LUKAS 17 - ANKANKINEM ḆEḆYE RO FAFISU INE

Roi ḇefnai fa snonkakusya sifrur sasar 17:1-6

¹ Yesus ikofen faro manfamyan ḇyesi: “Farkarkor ninyan naisya, ḇape kandera faro snonkaku ḇefrur rariryasya.

² Iḇye syadi snonkaku ḇerariryasya kofes karui ḇeyas-yas ro sisasusna, ma komsawer si ro soren, imbude sfarkor ninyan ono rofandu snonkaku ḇepokḇa sinendi.

³ Mkosasor mankun mko! Rofyor naek bedi ḇyesasar, wasoneki ma rofyor imbror kwar, buk maf faroi.

⁴ Mboi rofyor ḇyesasar ḇe rarwan rifik ro ras oser faro aw ma rarwan rifik kyaḇer faro aw ma ikofen: Yambror kwar, rarirya buk ampun faroi.”

⁵ Inja wawan ansi sikofen faro Manseren: “Manseren, buk sambraḇ maḇe nko ro kakyarya!”

⁶ Manseren kyarem: “Rofyor mkona kakyar iba imnis sesawi mor, nari mkokofen faro ara knam ine: Kwapas ma wasur ro soren, ma nari byeyuser sasoser mkoḇena.”

Fararur ro manfyan 17:7-10

⁷ “Mansei rofandu mko, ḇena manfamyan oso fa kyaker, roḇa ḇyemanfarandows rofanfan, nari ikofen faroi, rofyor manfamyan ḇyani ibur ker yaf ḇyedi: Rwama fasaw fa wanan!

⁸ Nari roḇa! Imboi nari ikofen faro manfamyan ani: Fes sifer ḇedi ma wuf faryan aya, isof yanan ma yinem ḇepon resari. Posa kwar insape wakanan ma wakinem.

⁹ Nari ikofen kasumasake faro manfyan ani snar ḇyeyuser roi ḇeḇor ḇyuk fa ifrur kwar anna?

¹⁰ Rarirya kako mko. Rofyor mkofrur roi ḇeḇor sefa mkofrur anna kam kwar, iḇye mkokofen: Nko ine manfyan ḇeḇe faindaba; ma nkofrur monda rosai nari nkofrur na.”

Snon pado samfur 17:11-19

¹¹ Ro Yesus mararan ḇyedi ḇe Yerusalem, imbrasye yawek ḇeyawas Samaria ma Galilea.

¹² Fafisu syun ro mnu oso, snon pado samfur srama sisrowi. Sores ḇinkwan

¹³ ma siyiw: “Yesus, Guru, waswar inko!”

¹⁴ Rofyor Yesus myamsi, ma ikofen: “Mkora mkofasna mko faro imam.” Ma fafisu sisya kaker ro nyanya faduri, smam sisren ro dafduf sena.

¹⁵ Inja oso rofandusi myam iprei kwar, kyaḇer ma isandik Allah kuker mkaren ḇeba,

¹⁶ raimnai kyain wepur ro ḇarpon Yesus ma ikofen kasumasa faroi. Snon ani snon Samaria rirya.

¹⁷ Ḇarpurya Yesus ikofen: “Insaja snon samfur iso ḇesma parareya? Moḇ rosai snon risiw sisya roya?

¹⁸ Snaro snon mandaman ine monda kyaḇer ikofen kasumasa faro Allah?”

¹⁹ Raimnai Yesus ikofen faro snon ani: “Wores ma wabur. Snar kakyar bedi ḇyuk aski faro aw kwar.”

Rarama ro Allah Ḇaḇesasoser ḇyedi 17:20-37

²⁰ Farisi ono sifuken faro Yesus, fafisu rosai Allah Ḇaḇesasoser ḇyedi nari ryamaya, Yesus kyarem, ma ikofen: “Allah Ḇaḇesasoser ḇyedi ryama kuker aḇyair ro snonkakuḇa,

²¹ isof snonkaku sikofen, ‘Mkorama mkomam, isoine!’ roḇa, ‘isya rodiwa!’ Snar kaku ḇeri Allah Ḇaḇesasoser ḇyedi isya rofandu mko.”

²² Posa kwar Yesus ikofen faro manfamyan ḇyesi: “Nari fafisuya ryama, mkomarisen mkomam ras oso rofandu ras Rumkun Snonkakuya ḇyena, ḇape nari mkomam iba.

²³ Ma nari snonkakusya sikofen faro mko: ‘Mkomam, isya rodiwa!’ roḇa, ‘Mkomam, isya rodine!’ Ḇape mkoramura awer, ma mkoso awer.

²⁴ Snar imnis raris arḇeḇer, isamar ro madepya pember ine ḇe mandepya pember iwara, rarirya kuker ras raramuma ro Rumkun Snonkakuya ḇyedi.

²⁵ Ḇape nari isma kandera nabor ḇepon resari ma nari syos ine simeweri.

²⁶ Ro ras imnis raris roi ḇeḇesya ro awar ḇepon ro Nuh, rarirya kuker roi ḇeḇesya ro ras Rumkun Snonkakuya.

²⁷ Nari sanan ma sinem, sfakawin ma siwafwofer, isof ras Nuh syun ro jawasiya, raimnai faḇruḇya ryama myunsi rao siḇro.

²⁸ Rarirya kako kuker roi ḇeḇesya ro awar Lot: sanan ma sinem, sḇaḇoḇ ma skaḇkoḇes, skaker ma sḇaḇawes.

²⁹ Ḇape ro ras Lot isasyarbur Sodom, mekem for ma mekem karui for ḇesabu ker nankiya myun presi.

³⁰ Rarirya kako kuker roi ḇeḇesya ro ras Rumkun Snonkakuya fyasna mankundia.

³¹ Ro ras ani mansei isya ro rumya bori, ma roi ḇeḇor ḇyena naisya ro rumya dori, dado fa dun naba. Rarirya kuker snonkaku ḇekaker ro yaf, kyaḇer faro rum ḇyediḇa.

³² Mkoswarepen Lot swari!

³³ Mansei ḇeḇesewar ḇemyof kenem ḇyedi, nari kenem ḇyedi ryoburi. Mboi mansei kenem ḇyedi ryoburi, ikada nari isma aski.

³⁴ Yakofen faro mko: Ro roḇ ani snon risuru suyenef kam ro kamboi anenef oser, nari sun oser ma sibur suminya.

³⁵ Bin risuru suisya suso pokem, nari sun oser ma sibur suminya.” [

³⁶ Ma rofyor snon risuru suisya ro yaf, nari sun oser ma sibur suminya.]

³⁷ Manfamyan ansi sifuken faro Yesus: “Moḇ rosai nari ndarirya, Manseren?” Yesus kyarem farosi: “Ro moḇ rosai aipyokem sisya, rodiwa manwawasya spanjuḇer kako.”