LUKAS 5 - ANKANKINEM ḆEḆYE RO FAFISU INE

Mandaswan in sḇe mandaswan snonkaku 5:1-11

¹ Ro fafisu oso Yesus dores ro danosen andir Genesaret, ma kawasa sibor spanjuḇer i fa simnaf Allah wos ḇyena.

² Myam wai risuru ro danosen andir ani. Mandaswan sya sido kwar fa sḇan pam sena.

³ Dek ro wai oso isoine Simon wai ḇyedi, ma iwan fa sri wai ani ḇeḇanda knik ḇyinkwan bur danosen andirya. Raimnai kyain ro waya ma ḇyuk farkarkor faro kawasa ḇeḇor ansi.

⁴ Ḇyuk farkarkor posa kwar, ikofen faro Simon: “Mkoḇores ḇemoḇ ḇedok ma mkonap pam mkoḇena fa mkoḇukmun in.”

⁵ Simon kyarem, doḇo: “Guru, roḇ ḇesiper nkoraswan kwar ḇape nkosmai inoḇa ḇeri, ḇape snar wawanja, nari yanap pamya mura.”

⁶ Ma fyor skonap pamya posa, skomun in nai ḇebayo isof pam skoḇena namuk.

⁷ Inja skorar min skoḇesi ro wai ḇese ani insa srama sakfnoḇek sko. Ma srama sakfnoḇekḇo inkoser in ro wai ansuya rao fanam sumsar.

⁸ Ro fafisu Simon myam roi ḇeḇesya ani kyainwepur ma ḇyansuba ro Yesus ḇarpon ḇyedi, ḇo ikofen: “Manseren, wasusubur aya, snar ayaine snonkaku ḇesasar.”

⁹ Snar i ma snonkaku ḇefnoḇek sya sikandor snar in ḇeḇor skofor ansi;

¹⁰ rarirya kako Yakobus ma Yohanes Zebedeus mandaḇen ḇyansui ḇefnoḇek Simon. Yesus ikofen faro Simon: “Wamkak awer, randak ro knikine nari bemandaswan snonkaku.”

¹¹ Ma skosu wai skoḇena kwar, sskobur roi ḇeborna kam fa skoso Yesus.

Yesus ḇyuk pararei faro snon ḇeduf pado oso 5:12-16

¹² Ro fafisu oso Yesus isya ro mnu oso. Ro dia snon oso iduf dafduf pado. Ro fafisu myam Yesus, kyainwepur ḇo syom, ḇo doḇo: “Tuan, wamarisen kada nari fasren aya.”

¹³ Inja Yesus isawar ma pyan ro snon ani, ma ikofen: “Yamarisen insa wasren.” Ro fafisu aniḇeri dafduf pado ani iburi beri.

¹⁴ Yesus idwarek snon ani insa ḇyaryas awer pararei ḇyani faro manseiryawer ma ikofen: “Rwa, fasnai mankundaw faro imam ma buk farsarser ro pararei bedi, farsarser ḇeraris Moses syoser kwar ḇefasasnai faro si.”

¹⁵ Ḇape Yesus ḇyeḇeḇaryas ma ḇyesno ḇinkwan ma kawasa sibor semarani ma srayoḇ i, insa simnaf farkarkor ḇyena ma sisma pararei ro dafduf sena.

¹⁶ Ḇape Yesus isusu ḇemoḇ ḇeḇeusḇa fa ḇyenadi.

Yesus ḇyuk pararei faro snon ḇepapipen 5:17-26

¹⁷ Ro ras oso fafisu Yesus ḇyuk farkarkor, snon Farisi ma ḇefawinananem Refo Yahudi ono skain sakrower i. Srama ker mnu-mnu nakam ro Galilea ma Yudea ma ro Yerusalem. Manseren papoik ḇyedi ifnoḇek i, isof ḇyuk pararei faro ḇeduf si.

¹⁸ Kniko snonkaku ono sḇar snon ḇepapipen oso kuker waryar ḇyedi; ma sḇesewar fa ssun kuker i insa srir i ro ḇarpon Yesus.

¹⁹ Snar sisma nyan osoḇa fa sun kuker i snar kawasa sya sibor mankenem ro dia, inja skek kuker i ḇerumya bori, ma skoḇas osna, ma skokyu snon ani kuker waryar ḇyedi rofandu kawasa ansi imnis bos ro Yesus ḇarpon ḇyedi.

