MATIUS 24 - ANKANKINEM ḆEḆYE RO FAFISU INE

FASAL 24-25 FAFAYA RO PAPUPES SUPSWAN Allah Rum ḇyedi nari ḇyeḇekakok 24:1-2

¹ Raimnai Yesus isasyar ro Allah Rum ḇyedi, ma rya. Manfamyan ḇyesi srama ma sfasnai payamyum ro Allah Rum ḇyedi.

² Ikofen faro si: “Mkomam roi ḇeḇor anna kam? Yakofen faro mko, kaku ḇeri nari karui oso ro dine ḇyeḇemam monda ḇa ḇo ḇyarek ro oso bori; nakam nari neḇekakok.”

Kanderaya myun randak 24:3-14

³ Fafisu Yesus kyain ro urek Zaitun bori, manfamyan ḇyesi srafaroi insa sawawos ro mankunsi kuker I. Sikofen, ḇo soḇo: “Wakofen maro nko, fafisu rosaiso roi anna ne nari ndamuma ya ma aḇyair rosaiso ḇefasnai raramuma bedi ma aḇyair ḇefasna papupes supswan ya?”

⁴ Yesus kyarem faro si: “Mkepen mko insa snonkaku ono sfarkor ninyan awer mko!

⁵ Snar snonkaku sibor srama sap snori ma sikofen: Aya ine Wairek, ma nari sfarkor ninyan kawasa sibor.

⁶ Nari mkomnaf rakrok mbroḇ ma ḇaryas embroḇ. Rariryano mkepen mko, ma mkokarsosen awer; snar roi nane kam nari ndarirya resari, ḇape papupes ya ryama ḇaim.

⁷ Snar er nari sikḇawes sisampum er ḇese, ma ḇaḇesasoser sisampum ḇaḇesasoser ḇese na. Nari basbiser isya ma rim ḇeba nmun ro moḇ nabor.

⁸ Ḇape nakam insape kandera ḇemun randak ḇeyunḇe awar babo ya.

⁹ Rofyor ani nari ssḇuk mko fa sewayam ma smun mko ma nari er ḇeḇor kam sayin mko snar snonsnon Ayedi,

¹⁰ ma snonkaku sibor nari siwarki ma sḇoḇ yae si ma sayin yae si.

¹¹ Nabi sararer sibor nari sikḇawes fa sfarkor ninyan kawasa sibor.

¹² Ma snar sasar na, naba syadadi inja saswari ro snonkaku sibor ndoë.

¹³ Ḇape mansei ḇemku epen isof ḇarpur ya kada nari isma aski.

¹⁴ Ma Ankankinem Ḇeḇye ro Ḇaḇesasoser ine nari ḇye ḇeḇaryas ro supswan ḇesiper fa ḇyesaksi faro er sya kam, raimnai insape awar papupes ya.”

Wayam ḇemarḇak ma Wairek-Wairek sararer 24:15-28

¹⁵ “Inja rofyor mkomam ḇarḇor ḇeḇyeḇa ndo moḇ ḇesren, raris Nabi Daniel ikofen kwar – ḇeḇewasya mkokara pyum –

¹⁶ rarirya kawasa ro sup Yudea iḇye syadi sifrar sibur ḇe bon na.

¹⁷ Snonkaku ḇeyun wam ro kaderen ro rum ya bori ido awer fa dun roi oso ro rum ḇyedi,

¹⁸ ma snonkaku ḇero yaf kyaḇer awer fa dun sansun ḇyena.

¹⁹ Ara faḇye faro bin-bin ḇemoḇesḇa ma ḇesus romawa ro fafisu ani.

²⁰ Mkoḇe nadi, insa rofyor mkofrar mkobur ya isrow awer fafisu prim ya ma isrow awer ro ras Mananai Yahudi ya.

²¹ Snar ro fafisu ani nari wayam ḇefnak ḇa nmun, roi ḇeradine nmun ḇaim ro awar madero isof babo ine ma nari napok nmun wer ḇa.

²² Ma rofyor ya Allah ḇyuk fafisu ya fa iknampuḇa kada, nari roi ḇekenem nakam oso isma askiḇa; ḇape snar snonkaku Allah kyimfir sya, eḇedari fafisu ani ḇyei fa iknampuri.

²³ Rofyor ani snonkaku ono sikofen faro mko: Mkomame, Wairek isya ro dine, roḇaido Wairek isya ro diwa, mkokyar awer si.

²⁴ Snar Wairek-Wairek sararer ma nabi-nabi sararer nari sikḇawes ma nari sifrur aḇyair ḇeba syadi ma aḇyair kanandor, isof sfarkor ninyan snonkaku Allah kyinfir kwar sya kako.

²⁵ Mkoswarepen naḇye, Yakofen na ḇepon kwar faro mko.

²⁶ Inja, rofyor ono sikofen faro mko: Mkomame, Isya ro sup ḇeursḇa, mkoramura awer; roḇaido: Mkomame, Isya ro sim ya dori, mkokyar awer.

