LUKAS 2 - ANKANKINEM ḆEḆYE RO FAFISU INE

Yesus ḇyeḇeaḇen 2:1-7

¹ Rofyor ani Kaisar Agustus ḇyuk sasoser oso, ḇewan fa sfasepen snonkakusya kam ro supswan ine.

² Ine fas-fas sifrur randak kaku ro fafisu Kirenius ḇye gubernur ro mnu Siria.

³ Rarirya kawasa ansi kam sraḇe mnu marin sena oser-oser fa sfasepen si.

⁴ Rarirya kako Yusuf isasyar ro mnu Nazaret ro sup Galilea ḇesup Yudea, mnu Daud ḇenirḇe Betlehem, – snar ḇyeknam ro keret ma up Daud –

⁵ insa ḇyeḇefasepen kuker Maria, bin sḇukapsasori ma ḇemoḇesḇa ro fafisu ani.

⁶ Ro fafisu sura kwar ro diwa Maria ras ḇyena namnis fa kyain,

⁷ ma daḇen romawa snon oso, roma rak ḇyedi, posa ḇyeḇepankun kuker kruḇen kinak ma ḇyeifa ḇyarek ro sayer dombasya sananroya, snar skosma moḇo ḇa ro rum seryar roya.

Manfarandows 2:8-20

⁸ Ro supya fyor ani manfarandows ono sisya skain siwaren rofanfan sesi ro maper ro roḇ ani.

⁹ Knikoḇama Manseren malaikat ḇyesi oso fyanamsi ma Manseren sasnai ḇyedi isnaiyar si isof simkak kaku.

¹⁰ Raimnai malaikat ani ikofen farosi: “Mkomkak awer, snar kaku ḇeri yaḇaryas faro mko marisen ḇeba faro ersyakam:

¹¹ Ras ine Knam koreri ḇyeḇeaḇen kwar faro mko, isoine Kristus, Manseren, ro mnu Daud.

¹² Ma aḇyairya isoine faro mko: Nari mkosrow wombrek oso ḇyeḇepankun kuker kruḇen kinak ma ḇyarek ro sayer rofanfansya sanan roya.”

¹³ Ma knikoḇama smam fnoḇek malaikat ani, malaikat kankramo ro Boiyas sisandik Allahḇo soḇo:

¹⁴ “Sanandik faro Allah ro Boiyaswa, ro moḇ ḇekaki syadi! Ma askiro supswan, faro snonkaku ḇefrur sneprei Allahsya.”

¹⁵ Malaikat ansi sibur kwar ma skaḇerḇe boiyas, ḇefarandows ansi sikofen yae farosi: “Mkorama koraḇe Betlehemfa komam rosai ḇeḇesya kwar ro diwa, imnis raris rosai Manseren ikofen maroko.”

¹⁶ Rarirya srafasau kaku, ma sisrow Maria ma Yusuf ma wombrek ani ḇyarekro moḇ rofamfansya sanan roya.

¹⁷ Ma rofafisu smami, ma sikofen ḇadir rosai simnafkwarfa ḇekur wombrek ani.

¹⁸ Ma snonkaku ḇemnaf ansikam sikandor snar roiḇeḇor manfarandows ansi sikofen farosi anna.

¹⁹ Ḇape Maria ikram wos annaro sneri ma kyara asuserna.

²⁰ Rarirya manfarandows ansi sibur kaḇer, ma sisandik Allah snar roi ḇeborkam simnaf ma smam anna, nakam namnis raris rosai sikofen kwar farosi.

Yesus sofakfukḇyedi, ma ḇyeḇeḇuk faro Manseren – Simeon ma Hana 2:21-40

²¹ Ma rofafisu wombrek ani ḇye rasri war kwar, sifrur sofakuk ḇyedi, ma sniriḇe Yesus, imnis snonsnon malaikatya ikofen kwar, rofyor snari fyadoresi ḇaim.

²² Ma fafisu fasasrenya imnis kwar, raris sasoser Refo Yahudi Moses ḇyena, suniḇe Yerusalemfa ssḇuki faro Manseren,

²³ raris fas-fas ro Manseren sasoser ḇyena: “Romawa rakḇeḇe snonsyakam, nari sfasrensi faro Allah,”

²⁴ ma ssḇuk farsarser kako, imnis wos Manseren ikofenro asas ḇyedi, isoine waimon mandu oser roḇaido manjawa manduoser.

²⁵ Ro mnu Yerusalem, snon oso isya snori Simeon. I snonkaku ḇekyar faro Allah ma ḇenapes, ma ḇewaf Ḇeḇuk sneprei faro Israelsya.

²⁶ Rur Ḇesrenya isyaroi, ma isma fasasnaikwar ro Rur Ḇesrenya, mboi nari imarḇa rao isof dakmam Wairek, isoine i ḇesma ramrem kwar ro Manseren.

