MARKUS 1 - ANKANKINEM ḆEḆYE RO FAFISU INE

Yohanes Ḇemasi 1:1-8

¹ Ine kada Ankankinem Ḇeḇye randak kaku ḇekur Yesus Kristus Rumkun Allah.

² Imnis fas-fas ḇero surat Nabi Yesaya, Manseren ikofen ḇo doḇe: “Mame, nari Yawan manfamyan Ayedi 'fa pyon Au, iso nari ḇefasos nyan ḇe Au;

³ mkarem snonkaku oso isya ḇye ruran ro sup ḇeursḇa: Fasos nyan ḇemkei ma ḇeaḇyoḇer faro Manseren.”

⁴ Rarirya Yohanes Ḇemasi rya ḇe sup ḇeursḇa fa ḇyaryas: “Mkombror ḇo mkosma masi sren insama Allah ipyos sasar mkoḇena.”

⁵ Inja kawasa ḇero sup Yudea ḇesiper ma ḇero Yerusalemsya kam srama ro i, ma skaram sasar sena ma sisma masasisren ro war Yordan.

⁶ Yohanes syatu ḇyena ro onta bur, ḇeḇoḇek ḇyedi ro aiwan kif ma anan ḇyena kampam ma umber sup.

⁷ Wos ikofen na ndok ra dine: “Ro ḇarpur ayedi ḇepok syadi aya nari isyama, yakunem fa yaper kaḇrai roḇesower-wesisya monda, yasyus ḇa.

⁸ Aya ma yamasi mko kuker war monda ḇape i, nari imasi mko kuker RurḆesren.”

Yesus Isma masasisren ro Yohanes 1:9-11

⁹ Ro fafisu ya Yesus ryaker Nazaret ro sup Galilea, ma Yohanes ḇyuk masasisren faro I ro war Yordan.

¹⁰ Rofyor isasyar bur war ya, Myam nanki ḇyas, ma Rurḇesren ya isaḇu ro i imnis manjawa.

¹¹ Ma mkarem oso ryok ro nanki mumfes, ḇo doḇe: “Au kada Rumkun saswar ayedi, faro Au yamarisen.”

Farawrowes ḇero sup ḇeursḇa 1:12-13

¹² Fyor o ḇa Rur ya fyarkin Yesus ḇe sup ḇeursḇa.

¹³ Ḇyarek ras samfur rifiak ro sup ḇeursḇa anya, ma biris ifrowes i. Ikenem ro fandu aiwan ḇeḇarḇor sya ma malaikatsya suf farmyan i.

Yesus rya ro sup Galilea 1:14-15

¹⁴ Sfor Yohanes raimnai Yesus rya ḇe Galilea ma Ḇyaryas Ankankinem Ḇeḇye ro Allah,

¹⁵ Doḇe: “Fafisu ya imnis kwar; Ḇaḇesasoser Allah fyanam kwar. Mkombror ma mkokyar faro Ankankinem Ḇeḇye ya.”

Yesus dor manfamyan ḇepon ḇyesi 1:16-20

¹⁶ Rofyor Yesus imbran ro yendisare ḇero danosen Galilea, myam Simon ma naekri Andreas. Suisya ssunap pam ro danosen ani snar mandaswan suirya.

¹⁷ Yesus ikofen faro su ḇo doḇe: “Ne, murama muso aya, ma nari Yana mu ḇe mandaswan snonkaku.”

¹⁸ Inja fyor ya beri subur pam suḇedi ma suso i.

¹⁹ Ma ro marandan ḇyani fyoro ḇa wer Yesus myam Yakobus, Sebedeus mandaḇendi, ma naekri Yohanes, suyanem pam ya ro wai ya dori.

²⁰ Yesus dor su beri ḇo subur sinan kma suḇe Sebedeus kuker snon ḇeyan ḇaḇyak ḇyesi, ma suso i.

Yesus ryo rum Ari ḇero Kapernaum 1:21-28

²¹ Skosun ro Kapernaum; ras Mananai Yahudi ya syeḇen mura, Yesus Syun beri ro rum Ari ya dori ma Ḇyuk farkarkor faro kawasa sya.

²² Kawasa sikandor rofyor simnaf farkarkor Ḇyena snar fyarkor si imnis snonkaku ḇena papoik; ḇo imnis kuker snon ḇefawi nananem Refo Yahudisya ḇa.