²⁷ Snar imnis raris samar ḇearḇeḇer ro ḇar wamurem ḇe ḇar wambarek, rarirya kuker raramuma ro Rumkun Snonkaku.

²⁸ Ro moḇ rosai ḇepsursya sisya, ro dia mankankan spanjuḇer.”

Rumkun Snonkaku raramuma ḇyedi – Sarḇer ro ara knam 24:29-36

²⁹ “Fafisu wayam ani isyof fasaw bur, ori nari pyampan ma paik ya isnaiḇa ma mak sya nari sfarsapi ro nanki ma papoik-papoik ro nanki nari namarmer.

³⁰ Rofyor ani nari aḇyair Rumkun Snonkaku fyasnai ro nanki ma kawasa kam ro supswan ine nari skanes ma nari smam Rumkun Snonkaku ryama ro mandif ro nanki kuker papoik ma payamyum ḇyena.

³¹ Ma nari Iwan malaikat-malaikat ḇyesi fa sisasyar ma siwuf sonker berok naba kaku ma nari siryur snonkaku Allah kyimfir kwar sya ro supswan ḇesiper.

³² Mkun farkarkor ro sarḇer ara knam: Rofyor snau-snau ḇyena nakpirew ma nkakyei randak, mkofawi fyor ryas ya fyanam kwar.

³³ Rarirya kako rofyor mkomam roi ḇeḇor nane kam, mkofawi beri, mḇoi fafisu ḇyedi fyanam kaku kwar, ro kedwai ya ḇarpondi.

³⁴ Yakofen faro mko: Kaku ḇeri syos ine, nari ryo ḇaim, roi ḇeḇor nane ndarirya resari.

³⁵ Nanki ma supswan ine nari ndo, ḇape wos Ayedi kada nari ryoḇa.

³⁶ Ḇape ras ma fafisu ani snonkaku oso ipok ifawiḇa beri, ma malaikat-malaikat ro boiyaswa kako roḇa, ma Rumkun ya kako roḇa, derer Mami mankundi.”

Ananun wadwaren 24:37-44

³⁷ “Snar imnis raris roi ḇeḇesya ro awar Nuh, rarirya kako nari roi ḇeḇesya anna ndarirya kako ro raramuma ro Rumkun Snonkaku ya.

³⁸ Snar imnis raris kawasa ro awar faḇruḇ ya ḇaim, sanan ma sinem, sekawin ma sfakawin si, isof ro ras Nuh syun ro wai ya,

³⁹ ma sifawi royoḇa beri ḇepon ro faḇruḇ ya ryama myun sikam, rarirya kako nari roi ḇerarirya ndama ro fafisu rarama Rumkun Snonkaku ya.

⁴⁰ Rofyor ani snonkaku risuru suisya ro yaf, nari oso ḇyeḇeyun ma sumin ya ḇyeḇebur;

⁴¹ rofyor bin risuru suso fas, sumindi ḇyeḇeyun ma sumindi ḇyeḇebur.

⁴² Inja iḇye mkepen mko, snar mkofawiḇa ras rosai Manseren mkoḇedi ryama ya.

⁴³ Ḇape mkofawi mnuk ine: Ro fafisu tuan ḇena rum ya ifawi ḇepon fafisu rosai ḇekaraw sya srama ro roḇ ya, nari iwaren ma ipok myam monda rum ḇyedi ḇo sfasyari ḇa.

⁴⁴ Rarirya mko kako mkofasos, snar Rumkun Snonkaku ryama ro fafisu mkokaraḇa.”

Sarber ro manfamyan ḇeḇesyowi ma manfamyan ḇeḇarḇor 24:45-51

⁴⁵ “Manfamyan mansei ḇeḇesyowi ma ḇefawi nananem, ikada tuan ḇyedi ikanow i fa myamwarek snonkaku ḇyesi ma ḇyuk nanan faro si ro fafisu ya?

⁴⁶ Aski faro manfamyan, rofyor tuan ḇyedi isrow isya ifararur ro fararur ḇyedi ro fafisu tuan ḇyedi ryama.

⁴⁷ Yakofen faro mko: Kaku ḇeri nari tuan ḇyedi ikanow i fa myamwarek roi ḇeḇor ḇyena kam.

⁴⁸ Ḇape rofyor manfamyan ani iḇarḇor ma ikofen ro sneri:

⁴⁹ Tuan ayedi nari ryakaki muma ḇa, inja irandak iprer manfamyan ḇese sya, ma dan dinem kuker ḇemasaser sya,

⁵⁰ rarirya tuan ḇyani nari ryama ro fafisu kyara ḇaḇeri, ma ifawi ḇa,

⁵¹ ma nari myun i ma ifrur faroi imnis snonkaku ḇeḇarḇor. Ro diwa kada nari ismai kankanes ma arkfafais nakor.”