LUKAS 14 - ANKANKINEM ḆEḆYE RO FAFISU INE

Yesus ḇyuk pararei faro snon ḇeduf oso 14:1-6

¹ Ro ras Mananai Yahudi oso, Yesus rya fa dakanan ro rum manfarkin kawasa Farisi oso rodia. Inja snonkaku ḇerama rodiasyakam smamepen kaku Yesus.

² Kniko snon ḇeduf dafduf ḇefo oso ryama dores ro ḇarpon ḇyedi.

³ Riamnai Yesus ikofen faro snon ḇefawinananem Refo Yahudi ma snon Farisi ansi: “Ro ras Mananai Yahudi, fandun fa koḇuk pararei faro snonkaku ḇedufsyake, roḇa?”

⁴ Sikam sefasis. Raimnai iserepen snon ḇeduf ani ḇramin ḇyedi, ma ḇyuk pararei faroi ma iwani fa ibur.

⁵ Posa ikofen farosi: “Mansei rofandu mko, ḇena romawa, roḇa sapiyo fa isapi ro war ḇeyer oso ro ras Mananai Yahudi, ma nari isasyari ḇaḇeri ro ras ani?”

⁶ Ḇape snonkaku osero isampum ḇaḇeri.

Ḇaḇe marares 14:7-11

⁷ Snar Yesus myam snonkaku dakam ansi skinfir moḇ ḇepyum syadi, inja ikofen wos sarḇer ine farosi:

⁸ “Rofyor snonkaku oso pyos mko fa mkan munara fakawawin, mkokain awer ro mob ḇekaki, snar imbude snon ani dor snonkaku ḇeba syadi onori,

⁹ nari snon ḇeyor mko ani ryama ikofen faro mko: Mkoḇuk moḇ ine faro snon iwa. Nari kuker mamyai, mkora mkokain ro moḇ ḇekakiḇa syadi.

¹⁰ Ḇape rofyor sor mko, mkora mkokain ro ḇarpur kaku. Insa tuan ḇena rumya ryamaido ikofen faro mko: Bati, yor kuker syowi, insa rwamura kwain ro ḇarpon kaku iwa. Rariryaido, nari wasma ḇaḇesyowi ro ḇarpon snonkaku ḇeḇor sor ansi.

¹¹ Snar mansei ḇeyow mankundi ido, nari ḇyeḇerun, ma mansei ḇerun mankundi ido, nari ḇyeḇekanow fa ikaki.”

Sarḇer munara ḇeba 14:12-14

¹² Ma Yesus ikofen faro snon ḇeposi ani kako: “Rofyor wafrur munara ro isnake roḇke, pos awer bati ḇesi roḇa naek srar besi roḇa kina ḇesi roḇa min ḇefanam aw ma ḇenanasya, snar nari smunsu na faro aw, rofyor sakor aw wer.

¹³ Ḇape rofyor wafrur munara ido, pos snonkaku ḇesaḇarar, ma ḇeḇeroro, ḇepapipen ma snonkaku ḇeprafsya.

¹⁴ Nari wasma aski, snar snonkaku ansya sisma roi ono fa sḇukḇak frurpyum benaḇa. Snar nari wasma sasuref, ro ras aḇiḇer snonkaku ḇenapessya.”

Sarḇer ḇekur snonkaku ḇeyun sano 14:15-24

¹⁵ Simnaf Yesus wos ḇyena, snonkaku oso rofandu ḇenan ansya ikofen faro Yesus: “Aski faro mansei ḇeyananso Allah, rofyor Ḇaḇesasoser ḇyedi ryamaya.”

¹⁶ Ḇape Yesus ikofen faro snon ani: “Snonkaku oso isya ifrur munara ḇeba, ma pyos snonkaku sibor kaku.

¹⁷ Rofyor anan munara ani siḇe sraki, iwan manfamyan ḇyesi fa sikofen ḇadir faro snonkaku pyos ansi: ‘Mkoramuma, snar roi ḇeḇor nakam nfasos kwar.’

¹⁸ Ḇape sikam sun sano wareksi. Ḇeponya ikofen: ‘Yor maf snar insape yakoḇes babo saprop mnuk oso, ma yaḇe yara fa yamami.’

¹⁹ Suminya dakkofen: ‘Yor maf snar insape yakoḇes sapi mandu ririm ma skarsi kwar, inja yaḇe yara yamnasenpan si.’

²⁰ Minya wer kako ikofen: ‘Yor maf, snar insape yafakawin baḇo inja nari yarafa ḇa.’

²¹ Inja manfamyan ani kyaḇer ma ḇyuk nakam faro tuan ḇyani. Rarirya tuan ḇena rumya imsor ma ikofen: ‘Mkora fasaw ḇe sampak ma rumbines swaf na ma mkun snonkaku ḇesaḇarar ma ḇeḇeroro ma ḇeprafsya, ma snonkaku ḇepapipensya.

²² Posa manfamyan ansi sikofen ḇadir faroi: Tuan, rosai swoser kwar ani, nkofruri kwar. Ḇape rariryano moḇ naisya kaker.

²³ Raimnai tuan ani ikofen faro manfamyan ḇyesi: Mkoramura ḇe sampak ma nyan dayuk, ma mkoḇedifer snonkaku ḇero diansya fa saksun, snar yamarisen rum ayedi ifo.

²⁴ Snar yakofen faro mko: Osoḇaḇeri rofandu snonkaku yapos kwar ansi, nari sakkain ro munara ayedi.’ ”

Ḇeso Yesus srir roi ḇeḇor kam 14:25-35

²⁵ Rofyor ani kawasa sibor semarani ma siso Yesus ro marandan ḇyedi. Yesus isiḇer ma ikofen farosi:

²⁶ “Snonkaku oso iḇe iso aya ido, dayin kmari, snari, swari ma romawa ḇyesi, naek ma srar ḇyesi, ma kenem ḇyedi kako, insape nari ḇyemanfamyan maro aya.

²⁷ Mansei ḇeḇar aprop ḇyedi ḇo iso ayaḇa, nari ḇyemanfamyan maro ayaḇa.

²⁸ Snar rofandu mko oso iḇe ifrur kaderen ḇeḇesyos ido, nari dawof fasasos kumpan ḇefrur ḇaḇawes ani fa namniske, namnisḇaim?

²⁹ Snar ryir ararefya raimnai ifrur fararur ani fa iḇroḇa ido snonkaku ḇemam fararur ani, nari skoryayei,

³⁰ ma sikofen: Snonkaku ani ryak ḇaḇawes ani raimnai, syambraḇ fa ifrur posa iḇa.

³¹ Roḇa, wairek oso nya sordade syaran samfur ma iḇe ḇyembroḇ wairek ḇese ḇena sordade syaran samfur risuru ido, nari kyain fa kyara ḇepon resari ro samambraḇ ḇyedi, rofyor myamun kuker mbroḇ ḇyedi ḇaim?

³² Inja ifawi syambraḇ ḇarya, iwan wawan ono fa sor dasi, rofyor mbroḇ ḇyedi ḇyinkwan kaker.

³³ Rarirya kako kuker snonkaku oser-oser rofandu mko, ḇemewer ḇerir roi ḇeḇor ḇyenandi, nari ḇye manfyan maro ayaḇa.

³⁴ Karumasenya iḇye, ḇape karumasen ani ḇyuar ido, nari rosai koḇukfruri fa myasmasen werya?

³⁵ Nari sefanduni faro yaf werḇa, ma snai ḇe pupuk werḇa, mboi sisawen waworek monda si. Mkoḇe knaram ido mkorower!”