LUKAS 23 - ANKANKINEM ḆEḆYE RO FAFISU INE

Sun Yesus ḇe ḇarpon Pilatus 23:1-7

¹ Raimnai kina mankukeḇ ansi siyorsi fa sun Yesus ḇeḇarpon Pilatus.

² Ro dia sirandak ssḇuk safsof, ḇo soḇo: “Isna kwar maro nko, mboi snon ine fyarkor ninyan er nkoḇesi fa siḇor, ma myun warek nkoḇak som faro Kaisar, ma mankundi ḇardi ikofen ḇo doḇo, mboi ikada Kristus isoine Wairek.”

³ Pilatus ifuken faroi: “Aukada wairek kawasa Yahudike?” Yesus kyarem: “Iso mankundaw wakofenya.”

⁴ Pilatus ikofen faro mananir-mananir imamsya ma kawasa ḇeḇor ansya kam: “Yasma sasar oso ḇaḇeri ro snonkaku ine.”

⁵ Ḇape seyayu besya kwar, ḇo soḇo: “Fyarkor ninyan kawasa ḇeḇor kuker farkarkor ḇyena ro Yudea ḇesiper, ḇyerandak ro Galilea ma ryama kwar kako rodine.”

⁶ Rofyor Pilatus ryower rarirya ifuken, inja snon ine snon Galilea riryake?

⁷ Ma rofafisu Pilatus ifawi, mboi Yesus snonkaku ḇero sup mnuk Herodes, fyaremi fa suni ḇeḇarpon Herodes, snar ro fafisu ani isya kako ro Yerusalem.

Sun Yesus ḇe ḇarpon Herodes 23:8-12

⁸ Rofyor Herodes myam Yesus, Herodes iryaḇ kaku. Snar fyoro kwar imarisen dakmam Yesus, snar fyoro kwar imnaf roi ono ro Yesus, ma ikyar nari Yesus ifrur aḇyair kanandor oso fa dakmam.

⁹ Ḇyuk fakfuken nabor faro Yesus, ḇape Yesus kyarem royoḇaḇeri.

¹⁰ Rofafisu mananir-mananir imam ḇeḇeḇukorsya ma ḇefawinananem Refo Yahudi srarpon ma ssḇuk safsof ḇemarḇak faroi.

¹¹ Fafisu ani Herodes kuker sarar ḇyesi sefarfnak ma skoryayei, skosansuni kuker syatu nasan raimnai skofarem kaḇeri wer faro Pilatus.

¹² Ma ro ras ani beri, Herodes ma Pilatus, ḇeḇembroḇ ansuya suḇe bati wer.

Yesus kyaḇer ḇeḇarpon Pilatus 23:13-25

¹³ Raimnai Pilatus fyanjur mananir-mananir imamsya ma manfarkin-manfarkin fnoḇek kawasasya,

¹⁴ ma ikofen farosi: “Mkun snonkaku ine maro aya imnis snonkaku ḇefarkor ninyan kawasa. Mankun mkomam mboi yakukeḇi kwar, ma sasar rosai mkoḇuksof i na yasma ono roiḇa.

¹⁵ Ma Herodes ikako isma sasar oso roiḇa, inja fyarem kaḇeri maro nko. Kaku ḇeri ifrur sasar roḇa fa ḇemnis kuker samamyai marmari.

¹⁶ Inja nari yapreri raimnai yafaspari.” [

¹⁷ Snar ro ras munara Paskah, Pilatus fyaspar snonkaku besmai oso faro kawasasya.]

¹⁸ Ḇape sibras kam: “Ḇyeḇemun! Faspar Barabas maḇe nko!”

¹⁹ Barabas ine ḇyeḇesun ro bui snar skofrur mbriwer ḇeba ro mnu ḇebaya, ma snar myamun.

²⁰ Pilatus ikofen wer kuker mkaren ḇeba farosi, snar imarisen fa fyaspar Yesus.

²¹ Ḇape sibras wer, ḇo soḇo: “Ḇyeḇepai ro aprop! Ḇyeḇepai ro aprop!”

²² Pilatus dawos wer ḇerarwan ḇeḇekiorya farosi: “Inja ḇarḇor rosai snonkaku ine ifrur kwarya? Yasma sasar oso roi ḇaḇeri, bemnis kuker samamyai marmari. Inja nari yapreri ma yafaspari.”

²³ Ḇape sibras naba ḇo sedafdifer ḇesya kwar insa ḇyeḇepai ro aprop ma papupesya sefainda.

²⁴ Pilatus iwai rasi. Raimnai dawos namuk insa fararyor sedi ḇyeḇeḇuk farosi.

²⁵ Ma fyaspar snonkaku ḇesun ro bui snar ḇefrur mbriwer mamun ani imnis raris fararyor sedi, mboi ḇyuk Yesus farosi fa sifrur faroi imnis marisen sedi.

Yesus sunira ḇyeḇepai ro aprop 23:26-32

²⁶ Rofyor Yesus ḇyeḇeyun ani, siserepen snon oso ḇenirḇe Simon ḇeraker Kireni, ḇeḇe ḇesun ḇe Yerusalem, srir apropya ro erda ḇyesuya, fa ḇyari ḇo iso Yesus.

