LUKAS 9 - ANKANKINEM ḆEḆYE RO FAFISU INE

Yesus iwan manfamyan samfur seser risuru ḇyesi 9:1-6

¹ Inja Yesus dor manfamyan samfur seser risuru ḇyesi, raimnai ḇyuk samambraḇ ma papoik farosifa insa sipoik syadi rur ḇemaḇak ma ssḇuk pararei ro dafduf na.

² Ma iwansifa sḇaryas Ḇaḇesasoser Allah ma ssḇuk pararei faro snonkaku,

³ ikofen farosi: “Mkun awer roi ono ro mararan, mkun awer ankyon roḇa roi ḇeḇaryam, mamami roḇa pipi, roḇa sansun risuru.

⁴ Ma rofyor mkosun ro rum oso kwar, mkoḇeryar rodia isof mkosasyar ma mkombran pdef mararan mkoḇedi rodia.

⁵ Ma rofyor snonkaku simewer mko ido, mkosasyar ro mnu sedi ma mkokokef oref ḇero mnu ani bur mkowemna insa neswarapepen farosi.”

⁶ Raimnai sra simbran yar mnu nakam ḇo sḇaryas Ankankinem Ḇeḇye ma ssḇuk pararei faro snonkaku ḇeduf ro moḇ nakam.

Herodes ma Yesus 9:7-9

⁷ Herodes, wairek ro sup Galilea, imnaf roi ḇeḇor ḇeḇesya anna ḇyaḇir ḇyefesfyas, snar snonkaku ono sikofen, mboi Yohanes diḇri rofandu ḇemarsya kwar.

⁸ Ono sikofen wer, mboi Elia kyaḇer kwar, ma ono kako sikofen, mboi snon oso ro nabi-nabi ḇepon ansi ikḇawes kwar.

⁹ Ḇape Herodes ikofen ḇo doḇo: “Yohanes yaperemuk ḇukor ḇyedi kwar. Mboi manseiso ine, ḇyesno ifrur roi ḇeḇesya rarirya?” Raimnai ḇyesewar insa daksruw Yesus.

Yesus fyan snon syaran ririm 9:10-17

¹⁰ Rofyor wawan ansi skaḇer sfarfyar faro Yesus rosai sifrur kwar na. Raimnai Yesus dunsi ma sraḇe mnu oso ḇenirḇe Betsaida, isof semir monda fnoḇek Yesus.

¹¹ Ḇape kawasa ḇeḇor sifawi i, inja siso i. Ismasi ma dawawos farosi ro Ḇaḇesasoser Allah ma ḇyuk pararei faro kawasa ḇeḇefandun pararesya.

¹² Fafisu mandiraya manfamyan samfur seser risuru ḇyansi srama faroi ma sikofen ḇo soḇo: “Wawan kawasa ḇeḇor ansifa sibur, insa sraḇe mnu-mnu ḇefanam nane fa ssewar moḇ seryar ro ma roḇean, snar koisya ro moḇ ḇeḇeusḇa.”

¹³ Ḇape Yesus ikofen farosi: “Mkoiso nari ḇefansi!” Ḇape skarem ḇo soḇo: “Nkosma syadiḇa ro mamami ririm ma in risuru, ḇesyanja nkora nkokoḇes roḇean faro kawasa ḇeḇor sinekada.”

¹⁴ Snar indokada snon syaran ririm sisya ro diwa. Raimnai ikofen faro manfamyan ḇyesi: “Mkowansi fa skain ḇewuk-wukem, wukem oser indokada snon samfur ririm.”

¹⁵ Manfamyan ansi sifrur rarirya ma siwan kawasa ḇeḇor ansifa skain.

¹⁶ Ma Yesus dun mamami ririm ma in risuru ansuya kwar, iwakwaker ḇe nanki, ma ikofen kasumasa faro Allah, raimnai pyapef mamami ma in ansuya ma ḇyukna faro manfamyan ḇyesi insa sakḇerarwasna faro kawasa ḇeḇor ansi.

¹⁷ Ma sikam san isof sarbor. Ḇarpurya siryur mamami ker-ker ḇedawerna barborya inoken samfur seser risuru.

Ḇaḇekankarem Petrus 9:18-21

¹⁸ Ro rarwan oso rofyor Yesus demir ḇo ḇyenadi, manfamyan ḇyesi sra sfanami. Raimnai ifukensi: “Kawasa ḇeborsya soḇo, manseiso aya ine?”

¹⁹ Skarem ḇo soḇo: “Yohanes Ḇemasi, ono ḇese kako soḇo: Elia, ono ḇese wer soḇo, snon oso ro nabi-nabi ḇepon ansi ikḇawes kwar.”

