.

¹⁸ Eḇedari snonkaku ḇeḇor ansi sra sisrowi, snar simnaf, mboi i ḇefrur aḇyair kanandor ani.

¹⁹ Inja snon Farisi ansi sikofen yae faro mankunsi, ḇo soḇo: “Kopok kofrur royoḇa mboi mkomam kada, supswan ḇesiper siwayan kam fa sisoi.”

Yesus ḇyaryas marmar ḇyedi 12:20-36

²⁰ Rofandu snonkaku ḇeyakḇe nadisya ro ras munara ani, snon Yunani ono sisya.

²¹ Snonkaku ansi sra faro Filipus, ḇeḇeknam ro Betsaida ro Galilea, ma sikofen faroi, ḇo soḇo: “Naeko mkomarisen ido nkomarisen nkosrow Yesus.”

²² Filipus rya ikofen ḇadir faro Andreas; Andreas ma Filipus sukofen ḇadir wer faro Yesus.

²³ Ḇape Yesus kyarem faro su: “Fafisu Rumkun Snonkaku isma babaya ryama kwar.

²⁴ Yakofen faro mko: Rofyor fas morya isapi ro sapropya ma imarḇa ido, nari ḇyemor oser faswef monda; ḇape rofyor imar nari ḇyuk bon nabor.

²⁵ Mansei ḇeswar kankenem ḇyedi, nari kankenem ḇyedi ryoburi, mboi mansei ḇeswar kankenem ḇyediḇa ro supswan ine nari fyadurui faro kankenem ḇekain fyoroya.

²⁶ Mansei ḇeyuf farmyan aya, nari iso aya ma moḇsai aya isya roya, rodia kako ḇeyuf farmyan ayasya sisya. Mansei ḇeyuf farmyan aya nari Mami ḇyesyowi i.

²⁷ Knikine sneri fyafardun ma rosai yaḇe yakofenya? Inja nari yor ro Mami fa fyaspar aya ro fafisu ine? Ḇape insa yasma kandera ine eḇedari yarama kwar ine.

²⁸ Mami snombri isma baba!” Rarirya simnaf mkaren ro boiyaswa: “Yaḇuk baba faroi kwar, ma nari yaḇuk baba faroi wer!”

²⁹ Snonkaku ḇeḇor ḇeyores ro moḇ ani ma ḇerower sikofen, mboi ine rakrok karadu. Ono wer sikofen: “Malaikat oso iso ḇeyawawos kuker i kwar.”

³⁰ Yesus kyarem: “Mkaren ani ḇyeḇerower kwar snar ayaḇa, mboi snar mko.

³¹ Knikine samamyai imbran ro supswan ine: knikine kako papoik supswan ine ḇyeḇesawen ḇe ḇondi;

³² ma aya, rofyor mkoyer nakaki aya ro supswan ine, nari yun snonkaku syakam fa srayoḇ aya.”

³³ Ikofen radine fa fyasna moḇsai nari imar raya.

³⁴ Raimnai snonkaku ḇeḇor ansi skarem: “Nkomnaf ro sasoser Refo Yahudi mboi Wairek ikenem faswef fyoro-fyoro; inja rariso wakofen Rumkun Snonkaku nari siyer nakaki i? Mansei Rumkun Snonkakuya?”

³⁵ Yesus ikofen farosi: “Fafisu kermkun monda wer isna isya fandu mko, fafisu rosai isnaya isya ro mko, mkokyar faroi, insa papoik pampanya ikawef awer mko; mansei ḇembran ro pampanya dori, ifawi moḇ iḇe ryayoḇyaḇa.

³⁶ Mkokyar faro isnaya, rofyor isnaya isya faro mko, insa mkoḇe romawa-romawa isna.” Yesus ikofen rarirya kwar, rya dofbursi.

Snaro kawasa Yahudisya sikyar ḇa 12:37-43

³⁷ Ma Yesus ifrur aḇyair kanandor nabor kako kwar, ḇape sikyar faroi ḇa,

³⁸ insa nabi Yesaya wos ikofenya imnis: “Manseren, mansei ḇekyar faro ḇaryas nkoḇena? Ma faro mansei Manseren papoik bedi ḇyeḇefasna farosya?”

³⁹ Eḇedari sikyarḇa, snar Yesaya ikofen kako kwar:

⁴⁰ “Yafrur mkamor sena fa napraf, Yafrur sisnesna fa nedip; insa mkamor sena nmam awer, kakara sena nafawi awer. Insa skaḇer awer faro aya, fa yaḇuk parare farosi.”

⁴¹ Yesaya ikofen rarirya snar myam Yesus baba ḇyedi kwar ma iwawos roi kwar.

⁴² Rariryano manfarkinsya sibor kaku sikyar faroi, ḇape snar snon Farisi simewer skarem i rofababa, insa spampum awer si ro rum ari.

⁴³ Snar simarisen syadi faro sanandik snonkaku ro ḇaḇesyowi Allah.

Yesus wos ḇyena nbe mankara 12:44-50

⁴⁴ Ḇape Yesus iyiw ḇo ikofen: “Mansei ḇekyar faro aya, ikyar faro Allah ḇewan aya kwarya;

⁴⁵ ma mansei ḇemam aya, myam kako Allah ḇewan aya kwarya.

⁴⁶ Yarama ḇe supswan ine kwar imnis isna, insa snonkaku ḇekyar aya sya, skain awer ro pampanya.

⁴⁷ Ma rofyor oso ryower wos ayena, ḇape ifrur naba, yaḇe mankara faroi ḇa, snar yarama yeḇe mankara supswan ineḇa, mboi yaḇuk koreri.

⁴⁸ Mansei ḇemewer aya, ma ḇemnaf wos ayenaḇa sya, mankaraya isya kwar farosi, isoine wos yakofen kwar na, naiso nari ḇeḇemankara farosi ro awar ḇepupesya.

⁴⁹ Snar yawawos ro mankundayaḇa ḇape Mami ḇewan ayanya, iso ḇeḇuk sasoser faro aya insa yakofen rosai nari yakofen na ma yaḇuk mufa.

⁵⁰ Ma yafawi, mboi sasoser ḇyena irya kankenem ḇekain fyoro. Inja rosai yakofenya, yaḇuk na raris Mami ikofen maro aya kwar.”