YOHANES 1 - ANKANKINEM ḆEḆYE RO FAFISU INE

Wos ḇeḇuk kankenem 1:1-18

¹ Wosya isya ro randakya; Wos ani isya kuker Allah ma Wos ani Allah dirya.

² Wos ani isya kuker Allah ro randakya.

³ Roi ḇeḇor nakam i ḇefrur nanya ma rofyor isyaḇa, roi ḇeḇor ḇeḇesya kwar anna kam napok ndariryaḇa kako.

⁴ Ro i kankenemya isya ma kankenemya ḇyesasna snonkaku.

⁵ Sasna ani isnai ro pampanya, ma pampanya ipokiḇa.

⁶ Allah iwan snonkaku oso fa ryama, snonsnon ḇyedi Yohanes;

⁷ Yohanes ryama imnis saksi fa ḇyesaksi sasna ani, insa snonkakusya kam sikyar.

⁸ Yohanes iso ḇeḇe isnaiyaḇa, ḇape ḇyuk ḇaḇesaksi ro sasna ani.

⁹ Sasna kakuya, iso ḇeḇeisnai snonkaku oser-oser, ryama ḇe supswan ine.

¹⁰ Isya kwar ro supswan ine ma iso ḇefrur supswan ine, ḇape supswan ine ssmambaḇiriḇa.

¹¹ Ryama faro kawasa ḇyesi, ḇape kawasa ḇyesi simeweri.

¹² Ḇape snonkaku ḇemarisen ma ḇekyari syakam ḇyuk papoik farosi, insa seromawa Allah ḇyesi.

¹³ Seḇeyaḇen kuker ḇaḇesnonkakuḇa, snar kankenem ḇebaboya ryamuma ro Allah.

¹⁴ Wosya ḇyesnonkaku kwar, ma ikenem fandu ko, ma komam baba ḇyedi, isoine baba ssḇuk faroi imnis Kmaya Rumkun Mandos ḇyedi, ifo kuker saswar fakamaman ma napnapes.

¹⁵ Yohanes ḇyuk ḇaḇesaksi ḇekur i ma ikofen ḇo doḇo: “Snon ine iso yakofen ḇadir ḇo yoḇo: Ḇarpurya ro aya nari oso ryama, ḇape ryama ḇepon kwar ro aya, snar isya kwar rofyor ayaisya ḇaimya.”

¹⁶ Snar ifo kuker saswarya, ma saswar ḇyedi imnaiḇa ma ḇyeḇok ko.

¹⁷ Snar sasoser Refo Yahudi Moses iso ḇeḇuk nani, ḇape saswar fakamaman ma napnapes ndama ro Yesus Kristus.

¹⁸ Snonkaku osero ḇaḇeri fa ḇemam Allah kwar; ḇape Allah Rumkun Mandos ḇyedi, ḇemnis kuker kmari ma ḇeroyusi ḇesya kwar, iso ḇefasna Kmaya maḇeko.

Yohanes ḇyuk ḇaḇesaksi ro mankundi 1:19-28

¹⁹ Ma ine ḇaḇesaksi ro Yohanes, fafisu snon Yahudisya ro Yerusalem siwan imam ma snon Lewi ono faroi ma sifukeni: “Manseiso aw?”

²⁰ Kyarem ma fyamyun epenḇa, ḇo doḇo: “Aya ine Wairek ḇa.”

²¹ Raimnai sifuken faroi: “Au rya ke nabi beramaya?” Kyarem: “Roba!”

²² Inja sikofen faroi: “Manseiso aw? Snar nari nkoḇuk kankarem faro ḇewan inkosya. Rosai wakofen fa ḇekur mankundwaya?”

²³ Kyarem, ḇo doḇo: “Aya iso nabi Yesaya ikofen kwarya, snonkaku ḇekaru ro sup ḇeursḇa: Mkokarpyom nyan faro Manseren!”

²⁴ Ma rofandu snonkaku siwan ansi, snon Farisi ono sisya.

²⁵ Sifuken faroi ḇo soḇo: “Rofyor wairek ḇeḇuk koreriya iso awḇa, Elia iso awḇa, ma nabi risawḇa ido, snaro buk masi sren?”

²⁶ Yohanes kyarem farosi ḇo doḇo: “Yaḇuk masasi kuker war; ḇape rofandu mko snon oso isya dores ḇo mkofawiḇa,

²⁷ isoine i, ḇerapapur ro aya. Yaper kaḇrai ḇefes roi ḇesower ḇyesi, yasyusḇa.”

