LUKAS 4 - ANKANKINEM ḆEḆYE RO FAFISU INE

Fafrowes ro sup ḇeursḇa 4:1-13

¹ Yesus, ḇefo kuker Rur Ḇesren, kyaḇer ro war Yordan, raimnai Rur Ḇesrenya duniḇe sup ḇeḇeursḇa.

² Kyain ro dia ras samfur rifiak ma Ibirisya ifrowes i. Fyor kyain ro dia dan royoḇa ma posa ro ras samfur rifiak ibiser.

³ Inja Ibiris ikofen faroi: “Kaku au Rumkun Allah, ido wawan fa karui nane nemamami.”

⁴ Yesus kyarem faroi: “Fas-fas isya: Snonkaku sikenem kuker mamamiya dererḇa.”

⁵ Ḇarpurya Ibiris dun Yesus ḇemoḇ ḇekaki oso ma kniko monda fyasnai faro i ḇaḇesasoser-ḇaḇesasoser kam ro supswan ine.

⁶ Ibiris ikofen faro i: “Papoik ḇeḇor nakam kuker payamyum ḇyena nari yaḇuk na faro Au, snar nakam neḇeḇuk kwar maro aya ma yakḇuk na faro manseirya wer yamarisen sya.

⁷ Inja rofyor bansuba ḇeaya, nakam nari nwana.”

⁸ Ḇape Yesus ikofen faroi: “Fas-fas isya ryok: Aukada bansuba faro Manseren, Allah bedi, ma Demir monda iso wanadi faroi!”

⁹ Ḇarpurya wer dun Yesusbe Yerusalem ma ryir i ro Allah Rum ḇyedi bunemya, ma ikofen faro i: “Kaku au Rumkun Allah ido, wasawen mankundaw,

¹⁰ snar fas-fas isya: Ḇekur au, ikada nari ḇyuk sasoser faro malaikat-malaikat ḇyesi fa skansin

¹¹ ma siser Au insa wemsi kyarkar awer ro karui.”

¹² Yesus kyarem ma ikofen: “Wos isya: Wafrowes Manseren, Allah bedi awer!”

¹³ Ibiris fafrowes ḇyena posa kwar isusu bur i ma iwaf fafisu ḇepyum faroi.

Yesus kyaḇer ḇe Galilea 4:14-15

¹⁴ Kuker papoik Rurya Yesus kyaḇerḇe Galilea. Ma ḇyesno ro sup ani ḇesiper.

¹⁵ Ro fafisu ani ḇyuk farkarkor ro rum nadi ro dia ma snonkakusya kam sisandik i.

Nazaretsya siyaw Yesus 4:16-30

¹⁶ Ryama ro Nazaret moḇ sfaduru ma ibaroya, ma imnis rari ḇyedi ro ras Mananai Yahudi syun ḇerum nadi, raimnai iyori fa ḇyewasya Refo.

¹⁷ Ssḇuk faroi syap nabi Yesaya ma rofyor ḇyasi kwar, isma mnuk, ro moḇ sfas ḇo soḇo:

¹⁸ “Rur Manseren isya ryows aya, snar ikada ryem aya kwar, insa yaḇaryas Ankankinem Ḇeḇye faro snonkaku ḇesaḇarar; ma iwan aya kwar

¹⁹ fa yaḇaryas ḇaḇemkei faro snonkaku ḇeḇemanfyansya, ma mamam faro ḇeprafsya, ma ḇaḇemkei faro snonkaku sewayamsya insa yaḇaryas wampasi wambarek Manseren ḇaḇenaḇye ḇyena ḇerama kwar.”

²⁰ Raimnai isisen syap ani, ḇyuk kaḇeri faro ḇefararur, raimnai kyain; ma snonkaku sya kam ro rum nadi ani smamjoḇ i.

²¹ Raimnai irandak ḇyuk farkarkor faro si, ḇo ikofen: “Ro ras ine mnuk mkomnaf ine imnis.”

²² Ma snonkaku ansi kam ssḇuk kaku roi ma sikandor snar wos ḇepyum dawosna, inja sikofen: “Inenido Yusuf romawa ḇyaniryake?”

²³ Inja ikofen faro si: “Mboi nari mkokofen wos sarḇer ine maro aya: Ne, snon ḇena mon, buk pararei faro mankundaw. Wafrur kako ro dine, ro mankundaw mnu bedi, roi ḇeḇor nkomnaf wafrur kwar ro Kapernaum!”

