MARKUS 8 - ANKANKINEM ḆEḆYE RO FAFISU INE

Yesus fyan snonkaku syaran rifiak 8:1-10

¹ Rofyor anya kawasa sya sibor kaku sisya ro moḇ ani, ma snar sisma nanan ḇa inja Yesus dor manfamyan ḇyesya ma ikofen faro si ḇo doḇe:

² “Sneri iswar kuf kawasa ḇeḇor ansine. Ras rikior siso farma aya ḇape sisma nanan ḇa.

³ Ma rofyor Yawan fa sibur ḇe rum sena kuker basbiser ido nari ono sisapi snar ono sra ker moḇ ḇeḇinkwan.”

⁴ Manfamyan ḇyesya skarem faro i ḇo soḇe: “Rariso ro moḇ ḇeḇeursḇa ine nari kofan si kuker mamami isof sarbor kam?”

⁵ Yesus ifuken faro si ḇo doḇe: “Mkosma mamami rifis?” Skarem ḇo soḇe: “Mamami rifik.”

⁶ Raimnai iwan kawasa ansya fa skain kame. Posa dun mamami rifik anna ma ḇye nadi kuker na ra posa pyanasnis na ḇo ḇyuk na faro manfamyan ḇyesya fa ssḇuk ḇerwas kawasa ansi.

⁷ Sisma kako in ono ma ssḇuk si faro Yesus fa ḇye nadi kuker si ra posa sirarwas si faro kawasa ansi.

⁸ Ma san kam isof sarbor. Posa siryur mamami ḇedawer na sisma inoken rifik nafo.

⁹ Kawasa ansya kam fanam syaran rifiak. Insape Yesus iwan si fa sibur.

¹⁰ Yesus dek fasau ro wai kuker manfamyan ḇyansya fa skoraḇe sup Dalmanuta.

Snon Farisi ono sor aḇyair 8:11-13

¹¹ Fafisu ya Farisi ono sra faro Yesus fa sifuken sye i. Mnuk ḇeḇe knam fakfuken sye ine faro Yesus, simarisen sor ro Yesus aḇyair oso ro nanki.

¹² Inja ro fafisu anya fiafayaf ro sneri ma ikofen ḇo doḇe: “Snaro syos ine mkor aḇyair? Yakofen wos ḇekaku faro mko, faro syos ine jadi fa mkosma aḇyairo ḇa.”

¹³ Posa Ibur si; dek ḇe wai anya wer ma sskobur ḇe danosen ya ḇar iwara.

Mnuk ḇekur roi ḇefrurpis kawasa Farisi ma roi ḇefrurpis Herodes 8:14-21

¹⁴ Ro fafisu anya Yesus manfamyan ḇyesya se pro ssun mamami faro nanan sena. Smam rosaser seja mamami oser baken monda ro wai ya.

¹⁵ Yesus ḇyuk swarapepen faro si ḇo doḇe: “Mkowaren ma mkepen mko roi yar roi ḇefrurpis kawasa Farisi ma roi ḇefrurpis Herodes.”

¹⁶ Inja skara ma sikofen yae faro si ḇo soḇe: “Dawos rarirya snar koḇe pro kokoḇes mamami faro ko.”

¹⁷ Rofyor Yesus ifawi rosai ḇeḇe knam sawos yae ro mankun si, ikofen faro si ḇo doḇe: “Snaro mkawos yae mko ro mnuk mamami ḇa? Inja mkofawi ḇaim kaker ke? Mkosnemna napakrek kaker?

¹⁸ Mkoḇe mkamor ḇape mkomam ḇa, mkoḇe knaram fama mko mnaf ḇa kaker?

¹⁹ Mkoswar epen fafisu yapanasnis mamami ririm faro snonkaku syaran ririm ya ḇake, mkoryur ḇedawer na inawen riḇeso skofo?” Skarem ḇo soḇe: “Inawen samfur seser risuru.”

²⁰ “Ma rofyor mamami rifik faro snonkaku syaran rifiak, ḇedawer na mkoryur inawen rifis?” Skarem ḇo soḇe: “Inawen rifik.”