²⁷ Kawasa sibor kaku siso Yesus; rofandu si binsya sibor skanesi.

²⁸ Yesus iknenef farosi ma ikofen: “Bin-bin Yerusalem mkoyane, mkokanes awer aya, mboi mkokanes ḇinkun mko, ma romawa mkoḇesi!

²⁹ Snar mkomame, nari fafisuya ryama ma sikofen: Aski faro bin ḇepansnasem sya ma ḇeyaḇen romawaḇa ma ḇeyaksasusḇa sya.

³⁰ Ma snonkakusya nari sikofen faro bon na; kwamsiser epen inko! ma faro bon na: Kwupoi inko!

³¹ Snar rofyor sifrur rarirya faro ai ḇepek, rosai wer kuker ai ḇemas?”

³² Ma sun kako snon ḇese risuru wer, isoine snon ḇarḇor fa susma samamyai marmar fnoḇek Yesus.

Yesus ḇyeḇepai 23:33-43

³³ Fafisu srakwar ro moḇ ḇenirḇe Ḇukorbei (Golgota), spai Yesus ro moḇ ani fnoḇek snon ḇarḇor risuru ansu, oso ro ḇar raku ḇyedi ma suminya ro ḇar rasar ḇyedi.

³⁴ Yesus ikofen: “O, Mami, buk ampun farosi, snar sifawi rosai sifrur ineḇa.” Ma skinsor fa sḇerarwas sansun ḇyena.

³⁵ Kawasa ḇeḇor ansi sores rodia ma smam nakam. Manfarkin-manfarkin sya skoryayei, ḇo soḇo: “Snonkaku ḇesesya fyasparsi, mboi knikine komampan fyaspar mankundiri, rofyor i Wairek ḇekaku Allah kyinfir kwar.”

³⁶ Rarirya kako sordade-sordadesya skoryayei, ssḇuk anggur ḇemnir faroi

³⁷ ma sikofen: “Yahudisya wairek sedi awido, faspar mankundaw!”

³⁸ Sfas ro apropya pumya radine: “Ine Yahudisya wairek sedirya.”

³⁹ Snon ḇarḇor oso spai fnoḇek Yesus, dakonefi, doḇo: “Kristus iso awke? Rarirya ido faspar mankundaw ma nu kako!”

⁴⁰ Ḇape suminya isonek i, ḇo doḇo: “Inja wamkak faro Allah ḇake, mboi kokam kosma samamyai marmari?

⁴¹ Kukada kusma samamyai snar sasar kufrur na, ḇape snon ine dakfrur sasarḇa.”

⁴² Raimnai ikofen: “Yesus, nari waswarepen aya, rofyor wafyafer imnis wairek.”

⁴³ Yesus ikofen faroi, ḇo doḇo: “Yakofen kaku faro aw, kaku ḇeri ras ine nari awsya kuker aya ro Firdaus.”

Yesus imar 23:44-49

⁴⁴ Fafisu ro ras ani indokada oras samfur seser risuru orkok pandaf, ma pampanya ikawef supya fyor ani ḇesiper isof oras kior mandira,

⁴⁵ snar ori isnaiḇa. Ma kruḇen eruk Sim Ḇesren imsawekra ḇyesuru.

⁴⁶ Ma Yesus dor naba: “O, Mami, ro ḇramsu yarir rur ayedi.” Ma ikofen rarirya posa, insape imar.

⁴⁷ Rofyor mambri sararya myam roi ḇeḇesya anna, isandik Allah, doḇo: “Kaku, snon ine irya snon ḇenapes!”

⁴⁸ Ma posa kwar ro kawasa ḇeḇor ḇepanjuḇer rodia fa ḇeyakmami, smam rosai ḇeḇesya anna, sibur sfafko mankunsi.

⁴⁹ Snonkakusya kam ḇefawi Yesus fanam sya, ma kako bin-bin ḇesoi ker Galilea, sores ḇinkwan ma smam roi ḇeḇesya anna kam.

Yesus ḇyeḇekrir 23:50-56a

⁵⁰ Snon oso snonsnon ḇyedi Yusuf. Snon anine ḇyekina ro Kankain Karkara Ḇeba, kako snon ḇeḇye ma ḇenapes rirya.

⁵¹ Ḇyesne oserḇa kuker fararur Kankain Karkara sawos namukya. I snon Arimatea ro mnu Yahudi oso ma ikako dakwaf-waf Allah Ḇaḇesasoser ḇyedi.

⁵² Rya faro Pilatus ma dor Yesus baken ḇyedi.

⁵³ Ma isabu baken ani kwar pyankuni kuker kruḇen mansek (lenan), raimnai ikriri ro ureren spaikir ro urek karui, ro moḇ sikrir ḇemar osoro ḇaim.

⁵⁴ Ras ani ras jumaat, ras Mananai Yahudi fyanam kwar.

⁵⁵ Ma bin-bin ḇeso Yesus ro Galilea mumansya, sakso kako fa sakmam ureren ani fa sifawi moḇ rosai Yesus baken ḇyedi sikriri roya.

^56a Ma rofyor sibur kwar, sfasos kefi-kefi ma mani ḇespum.

Yesus aḇiḇer ḇyedi 23:56b–24:12

^56b Ma ras Mananai Yahudi sikam simnai snar sasoser Refo Yahudi,