MATIUS 22 - ANKANKINEM ḆEḆYE RO FAFISU INE

Sarḇer ḇekur munara fakawawin 22:1-14

¹ Raimnai Yesus dawos wer kuker sarḇer faro si:

² “Ḇaḇesasoser ro Boiyaswa imnis raris wairek oso, ḇefrur munara fakawawin faro rumkun ḇyedi.

³ Iwan manfamyan ḇyesi fa sra sor snonkaku dor kwar fa ḇeso munara fakawawin ani, ḇape simewer sramari.

⁴ Iwan manfamyan ono ḇese wer, kuker ananun: Mko kofen faro snonkaku yor ansi: Kaku ḇeri, roḇean ayena yafasos na kwar, sapi snoman ma rofanfan yesi seḇekaruk kwar; nakam neḇefasos kwar, inja mkorama ḇemunara fakawawin ine.

⁵ Ḇape snonkaku dor ansi sefandun iba; ono sraḇe yaf sena, ono sraḇe sasewar sena,

⁶ ma ono wer sfor manfamyan ansi, sḇewayam ma smun si.

⁷ Rarirya wairek ani imsor, ma iwan sarar ḇyesi fa sra smun ḇemamun ansi ma sikun mnu sedi.

⁸ Posa kwar ikofen faro manfamyan ḇyesi: Munara fakawawin ya ḇyeḇefasos kwar, ḇape snonkaku yor ansi sisyusḇa.

⁹ Inja mkora wer ḇenyan farsam nakam ma mkor snonkaku mkosrow ro diwa sya, mkun si faro munara fakawawin ine.

¹⁰ Rarirya manfyan ansi sra siryur snonkaku kam sisrow ro nyan diḇo, snonkaku ḇeḇarḇor ma snonkaku ḇepyum, isof sim munara fakawawin ani ifo kuker dakam ansi.

¹¹ Fafisu wairek ani syun fa isrow dakam ansi, myam snon oso daksansun sansun munara ḇa,

¹² inja ikofen faroi: Ne, naek, snaro swun ro dine ḇoi waksansun sansun munara ḇa?

¹³ Ḇape snon ani ḇyefasis monda. Inja wairek ani ikofen faro manfamyan ḇyesi: Mkofes wemin ma ḇramin ḇyesya ma mkosawen snon ani ḇemoḇ ḇepampan syadi, ro diwa kankanes ma arkfafais nakor naisya.

¹⁴ Snar sibor seḇeyor, ḇape skinfir sya sibor ḇa.”

Ḇaḇyak som faro Kaisar 22:15-22

¹⁵ Ḇarpurya snon farisi ono sra sna awi fa ssewar nyan rariso sifrowes Yesus kuker fakfuken oso.

¹⁶ Siwan manfamyan sesi fnoḇek snon Herodian ono fa sifuken I: “Guru, inkofawi, Au snonkaku ḇenapes ma kuker napnapes ḇuk farkarkor ro Allah nyan ḇyena ma Au wamkak ḇa faro mansei rya wer, snar au swewar snonsnon ḇa.

¹⁷ Wakofen faro nko karkara bedi: Inja koḇak som faro Kaisarke roḇa?”

¹⁸ Ḇape Yesus ifawi sne ḇeḇarḇor sena inja, ikofen: “Snaro mkofrowes Aya, ne snonkaku ḇeḇarḇor?

¹⁹ Mkofasnai faro Aya pipi faro som ani.” Inja ssun faroi dinar oser.

²⁰ Ma ifuken faro si: “Kakop ma fas-fas mansei ḇyedi sine?”

²¹ Skarem, ḇo soḇo: “Kakop ma fas-fas Kaisar.” Raimnai Yesus ikofen faro si: “Mkoḇuk faro Kaisar rosai Kaisar dor ro mko ma mkoḇuk faro Allah rosai Allah dor ro mko.”

²² Simnaf rarirya sikandor ma sisusu bur Yesus ma sibur beri.

