LUKAS 7 - ANKANKINEM ḆEḆYE RO FAFISU INE

Yesus ḇyuk pararei faro mambri oso manfyan ḇyedi ro Kapernaum 7:1-10

¹ Rofyor Yesus dawawosra posa kwar ro ḇarpon snonkaku ḇeḇor ansi, ryasyun ro Kapernaum.

² Rodia, snon mambri Roma oso ro Kapernaum manfyan ḇyesi oso iduf marḇak ma fanam imar kwar isof iswari kaku.

³ Rofyor mambri ani imnaf Yesus, iwan ḇebarara Yahudi onofa sor Yesus, insa ryama ḇyuk pararei faro manfyan ḇyani.

⁴ Rofyor sisrow Yesus kwar, sor famfnoḇek ro Yesus ma sikofen: “Wafnoḇek snon ine,

⁵ snar ikada iswar er koḇesi ma iso ḇeḇawes rum ari nkoḇedi.”

⁶ Inja Yesus isosi ma srakam. Fafisu sfanam mambri ani rum ḇyedi, iwan bati ḇyesi onofa sikofen faro Yesus: “Tuan, bekandera awer snar aya ine yasyusḇa fa swun ro rum ayedi;

⁷ knam ine eḇedarfa mankundaya yaramufa ḇe auḇa. Ḇape wakofen monda wos oser, nari manfyan ayani iprei.

⁸ Snar ayaine ḇardi yaro baḇ, ma robaḇ ayedi kako sordade sisya. Rofyor yakofen faro sordade oso: Rwa, ma nari rya, ma faro oso wer: Rwama ma nari ryama, oroḇa ido faro manfyan ayedi: Wafrur roi ine ma nari ifruri.”

⁹ Rofyor Yesus imnaf wos ani, ikandori, ma iknenef faro snonkaku ḇeḇor ḇesoisya, ma ikofen: “Yakofen faro mko, rofandu kawasa Israel syakam, yasma kakyar ḇebayo rya dine ḇaim!”

¹⁰ Ma rofyor snonkaku iwan ansi skaḇer ḇe rum, sisma manfyan ani iprei kwar.

Yesus ḇyuk aḇiḇer faro romawa snonkbor oso ro Nain 7:11-17

¹¹ Ḇarpurya Yesus ryaḇe mnu oso ḇenirḇe Nain. Manfamyan ḇyesi sifnoḇek i, ma snonkaku ḇeḇor ono semarani bo saksoi.

¹² Rofyor fyanam kedwai ḇeba ro mnu ani, sḇar snonkaku ḇemar oso ḇo sisasyar ro mnuya, romawa snon, kabom oso romawa ḇyedi ma kawasa sibor ro mnu ani sakfnoḇek kabom ani.

¹³ Ma rofyor Manseren Yesus myam kabom ani, saswarya dek ro sne ḇyedi, ma ikofen faroi: “Kwanes awer!”

¹⁴ Raimnai fyanam waryar ani ma pyan roi, inja ḇeḇar waryar ansi sores, ma Yesus ikofen: “Ne, snonkbor yakofen faro aw, wiḇer aw!”

¹⁵ Ma snonkbor ani ikḇok ma kyain ma irandak dawawos, ma Yesus ḇyuki faro snari.

¹⁶ Snonkaku ansikam simkak ma sisandik Allah, ma sikofen: “Nabi ḇeba oso syaye rofandu koḇedi,” ma “Allah ryakaki kawasa ḇyesi.”

¹⁷ Rarirya Yesus ḇyeabar yar sup Yudea ḇesiper ma supya mnuk ani kam.

Yesus ma Yohanes ḇemasi 7:18-35

¹⁸ Rofyor Yohanes imnaf roi ḇeḇor anna kam ro manfamyan ḇyesi,

¹⁹ inja dor rofandusi snon risuru fa sufuken Manseren: “Inja aw nari ḇeramayake, roḇa nari nkowaf snonkakuyo ḇeseke?”

²⁰ Rofyor manfamyan ansuya sura faro Yesus kwar, sukofen: “Yohanes Ḇemasi iwan numa nufuken au: Inja aw nari ḇeramayake, roḇa nari nkowaf snonkakuyo ḇeseke?”

²¹ Rofyor ani Yesus ḇyuk pararei faro snonkaku sibor ro dafduf ma kandera sena kam ma iyaw rurḇemaḇak, ma ḇyuk mamam faro ḇepraf sya.

²² Ma Yesus kyarem faro su: “Mura ma mukofen faro Yohanes rosai mumam ma mumnaf: Snonkaku ḇepraf smam, snonkaku ḇepapipen simbran, snon ḇeduf pado seḇefasren, snon ḇepro simnaf, snon ḇemar sḇeḇeḇawes, ma snon ḇesaḇarar sisma Ankankinem Ḇeḇye.

²³ Ma aski faro snonkaku ḇefafayaf ma ḇepampum ayaḇa.”

²⁴ Yohanes wawan ḇyansuya sura kwar, Yesus irandak dawawos faro kawasa ḇeḇor ansi ro Yohanes: “Rosai ḇeḇewar mkora ḇe sup ḇeursḇa? Mkomam doker wamya iso ḇo ḇewai mura muma?