²¹ Ma Yesus Ikofen faro si ḇo doḇe: “Inja mkofawi ḇaim kaker?”

Yesus ḇyuk pararei faro snon ḇepraf oso ro Betsaida 8:22-26

²² Ḇarpur Yesus kuker manfamyan Ḇyesya skorama ro Betsaida. Ro Betsaida kawasasya ssun snon ḇepraf oso faro Yesus ma sor faro Yesus insa pyan ro i.

²³ Yesus ikfin snon ḇepraf anya ḇo duni ḇe mnuya ḇondi. Surandi kwar Yesus daninef ro snon anya mkasi posa ryir ḇrasi ro snon anya ḇo ikofen ḇo doḇe: “Inja mam roino kwar ke?”

²⁴ Snon anya myam ḇe ḇarpon ma ikofen ḇo doḇe: “Yamam snonkaku sya simbran farma, ḇape sisnai imnis aiknam bembran farma.”

²⁵ Yesus ryir ḇrasi wer ro snon anya mkasi ma myam bos beri ma iprei isof myam ḇaḇir roi ḇeḇor na kam.

²⁶ Raimnai Yesus iwan i fa ibur ḇe rum ḇyedi ma ikofen ḇo doḇe: “Swun ḇe mnu ya awer!”

Ḇaḇekankarem Petrus 8:27-30

²⁷ Raimnai Yesus kuker manfamyan Ḇyesya skora wer ḇe mnu ḇefanam sup Kaisarea Filipi. Ro marandan anya Yesus ifuken manfamyan Ḇyesya ḇo doḇe: “Kawasa sya soḇe manseiso aya ine?”

²⁸ Skarem faroi ḇo soḇe: “Ono soḇe Yohanes Ḇemasi, ono wer soḇe: Elia, ono wer kako soḇe: oso ro fandu nabi-nabisya.”

²⁹ Yesus ifuken wer faro si ḇo doḇe: “Imboi mko ido rosai mkakkofen ro aya?” Inja Petrus kyarem ḇo doḇe: “Au ido Wairek!”

³⁰ Raimnai Yesus myun warek si insa sikofen ḇair awer faro mansei rya wer.

Yesus Ḇyaryas randak marindi ḇyena, ma nyan asuser faku faro ḇesoi 8:31–9:1

³¹ Raimnai Yesus fyarkor randak faro si, nari Rumkun Snonkaku ya isma marindi nabor ro ḇebarara sya ma mananir Imam ḇefawi nananem Refo Yahudisya simeweri ma smuni, ḇape nari diḇri ro ras ḇeḇe kiorya.

³² Marindi nari ḇekur i na ikofen bos na. Inja Petrus ismer Yesus ḇe ḇondi ma imsor I.

³³ Raimnai Yesus iknenef fa myam yoḇ manfamyan Ḇyesya ma Imsor Petrus i ḇo doḇe: “Ne, Biris wabur aya, kwara roi Allah Kyara na ḇa ḇoi kwara karkara snonkaku.”

³⁴ Raimnai Yesus dor kawasa ḇeḇor ansya ma manfamyan Ḇyesya ma ikofen faro si ḇo doḇe: “Snonkaku mansei ḇemarisen ḇeso aya iḇye kada ḇye pro mankundi ḇo ḇyar aprop ḇyedi ma duser aya.

³⁵ Snar mansei ḇeyoḇe ḇefaspar kankenem ḇyedi nari kankenem ḇyedi ryo buri; ḇoi mansei kankenem ḇyeja ryo bur i snar aya ma snar Ankankinem Ḇeḇye ya, nari isma kankenem ḇyedi.

³⁶ Fainda rosai snonkaku oso nya ḇesiper supswan ḇoi, kankenem ḇyeja ryo buri?

³⁷ Ma nari rosai isma fa ḇyuk farwe kankenem ḇyedi?

³⁸ Snar mansei ḇemai aya ma wos ayena ro fandu syos babo ḇesapurnak ma ḇesasar mko ine, Rumkun Snonkaku ya kako nari dakmai snas rofyor ifyafer kuker payamyum Kmari ḇyena ma malaikat ḇesren sya siyakeri muma ya.”