Saduki ono sifuken ro yar aḇiḇer 22:23-33

²³ Ro ras ani Saduki ono sra faro Yesus, ḇena karkara, aḇiḇer ya isya ḇa.

²⁴ Sifuken faro I: “Guru, Moses ikofen, rofyor snon oso imar bur swari ḇoi suna romawaḇa, ḇedar ḇyedi ḇyuk bin ani insa ssuyaḇen romawa oso sadwer naek ḇyedi ḇemar ani.

²⁵ Rarirya ro fandu inko mambekanaek rifik sisya. Ḇepon ya fyakawin, ḇape nya romawa osoḇa ḇo imar. Inja naek ḇyedi fyakawin bin ani insa ssuyaḇen sadwer naek ḇyedi ḇemar ani.

²⁶ Rarirya kako ḇeḇesuru ma ḇeḇekior ya isof ḇeḇefik ya.

²⁷ Ḇarpur ya sikam simar, ma bin ani kako dakmar.

²⁸ Inja mansei ro fandu mambekanaek rifik ansi nari befakawin bin ani ro fafisu aḇiḇer ya? Snar sikam sfakawin kuker bin ani kwar.”

²⁹ Yesus kyarem faro si: “Mkosasar bos, snar mkofawi Refo ḇa, ma rarirya kako Allah papoik ḇyena!

³⁰ Snar ro fafisu aḇiḇer ya snonkaku sfakawin ḇa, ḇoi sikenem imnis malaikat ro boiyaswa.

³¹ Ḇape ro mnuk aḇiḇer fandu ḇemar si mkowasya ḇake rosai Allah ikofen, radine:

³² Aya ine Allah Abraham, Allah Ishak ma Allah Yakub? Snar I Allah faro snonkaku ḇemar sya ḇa, ḇoi I Allah faro snonkaku ḇekenem sya.”

³³ Kawasa ḇeḇor ḇemnaf ansi sikandor farkarkor ḇyena.

Sasoser ḇeba syadi 22:34-40

³⁴ Fafisu snon Farisi sya simnaf, Yesus isisen wark snon Saduki sya sisḇasna, inja siryur

³⁵ ma oso ro si, isoine snon ḇefawi nananem Refo Yahudi, ifuken sas Yesus:

³⁶ “Ne, Guru, sasoser rosaiso ḇeba syadi ro sasoser Refo Yahudi?”

³⁷ Yesus kyarem faroi: “Waswar Manseren, Allah ḇedi, kuker snembri ḇesiper ma kuker rur bedi ḇesiper ma kuker karkara ḇena ḇesiper.

³⁸ Ine sasoser ḇepon ma ḇeba syadi.

³⁹ Ma sasoser ḇeḇesuru ḇemnis kuker sasoser ḇepon ani iso ine: Waswar min besi imnis waswar mankundaw.

⁴⁰ Sasoser ansuine suiso ḇeḇeknam sasoser nakam ro Refo Yahudi ma syap nabi-nabi.”

Yesus ma Daud sunayae su rariso 22:41-46

⁴¹ Fafisu snon Farisi ono sisya siryur, Yesus ifuken faro si, doḇo:

⁴² “Rariso karkara mkoḇena ro Wairek? Mansei rumkun ḇyedi rya?” Sikofen faro I: “Daud rumkun ḇyedi rya.”

⁴³ Yesus ikofen faro si: “Rofyor rarirya ido, snaro Daud ikofen kuker sḇayoi Rur ya ma dap iḇe Manseren ḇyedi, ro fafisu ikofen:

⁴⁴ Manseren ikofen kwar faro Manseren yedi: kwainkada ro ḇar raku Yedi, isof Yarir mbroḇ besi fa waref epen si.

⁴⁵ Inja rofyor Daud dapiḇe Manseren ḇyedi, rariso dapi ḇe rumkun ḇyedi wer?”

⁴⁶ Snonkaku osoḇa kyarem faro I, ma randak ro ras ani snonkaku osoḇa beri ḇemku fa ḇefakfuken roi ono faro I.