²⁴ Ma ikofen wer: “Yakofen faro mko, kaku ḇeri nabi oso sesyowi i ro mnu ḇyedi ḇa.

²⁵ Ma yakofen faro mko, ma wos Ayenane nkaku: Ro fafisu Elia kosmai bin kabom sibor ro Israel rofyor nanki isisen ḇewampasi wambarek rikior ma paik ri wonem ma rofyor andoḇa ḇeba myun sup ani ḇesiper.

²⁶ Ḇape Elia ḇyeḇewan faro oso ro siḇa, mboi faro kabom oso ro Sarfat, ro sup Sidon.

²⁷ Ma ro awar Nabi Elisa ḇeduf pado sibor ro Israel ma oso ro si isma fasasren ḇaḇeri, mboi Naaman derer ro sup Siria.”

²⁸ Simnaf kam rarirya kawasa kam ḇero rum nadi ani simsorbos kaku.

²⁹ Siyorsi, raimnai sfori ḇo suni ḇemnuya ḇondiri ḇebon moḇ mnuya kyain roya, insa sisawen i ro fofen ani.

³⁰ Ḇape Yesus imbran uk ro fadu sedi ma ibur si.

Yesus syun ro rum nadi ro Kapernaum 4:31-37

³¹ Posa kwar Yesus ryaḇe Kapernaum, mnu oso ro Galilea, fa ḇyuk farkarkor ro dia ro ras-ras Mananai Yahudi.

³² Simnaf farkarkor ḇyena sikandor kaku, snar wos ḇyena nafo kuker papoik.

³³ Ro rum nadi ani snon rur ḇemaḇaksyower oso ma snon ani dar naba:

³⁴ “Ne, au Yesus snon Nazaret, rosai wafrur kuker inko? Rwama insa mun inko? Yafawi manseiso aw: au Saranden ro Allah.”

³⁵ Ḇape Yesus ḇyewefi, ḇo ikofen: “Befasis, wasasyarburi!” Ma rur ḇemaḇak ani ipyasbos snon ani ro fandu kawasa ḇeḇor ansi, raimnai isasyarbur snon ani ma ifrur dafdufi ḇaḇeri.

³⁶ Ma snonkakusya kam sikandor, ma sikofen yae faro si, ḇo soḇo: “Rosaisoine? Snar ifo kuker baba ma papoikya ma ḇyuk sasoser faro rur-rur ḇemaḇaksya fa sisasyar.”

³⁷ Ma snonsnon ḇyedi ḇyesno ḇemoḇ nakam ro supya fyor ani.

Yesus ḇyuk pararei faro Simon Petrus imbanyori ma snonkaku ḇesesya 4:38-41

³⁸ Posa isasyarbur rum nadi ani ma ryaḇe Simon rum ḇyedi. Ro fafisu ani Simon imbanyori isam fafayaḇa ma sor faro Yesus insa ifnoḇek i.

³⁹ Rarirya dores fanam bin ani, raimnai iyaw sam-sam ani, ma dafduf ani iburi. Bin ani ikḇok ḇeri ma duffarmyan si.

⁴⁰ Ro fafisu ori isyun, kawasa ansi sun ḇeduf sesi faro Yesus, ḇeduf dafduf ḇeḇor kam. Ma isawardofen si ma ḇyuk pararei faro si.

⁴¹ Ro snonkaku sibor kako rur ḇemaḇaksya sisasyarbur si ma sfararar, ḇo soḇo: “Rumkun Allah risaw.” Raimnai idwarek pakrek si ma imewerbos kaku sawawosri, snar sifawi ikada Wairek dirya.

Yesus ḇyuk farkarkor ro mnu-mnu ḇesena 4:42-44

⁴² Fafisu isnai kwar, Yesus imbran fa ryaḇe moḇ ḇeḇeusḇa oso. Ḇape kawasa ḇeḇor ansi ssewar I, ma sisrow I ma soḇo skarwarek i insa ibur awer si.

⁴³ Ḇape ikofen faro si: “Ro mnu-mnu ḇese kako yamarisen yaḇaryas Ankankinem Ḇeḇye ro Ḇaḇesasoser Allah snar i ḇeḇedari yaḇeḇewan muma.”

⁴⁴ Ma ḇyaryas Ankankinem Ḇeḇyeya ro rum nadina ro sup Yudea.