²⁵ Roḇaido fandun rosai mkoraya? Mkomam snonkaku ḇesansun sansun ḇepyumke? Snonkaku ḇesansun sansun ḇepyum ma ḇekenem manminsya, moḇ sena naisya ro rum wairek.

²⁶ Inja fandun rosai mkoraya? Mkomam nabike? Kuker kaku, yakofen faro mko, mboi isyadi ro nabi.

²⁷ Snar sfas ḇadiri kwar: Mam, yawan wawan ayedi fa pyon au, nari fyasos nyan bedi ro ḇarpon bedi.

²⁸ Yakofen faro mko: Rofandu snonkaku saḇensya, oso iba syadi Yohanes ḇa, mboi ḇebaḇa ro Ḇaḇesasoser Allah iso ḇeba syadi roi.”

²⁹ Kawasa ḇeḇor ḇemnaf wos ḇyena, ma ḇeyor som, ssḇuk kaku ro ḇaḇenapnapes Allah, snar Yohanes ḇyuk masi sren farosi kwar.

³⁰ Ḇape snon Farisi ma ḇefawinananem Refo Yahudi spampum Allah kakara ḇyena faro si, snar simewer Yohanes ḇyuk masi sren faro si.

³¹ Yesus ikofen: “Kuker rosai nari yaḇuk karai syos ine ma kuker rosai yaḇuk imnis si?

³² Snar simnis romawa ḇekain ro buḇes ma ḇeyor yae: Nkowuf sonker faro mko, ḇape mkomas ḇa, nkodisen dow-ḇarop, ḇape mkokanes ḇa.

³³ Snar Yohanes Ḇemasi ryama ma dan mamami ḇa ma dinem anggur ḇa, ma mkokofen: Rur ḇemaḇak isawoḇi.

³⁴ Ḇarpurya Rumkun Snonkaku ryama, danan ma dinem, mkokofen ḇo mkoḇo: Mkomam, ima snon oso ḇenambri ma ḇefarandinem, bati ro ḇeyor som ma snonkaku ḇesasar.

³⁵ Ḇape fawawi Allah ya snonkaku ḇesouser ssḇuk kaku roi.”

Bin ḇesasar oso ryem Yesus 7:36-50

³⁶ Snon Farisi oso dor Yesus fa ryama dakanan ro rum ḇyedi. Yesus ryama ro rum Farisi ani, ma kyain danan.

³⁷ Ro mnu ani bin oso isya sifawi kami ḇe bin ḇesasar. Rofyor bin ani imnaf Yesus isya danan ro rum Farisi ani, ryama ma dun parana sabarom ḇeser mani spum.

³⁸ Rofyor dores ro Yesus dokor ḇyedi fanam wemin ḇyesuya ma kyanes, ma ḇyan Yesus wemin ḇyesuya kuker mkaru ḇyena ma ipyos na kuker snonburyam ḇyena, raimnai isyum Yesus wemin ḇyesuya ma ryemi kuker mani spum ani.

³⁹ Rofyor snon Farisi ḇepos Yesus ani myam roi ḇeḇesya ani, ikofen ro sne ḇyedi: “Nabi riso ine kada nari ifawi, mansei ma bin sai ḇepan roi; nari ifawi bin ine bin ḇesasar rirya.”

⁴⁰ Inja Yesus ikofen faroi: “Simon, yamarisen yakofen roi oso faro aw.” Simon kyarem: “Guru, wakofen mura.”

⁴¹ “Snon risuru suḇenyaki pipi ro snon ḇeḇuk pipi oso. Snon ḇeponya ḇyenyaki dinar utin ririm, suminya samfur ririm.

⁴² Snar supok suḇak naḇa, inja ipyos nyaki suḇan na. Mansei rofandu su, nari ḇeswar syadi i?”

⁴³ Simon kyarem: “Yakara snon sipyos nyaki ḇeḇor ḇyenanya.” Yesus ikofen faroi: “Kaku ro kakara bedi.”

⁴⁴ Ma isiḇer faro bin ani ḇo ikofen faro Simon: “Mam bin ine? Yasun ro rum bedi, ḇesyaḇo buk waro ḇyan wemin ayesuya ḇa, ḇape imasi wemin ayesu kuker mkaru ma ipyos wemin ayesuya kuker snonburyam ḇyena.

⁴⁵ Wasyum ayaḇa, ḇape rofyor yasun isyum wemin ayesuya ḇesya kwar.

⁴⁶ Rwem bukor ayedi kuker maniḇa, ḇape ikada ryem wemin ayesuya kuker mani spum.

⁴⁷ Inja yakofen faro au: Sasar ḇeḇor ḇyena neḇepyos kwar, snar ifrur kwar saswar nabor kaku. Ḇape snonkaku ḇesma payasyos kermkun, ifrur saswar kermkun monda kako.”

⁴⁸ Raimnai ikofen faro bin ani: “Sasar bena neḇepyos kwar.”

⁴⁹ Ma ḇekain ḇeyananus Yesus ansya, skara ro sisnesna: “Manseiso ine, isof ipyos sasar na?”

⁵⁰ Ḇape Yesus ikofen faro bin ani: “Kayar bedi ḇyuk koreri faro au kwar, wabur kuker aski!”