LUKAS 13 - ANKANKINEM ḆEḆYE RO FAFISU INE

Mkombror ḇaido nari mkoroë 13:1-5

¹ Rofyor snonkaku ono sfar faro Yesus ro snon Galilea, Pilatus myunsya rik sena fyawawas na kuker rik farsarser ssḇuki fyarser na.

² Yesus kyarem farosi: “Inja mkoḇo snon Galilea ḇemar sine sasar sena naba syadi snonkaku Galilea ḇesesya kamke, snar sisma roi ḇeradine na?

³ Roḇa! yakofen faro mko. Ḇape rofyor mkombrorḇa, nari mkokam mkoro kuker nyan ḇerarirya.

⁴ Roḇaido mkoḇo snonkaku samfur seser riwar kaderen syosya imbriwer fa myunbos ro Siloam ansi, sasar sena naba syadi ro sasar snonkaku ḇena mnu ro Yerusalem?

⁵ Yakofen faro mko. Roḇa! Ḇape rofyor mkombrorḇa, mkokam nari mkoro kuker nyan berarirya.”

Sarḇer ḇekur ara knam ḇeḇe bon ḇa 13:6-9

⁶ Raimnai Yesus ikofen sarḇer ine: “Snonkaku oso nya ara knam oser ro yaf anggur ḇyedi, ma rya syewar bon ro ara knam ani, ḇape isma bono ḇaḇeri.

⁷ Inja ikofen faro ḇefararur ro yaf anggur ani: Wampasi wambarek rikior kwar yarama yasewar bon ro ara knam ine ḇape yasma bonoḇa. Iḇye rwoḇen ara knam ani! Isur farfyos monda sapropya!

⁸ Snon ani kyarem: Tuan, yor fa kyain ro wampasi wambarek ine wer ari, nari yasofer saprop ro fuarya ma yarir fafen roi,

⁹ imbude wampasi wambarek iyama imaremri; mboi roḇaido, insape ḇyeḇeroḇen!”

Yesus ḇyuk pararei faro bin oso ro ras Mananai Yahudi 13:10-17

¹⁰ Rofyor Yesus ḇyuk farkarkor ro rum ari oso ro ras Mananai Yahudi.

¹¹ Rodia bin oso isya rur ḇemaḇakya iswoḇeri ḇewampasi wambarek samfur seser riwar kwar isof iduf rao dokor ḇyedi iyar ḇo dores aḇyoḇer werḇa.

¹² Fafisu Yesus myam bin ani, dori ma ikofen: “Ne awine waprei ro dafduf ḇedi.”

¹³ Raimnai pyan ro bin ani ḇukor ḇyedi ma fafisu ani beri bin ani dores aḇyobber, ma isandik Allah.

¹⁴ Ḇape mananir rum ari imsor snar Yesus ḇyuk pararei faro snonkaku ḇeduf ro ras Mananai Yahudi, ma ikofen faro snonkaku ḇeḇor ansi ḇo doḇo: “Ras riwonem naisya faro kofararur. Inja mkorama mkosewar pararei ro ras anna oso, mboi ro ras arina awer.”

¹⁵ Ḇape Yesus kyarem faroi ma ikofen: “Ne, snonkaku ḇeḇarḇor mkofawiḇake rofandu mko ono sisasyar sapi ma keledai sesi ro padwar sena ro ras Mananai Yahudi ma sunsi ḇemoḇ saninem war roya?

¹⁶ Mboi bin ine ibirisya pyarari ḇewampasi wambarek samfur seser riwar kwar ine, Abraham kpu ḇyedirya inja koperi ro ras Mananai Yahudi ḇake?”

¹⁷ Ma fyor ikofen rarirya, mbroḇ ḇyesikam simai ma kawasa ḇeḇor ansi simarisen snar smam roi ḇeba ifrur nane.