²⁰ Yesus ifuken farosi: “Mboi mko ido mkokara manseiso aya?” Petrus kyarem ḇo doḇo: “Wairek ḇerama ro Allah.”

²¹ Raimnai Yesus idwarek kaku, insa sikofen ḇair awer roi ḇeḇesya ani faro manseirya kako.

Yesus ikofen ḇair ḇaḇekandera ḇepon ḇyedi ma nyan ḇaḇeasuser faroi 9:22-27

²² Ma Yesus ikofen: “Rumkun Snonkakuya nari ḇyekandera nabor ma ḇebarara-ḇebarara, mananir imam-imam ma ḇefawinananem Refo Yahudi, nari spampumi ma smuni ma ḇyeḇeḇawes ro ras ḇeḇekiorya.”

²³ Ikofen faro sikam: “Snonkaku oser-oser ḇemarisen ḇeso aya, ikada nari fyamyun mankundi, ma ḇyar aprop ḇyedi ro ras-ras ma iso aya.

²⁴ Snar mansei ḇemarisen ḇeḇriwarek kankenem ḇyedi, nari kankenem ḇyedi ryoburi; ḇape mansei kankenem ḇyedi ryoburi snar aya, ikada nari isma kankenem ḇyedi.

²⁵ Fainda rosai snon oso nya siper supswan ine, ma myun roḇa ḇyefromo mankundi ḇardi?

²⁶ Snar mansei ḇemai aya ma wos ayena, Rumkun Snonkakuya kako nari imai snon ani, rofyor ifyafer kuker papoik ḇyedi ma papoik Kmaya ma papoik malaikat-malaikat ḇesren sya.

²⁷ Yakofen faro mko: Kaku ḇeri rofandu snonkaku ḇerama mkoine nari ono simar ḇaim isof sakmam Ḇaḇesasoser Allah.”

Yesus isma payamyum ro bonya bori 9:28-36

²⁸ Indokada ras riwar ro farkarkor anna kwar, Yesus dun Petrus, Yohanes ma Yakobus, raimnai skek raryas ro bonya insa skoḇenadi.

²⁹ Rofyor Yesus ḇyenadi, ḇarpon ḇyedi syadwer ma sansun ḇyena napyoper karḇas.

³⁰ Ma kniko monda snon risuru suyawawos kuker Yesus, isoine Moses ma Elia.

³¹ Sufasna mankunsu ro sananai ro boiyaswa ma suyawawos kuker Yesus ro marmar ḇyedi nari fyoroḇa wer ḇyeimnis na ro Yerusalem.

³² Rofafisu ani Petrus ma min ḇyesi senef ma rofyor skokḇok ma skomam Yesus sanana ḇyedi: ma snon risuru suyores kuker Yesus.

³³ Ma rofyor snonkaku ansu suḇe subur Yesus, Petrus ikofen faro Yesus: “Guru, aski bos kaku koisya ro moḇ ine. Iḇye kada nkofrur aḇdares rikior, oso faro au, oso faro Moses ma oso faro Elia.” Ḇape Petrus ifawi roi ikofen naḇa.

³⁴ Rofafisu ikofen rarirya, mandep oso ryama ikawef sko. Ma rofyor skosun ro mandep ani, skomkak kaku.

³⁵ Ḇarpurya skomnaf mkaren ḇerok ro mandep ani ḇekofen: “Inekada Rumkun ayedi yakinfir kwar, mkomnaf i.”

³⁶ Rofyor mkaren ani imnai kwar, skomam Yesus demir dores. Ma manfamyan ansi sḇekankunes roi ḇeḇor smam anna, ma sfarfyar na faro manseiryawer ḇaḇeri ro fafisu ani.

Yesus ḇyuk pararei faro romawa rur ḇemaḇakya iswoḇerya 9:37-43a

³⁷ Ro mesrdi skodoro bon ani, snonkaku ḇeḇor semarani ḇo srama sisrow Yesus.

³⁸ Snon oso ro kawasa ḇeḇor ansi dor, ma ikofen ḇo doḇo: “Guru, wafnoḇek wakmam romawa ayedi, snar ikada romawa mandos ayedirya.

³⁹ Rofafisu rur ḇemaḇakya iswoḇeri, rurḇemaḇak ani ifruri fa fyararar ma ryadaudower isof sḇadon ḇyedi kyaḇaḇus. Rurḇemaḇak ani ḇyewayami pdef ma imewer isasyar burindi.

⁴⁰ Ma yor kwar faro manfamyan bansi insa siyaw rurḇemaḇak ani, ḇape sipokḇa.”