²⁸ Roi ḇeḇesya nane ndarirya ro Betania, ro Yordan, ḇar wamurem moḇ Yohanes ḇyuk masi sren roya.

Allah Domba Mkun ḇyedi 1:29-34

²⁹ Ro meserdi Yohanes myam Yesus ryayoḇi ma ikofen: “Mkomam kada Allah Domba Mkun ḇyedi, ḇepyos sasar supswan ine.

³⁰ Iso yakofen ani: Nari ḇerapapur aya, ikada pyon aya kwar snar isya kwar rofyor ayaisya ḇaim.

³¹ Ma ayaḇardi randakya yamam ḇaḇiriḇa, ḇape snar i ḇeḇedari yarama yaḇuk masasi kuker war, insa ḇyeḇeḇadir faro Israel.”

³² Ma Yohanes ḇyuk ḇaḇesaksi ḇo doḇo: “Yamam kwar Rurya dado ro nanki imnis manjawa, ma kyain roi.

³³ Ma aya ine kako yamam ḇaḇiriḇa, ḇape i ḇewan aya fa yaḇuk masi sren kuker war, dawos kwar faro aya: Rofyor mam Rurya dado faro snon oso ma kyain roi, irya nari ḇeḇuk masi sren kuker Rur Ḇesrenya.

³⁴ Ma yamami kwar ma yaḇuk ḇaḇesaksi: Inekada Allah Rumkun ḇyedirya.”

Yesus manfamyan ḇepon ḇyesi 1:35-51

³⁵ Ro meserdi Yohanes dores wer rodia kuker manfamyan risuru ḇyesui.

³⁶ Ma fafisu myam Yesus dunuk, ikofen: “Mkomamkada Allah domba Mkun ḇyedi!”

³⁷ Manfamyan ansuya sumnaf rosai ikofen kwar, inja sura suso Yesus.

³⁸ Ḇape Yesus iknenef ḇe ḇarpur, myam susoi inja ikofen faro su, ḇo doḇo: “Rosai musewarya?” Sukofen faroi: “Rabi (isoine guru), moḇ rosai kwain roya?”

³⁹ Ikofen faro su: “Muramuma nari mankun mumame.” Susoi ma suyakmam moḇ rosai kyon roya, ma ro ras ani sukain fnoḇeki; fafisu ani indokada oras fiak mandira.

⁴⁰ Oso rofandu su ḇemnaf Yohanes wos ḇyedi ma ḇeso Yesus snonsnon ḇyedi Andreas, Simon Petrus ḇedar ḇyedirya.

⁴¹ Andreas isrow Simon, naek ḇyedi ma ikofen faroi, ḇo doḇo: “Nkosrow kwar Wairek ḇeyun koreri.” (Wairek) isoine Kristus.

⁴² Duni faro Yesus, Yesus myami ma ikofen: “Au Simon, Yohanes romawa ḇyedi, nari snir awḇe Kefas (isoine Petrus=Karui bosen).”

⁴³ Ro meserdi, Yesus kyara namuk fa ryaḇe Galilea, isrow kuker Filipus ma ikofen faroi: “Waso aya!”

⁴⁴ Filipus mnu ḇyedi Betsaida, Andreas ma Petrus mnu suḇedi.

⁴⁵ Filipus isrow Natanael ma ikofen faroi: “Nkosrow i kwar, Moses ikofen ro Refo Yahudi ma syap nabi-nabi ansya isoine Yesus, Yusuf romawa ḇyedi ro Nazaret.”

⁴⁶ Natanael ikofen faroi: “Inja roi ḇeḇye oso nari ryama ro Nazaretke?”

⁴⁷ Filipus ikofen faroi: “Rwama ma wakmam!” Yesus myam Natanael ryamuma yoḇi, inja ikofen: “Mkomam inekada snon Israel kraf oso, kosma ankarkar roiḇa!”

⁴⁸ Natanael ikofen faroi: “Mambaḇir aya rariso?” Yesus kyarem faroi: “Rofyor Filipus dor aw ḇaim, yamam kwain ro ara knamya baḇdi.”

⁴⁹ Natanael ikofen faroi: “Guru, Allah Rumkun ḇyedi iso au, ma kawasa Israel wairek sediso au!”

⁵⁰ Yesus kyarem: “Snar yakofen faro au; yamam aw ro ara knamya fuarya eḇedari wakyar ya? Nari mam roi ḇeḇor ḇesyadi wer ro ine.”

⁵¹ Raimnai Yesus ikofen wer faroi: “Yakofen faro aw, kaku ḇeri nari mam nanki ḇyas ma Allah malaikat-malaikat ḇyesi sado sek faro Rumkun Snonkakuya.”