Sarḇer ḇekur sesawi mor ma mur 13:18-21

¹⁸ Raimnai Yesus ikofen: “Rosai yaḇuki syarḇer Allah Ḇaḇesasoser ḇyedi ma kuker rosai nari yaḇuki imnisya?

¹⁹ Imnis sesawi mor snon oso dun ma ḇyuḇer ro yaf ḇyedi; mor ani isur ma ḇyebaken ma man ro farsyos sifrur narem ro snaw ḇyena.”

²⁰ Ma ikofen wer: “Kuker rosai yaḇuki syarḇer Allah Ḇaḇesasoser ḇyedi?

²¹ Imnis mur bin oso dun fa ḇyuki irḇaren kuker terigu amek rikior isof namnir kam.”

Mansei nari ḇesma koreri 13:22-30

²² Rofyor oso Yesus imbran ḇe Yerusalem, dunuk ro mnu ḇe mnu ḇo ḇyuk farkarkor.

²³ Ma snonkaku oso ikofen faroi: “Manseren, snonkaku ḇesma korerisya sibor ḇake?”

²⁴ Yesus kyarem faro kawasa ansi: “Mkobesewar fa mkosun ro kedwai ḇefyosya! Snar yakofen faro mko: Snonkaku sibor sesewar fa siḇe ssun fama sismaḇa.

²⁵ Rofyor tuan ḇena rumya ikḇok ma kyen kedwaiya nari mkores ro ḇondi ma mkonuk kedwaiya ḇo mko kofen: Tuan, sweḇen kedwaiya maḇe inko! Ma nari kyarem ma ikofen faro mko: Yafawi moḇ mkoramuma royaḇa.

²⁶ Ma nari mko kofen: Nkoiso ḇeyan ma ḇeyinem kwar ro ḇarpon ḇedi ma aw ḇeḇuk farkarkor kwar ro nyan-nyan ro mnu nkoḇedi.

²⁷ Ḇape nari ikofen faro mko: Yafawi moḇ rosai mkoramuma royaḇa, mkobur ḇarpon ayedi mko snonkaku ḇeḇarḇor!

²⁸ Rodiwa nari mkosma kankanes ma arkfafais nakor, rofyor nari mkomam Abraham ma Isak ma Yakub ma nabisyakam ro Allah Ḇaḇesasoser ḇyedi, ḇape mko ḇardi sisawen mko bebandi.

²⁹ Ma nari snonkaku srama ker Wamurem, Wambarek, Wambrur ma Wambraw ma nari skain sanan ro Allah Ḇaḇesasoser ḇyedi.

³⁰ Ma kaku ḇeri snonkaku ḇepursya nari spon, ma snonkaku ḇeponsya nari spur.”

Yesus nari imar ro Yerusalem – Fafafko faro Yerusalem 13:31-35

³¹ Rofyor ani snon farisi ono sramura faro Yesus ma sikofen ḇo soḇo: “Snar Herodes iḇe myun aw inja rwa wabur moḇ ine.”

³² Yesus kyarem: “Mkora mko kofen faro makei sup ani: Yayaw setan, ma yaḇuk pararei faro snonkaku ro ras ine ma meser, ma ro ras ḇeḇekior nari yamnai ro fararur ayena.

³³ Ḇape ras ine ma meser yawer yambran pdef mararan ayedi, snar nabi oso nari ḇyeḇemun ro Yerusalem ḇandiriḇa.

³⁴ Yerusalem, Yerusalem aw ḇemun nabi-nabisya ma manwawan Allah iwansya swosi kuker karui! Rarwan ono yaswarkuf fa yaryur romawa mkoḇesi, imnis mankoko sinan ḇeryur mkun ḇyesi ro prer ḇyedi baḇsi, ḇape mkomewer.

³⁵ Kaku ḇeri rum bedi nari ḇyeḇebur ma ḇyeursḇa. Ḇape yakofen faro mko: Nari mkomam aya werḇa isof rofafisu mkokofen: Bok faroi ḇerama kuker snonsnon Manseren!”