²³ Ro fafisu ani snon rur-ḇemaḇak sisawoḇer oso isya ro rum Ari ya dori. Snon ani dar naba ḇo doḇe:

²⁴ “Rosai waḇe wafrur kuker inko, Yesus snon Nazaret? Waḇe rwama fa mun inko kwar ya isoine ke? Yafawi au kwar: Ḇesaranden ḇeramuma ker Allah.”

²⁵ Ḇape Yesus Ḇye wef i ḇo doḇe: “Be fasis, wasasyar buri!”

²⁶ Rur-ḇemaḇak anya kyiker farma snon ani, posa dar naba ḇo isasyar buri.

²⁷ Kawasa ansya kame sikandor kaku, isof sifuken yae ro mankun si ḇo soḇe: “Rosaisoine? Farkarkor ḇebabo ke? Dawawos kuker papoik, ma rur-ḇemaḇak syano dawos epen si, ma siso user wos Ḇyena.”

²⁸ Fyorya abar ḇyedi ifrar yar sup Galilea ḇesiper.

Yesus ḇyuk pararei faro Petrus imbanyori ma ḇeduf ḇesesya 1:29-34

²⁹ Sisasyar ro rum Ari anya, Yesus kuker Yakobus ma Yohanes skora ḇe Simon ma Andreas rum suḇedi.

³⁰ Simon imbanyori ḇyis ḇo ḇyarek. Skokofen ḇadir beri dafduf ani faro Yesus.

³¹ Inja Yesus rya myam bin ani, i kin ḇrasi ma Ḇyausi. fyor ya beri ḇasḇis anya ibur i. Ma posa bin anine duf farmyan sko.

³² Ro mandira ya, rofyor ori syun kwar, sun snonkaku ḇeduf ma snonkaku rur-ḇemaḇak sisawoḇer sya kam faro Yesus.

³³ Inja kawasa ḇero mnuḇeba anya sya kame, siryur ro rum ya rawendi.

³⁴ Yesus ḇyuk pararei faro snonkaku ḇesma dafduf ḇeḇor ansi, ma rur-ḇemaḇak sya iyaw sibor kaku; imewer ḇyuk fa rur-ḇemaḇak ansya sawosri, snar sifawi I kwar.

Yesus ḇyuk farkarkor ro mnu-mnu ḇeba ḇesena 1:35-39

³⁵ Ḇyarḇir meser ro arwo prim ya, Yesus ikḇok ma isasyar ḇe moḇ ḇeḇeursḇa oso ma ḇye nadi ro diwa.

³⁶ Ḇape Simon kuker min ḇyesi siyaw user I.

³⁷ Rofyor sisrowi , sikofen ḇei ḇo soḇe: “Kawasa sya kame, ssewar au!”

³⁸ Inja Kyarem faro si ḇo doḇe: “Mkorama, kora ḇe moḇ ḇese, ḇe mnu-mnu ḇeba ḇefanam nane, insa Yakḇaryas Ankankinem Ḇeḇye ine kako ro diwa, snar si ḇeḇewar Yarama ya!”

³⁹ Ma Yesus rya ḇe sup Galilea ḇesiper, ma ḇyaryas Ankankinem Ḇeḇye anya ro rum Ari sena, ma iyaw rur-ḇemaḇak sya.

Yesus ḇyuk pararei faro snon ḇeduf pado oso 1:40-45

⁴⁰ Snon ḇeduf pado oso ryama faro Yesus i, ḇyan suba ro ḇarpon Ḇyedi ma dor fafnoḇek ro I ḇo doḇe: “Sye, Wamarisen ido Buk pararei ḇe aya!”

⁴¹ Yesus sneri iswar kufi, inja isawar ra pyan ro snon anya ma ikofen faro i ḇo doḇe: “Yamarisen. Waprei ro dafduf bedi!”

⁴² Rofyor ya beri dafduf pado anya isyof buri, ma iprei.

⁴³ Yesus iwan ifa ibur, ḇo danun pakrek faroi ḇo doḇe:

⁴⁴ “Waswarepen, wapok fa baḇdas awer parare bedine faro manseirya kaker, imboi rwa fasna mankundau faro imamsya, ma buk farsarser ḇekar parare ḇedi, imnis sasoser Musa ḇyani insa ḇye fasasnai-kaku faro si.”

⁴⁵ Ḇape snon anya ibur ma ḇyaḇdas parare ḇyanya ḇe moḇ-moḇ na kam, isof Yesus ipok fa syun fababa wer ro mnu ḇeba ani ḇa. Ḇyarek ro moḇ ḇeḇeursḇa na, ḇape kawasa siswek i ḇesya kwar beraker moḇ nakam.