²⁰ Ro fafisu Yesus myam kakyar sena, ikofen: “Ne, naeko, sasar bena neḇeampun kwar.”

²¹ Ḇape ḇefawinananem Refo Yahudi ma snon Farisi skara ḇo soḇo: “Snonkaku mansei ḇeyonef Allah ine? Mansei nari ḇebuk ampun ro sasar imbude Allah derer?”

²² Ḇape Yesus ifawi swaruser sena, inja ikofen faro si: “Rosai mkokara ro mkosnemna?

²³ Rosai ḇepyan syadiya, yakofen: Sasar bena neḇeampun kwar, roḇaido yakofen: Wakḇok, ma wambran?

²⁴ Ḇape insa mkofawi, ro supswan ine Rumkun Snonkaku isma papoik fa ḇyuk ampun ro sasarna” – raimnai ikofen faro snon ḇepapipen ani –: “Yakofen faro au, wakḇok, wakanow waryar bedi ma waburḇe rum bedi!”

²⁵ Ma ro fafisu ani beri ikḇok, ro ḇarpon sedi, raimnai ikanow waryar ḇyedi ma iburḇe rum byedi ḇo sisandik Allah.

²⁶ Snonkaku ḇeḇor ansi sikandor, ma sisandik Allah, ma simkak kaku, ma sikofen: “Ras ine nkomam kwar roi ḇefrur kanandor ḇeba.”

Lewi snon ḇeyor som iso Yesus 5:27-32

²⁷ Ḇarpurya, ro fafisu Yesus isasyar, myam snon ḇeyor som oso, snori Lewi, isya kyain ro rum ḇeyor som. Yesus ikofen faroi: “Waso Aya!”

²⁸ Rarirya Lewi iyori beri fa ibur roi ḇeḇor nakam, ma iso Yesus.

²⁹ Ma Lewi ifrur munara ḇeba faro Yesus ro rum ḇyedi ma ḇeyor som sibor ma snonkaku ḇese sakanan fnoḇek i.

³⁰ Snon Farisi ma ḇefawinananem Refo Yahudi surem Yesus manfamyan ḇyesi, ḇo soḇo: “Snaro mkanan fnoḇek snonkaku ḇeyor som ma kawasa sasar?”

³¹ Rarirya Yesus kyarem faro si ma ikofen: “Snonkaku ḇeprei sya sefandun ḇena monsya ḇa, mboi ḇedof sya kada;

³² Yaramuma insa yor snonkaku ḇenapes sya ḇa, mboi snonkaku ḇesasar, insa simbror.”

Mnuk ḇekur farfor 5:33-39

³³ Snon Farisi ansi sikofen faro Yesus wer, ḇo soḇo: “Manfamyan Yohanes ḇyesi nabor sfarfor ma sḇenadi, rarirya kako manfamyan Farisi sya sesi, ḇape manfamyan besi kada sanan ma sinem.”

³⁴ Yesus kyarem faro si: “Inja snon manfakawin ya ḇati ḇyesi nari kowansi fa sfarfor, rofyor manfakawin ani isya kaker fnoḇek si?

³⁵ Mboi fafisuya nari ryama, rofyor manfakawinya ḇyeḇeyun bur si, ro fafisu ani kada insape sakḇe farfor.”

³⁶ Ikofen kako wos peper oso faro si: “Snonkaku osoḇa nari pyansawek kruḇen ker ro sansun ḇebabo fa ḇyuki syokop sansun wai oso. Rofyor rarirya ido, sansun ḇebabo ani nari imuk, rosai wer kuker kruḇen ḇesokop sun ro sansun ḇebabo ani nari imnisḇa kuker sansun ḇekwar ani.

³⁷ Rarirya kako snonkaku osoḇa fa nari iser swan ḇebabo ro kibonḇeḇerere, snar rofyor rarirya ido, swan ḇeḇabo ansi nari sisaipef kibon ḇeḇerere ani ma swan sya sisbawer ma kibon ani kako imbriwer.

³⁸ Inja swan ḇebabo sya ipyum syadi seḇeser ro kibon ḇebabo kako.

³⁹ Ma snonkaku osoḇa ḇeyinem sawawek swan ḇekwar kwar nari imarisen ḇa fa dinem swan ḇebabo, snar nari ikofen: Swan ḇekwarya kada ipyumkaku.”