²⁷ Rur Ḇesrenya ḇyedifer i fa ryaḇe Allah Rum ḇyedi. Ro fafisu Yesus, Romawa ani, sinan ḇyesuya susun kuker i fa sifrur asuser faroi ro roi sikofen kwar ro sasoser Refo Yahudi,

²⁸ dun Romawa ani ma fyoraḇen i ḇo isandik Allah, ḇo doḇo:

²⁹ “Knikine, Manseren, iḇye manfamyan bedi imar mura kuker aski imnis raris wos bedi,

³⁰ snar yamam kwar koreri ḇeramuma ro Au,

³¹ koreri fasos kwar faro ersya kam,

³² isoine isnai ḇesnaiser faro er ḇese ma payamyum faro er besi, Israel.”

³³ Ma snari kuker kmari sukandor kaku snar roi ḇeḇor kam ikofen fa ḇekur i.

³⁴ Raimnai Simeon ḇyeḇok sko ma ikofen faro Maria, Romawa ani snari: “Kaku ḇeri Romawa ine ḇyebefasnai fa nari pyampum roḇa ḇyawes kawasa sibor ro Israel ma ḇyeaḇyair ḇefnai rakrakrok –

³⁵ ma nari fafardunya imnis sumber esar ḇekukkir snembri, – insa fyasnai ḇair kawasa ḇeḇor karkara sena.”

³⁶ Ro moḇ ani Hana isya kako, nabi bin oso Fanuel ḇindaḇendi ro keret Asyer. Ḇyeinsar kwar. Fyakawin kwar ma ikenem kuker swari ḇewampasi wambarek rifik,

³⁷ ma ro fafisuya ḇyekabom ma ikenem wampasi wambarek samfur riwar seser rifiak. Ma syun ḇesya kwar ro Allah Rum ḇyedi, roḇ meser ikyar faro Allah ma ḇyenadi ḇo fyarfor.

³⁸ Ma rofyor ani kako ryama ro dia ma ikofen kasumasa faro Allah ma dawawos ro Romawa ani faro snonkaku ḇeḇor ḇewaf ḇaḇefaspar faro Yerusalem.

³⁹ Rarirya seasuser roi ḇeḇor kam ḇekur Manseren sasoser ḇyena posa kwar sisiḇerḇe mnu sedi, isoine Nazaret ro Galilea.

⁴⁰ Romawa ani isur fasaw ma syambraḇ, ifo kuker fawawi nananem ma saswar fakamaman Allah naisya roi.

Yesus ḇyewampasi wambarek samfur seser risuru 2:41-52

⁴¹ Ro wampasi wambarek nakam Yesus sinan ḇyesu suraḇe Yerusalem ro ras munara Paskah.

⁴² Fafisu Yesus ḇyewampasi wambarek samfur seser risuru skoraḇe Yerusalem imnis raris rari sedi ro ras munara ani.

⁴³ Posa kwar ro ras-ras munara ani, fafisu sibur, Yesus kada kyain ro Yerusalem ḇoi sinan ḇyesuya sufawiḇa.

⁴⁴ Snar sukara ḇo suyoḇo iso maran ḇepon na, inja skombran ras ḇesiper oser, insape susewar i ro fandu naek ma min suḇesi.

⁴⁵ Snar susma iḇa, inja sukaḇerḇe Yerusalem fa susewar pdef i.

⁴⁶ Ro ras ḇeḇekiorya insape susrow i ro Allah Rum ḇyedi; isya kyain fandu guru-guru agama Yahudi ḇeḇuk farkarkorsya fa dakrower si ma ḇyuk fakfuken faro si.

⁴⁷ Ma snonkaku ḇeḇor ḇemnaf i sya kam sikandor kaku snar fawawi ḇyena ma kankarem ḇyukna kam.

⁴⁸ Ma rofyor sinan ḇyesuya sumam i, sukandor raimnai snari ikofen faroi, ḇo doḇo: “Romawa yedi, snaro wafrur rarirya faro nu? Aya ma kmami nusewar Aw kuker sne ḇekarsosen.”

⁴⁹ Kyarem faro su: “Snaro musewar Aya? Mufawiḇake, ayaisya ro Mami Rum ḇyedi dori?”

⁵⁰ Ḇape sufawiḇa rosaiso ikofen faro su.

⁵¹ Raimnai ibur fnoḇek su ḇe Nazaret; ma iso user fadaduru suḇena. Snari kada ikram roi ḇeḇor anna kam ro sne ḇyedi.

⁵² Ma Yesus imakma iba fasaw ma ifawi nanemkaku, inja Allah ma snonkaku sya siswar I.