⁴¹ Inja Yesus ikofen: “Ne, mko syos ḇekyarḇa ma ḇeḇor, fafisu rosai nari yakainso mko ma yakḇaḇ mko? Wun romawa banya muma!”

⁴² Rofyor romawa ani fyanam Yesus, rurḇemaḇak ani ipyasi ro saprop ma kyakikeri. Ḇape Yesus ḇyewef rurḇemaḇak ani ma ḇyuk pararei faro romawa ani, ma kyaḇeri faro kmari.

^43a Kawasa ḇeḇor ansi sikandor snar smam Allah papoik ḇyedi iba kaku.

Yesus ikofen ḇadir ḇaḇekandera ḇeḇesuru ḇyedi wer 9:43b-45

^43b Fafisu kawasa ansikam sikandor kaker snar roi ḇeḇor ifrur anna, Yesus ikofen faro manfamyan ḇyesi:

⁴⁴ “Mkomnaf ma mkokara naḇye wos ayenane: Rumkun Snonkaku nari sḇoḇi faro papoik snonkaku.”

⁴⁵ Ḇape sifawi wos aniḇa, snar kankunes ḇyedi iyokef bursi, isof sifawi ḇa. Ma simkak sifuken kankunes ḇyedi faroi.

Mansei ḇeba syadi rofandu manfamyan ansi 9:46-48

⁴⁶ Rofandu Yesus manfamyan ḇyesi sfamfaḇri mansei rosi nari ḇeba syadiya.

⁴⁷ Ḇape Yesus ifawi kakara sena. Eḇedari dun romawa kasun oso ma iwanfa dores ro risḇyedi,

⁴⁸ ma ikofen farosi: “Mansei ḇefaduru romawa ine snar snonsnon ayedi, ikada fyaduru aya; ma mansei ḇefaduru aya, ikada fyaduru ḇewan ayanya. Snar ḇebaḇa syadi rofandu mkokam, iso ḇeba syadiya.”

Snonkaku ḇeyaw rurḇemaḇak kuker snonsnon Yesus 9:49-50

⁴⁹ Yohanes ikofen: “Guru, nkomam snon oso iyau rurḇemaḇak kuker snonsnon bedi, inja nkodwarek snon ani, ima dakso koḇa.”

⁵⁰ Yesus ikofen faroi: “Mkodwarek aweri, snar mansei ḇesampum mkoḇa, ikada isyaro mun mkoḇedi.”

Mnu oso ro Samaria simewer Yesus 9:51-56

⁵¹ Fafisu fyanam kwar fa Yesus ḇyeḇekano ḇe boiyaswa, kyara namuk fa ryaḇe Yerusalem.

⁵² Inja iwan wawan onofa sponi. Sra ssun ro mnu oso ro Samaria insa sfasos roi ḇeḇor ḇeḇefandun faro Yesus.

⁵³ Ḇape kawasa ro mnu ani simewer Yesus, snar marandan ḇyedi ryaḇe Yerusalem.

⁵⁴ Rofyor manfamyan ḇyansuya, isoine Yakobus ma Yohanes, sufawi roi ḇeḇesya ani, sukofen: “Manseren, wamarisen ido, nkor foro isabu ro nankifes myun kawasa sine?”

⁵⁵ Ḇape isiḇer ma isoneksi.

⁵⁶ Raimnai sraḇe mnu ḇesena.

Snonkaku ḇemarisen ḇeso Yesus 9:57-62

⁵⁷ Fafisu Yesus ma manfamyan ḇyesi simbran pdef marandan sedi, snon oso ikofen faro Yesus: “Nari yaso au, ḇemoḇ rosai waḇe rwayoḇna.”

⁵⁸ Yesus ikofen faroi: “Nafsup sisma der ma man sisma narem, ḇape Rumkun Snonkaku isma moḇofa ḇyarek roḇa.”

⁵⁹ Raimnai Yesus ikofen faro snon oso ḇese: “Waso aya!” Ḇape snon ani ikofen: “Wamarisen ido yarafa yakrir kamami resari.”

⁶⁰ Ḇape Yesus kyarem faroi: “Iḇye snonkaku ḇemar sikrir snonkaku ḇemar sesi; ḇape au, rwa ḇaryas Ḇaḇesasoser Allah ro moḇ-moḇ nakam.”

⁶¹ Ma snon oso ḇese dakkofen wer: “Yamarisen yaso au, Manseren, ḇape wamarisen ido yara yakofen aroo faro kina ayesi ḇepon resari.”

⁶² Ḇape Yesus ikofen faro snon ani: “Snonkaku ḇerandak ḇeḇebajak kwar, raimnai myamḇe dokor, isyusḇa fa ḇyekina ro Allah kawasa ḇyesi.”