LUKAS 1 - ANKANKINEM ḆEḆYE RO FAFISU INE

Wos ḇerak 1:1-4

¹ Teofilus ḇesmai syowi, Snonkaku sibor sḇesewar kwar fa sfasasuser ḇaryas oso ro roi ḇeḇor ḇeḇesya kwar ro fanduko.

² Imnis raris sḇaryas kwar maroko, ro randakya ro snonkaku ḇemam kuker mkamor ma ḇeyuffarmyan Wosya.

³ Eḇedari, yakukeḇ naḇye kaku roi ḇeḇesya anna kam kwar ro randak kakuya, rarirya yun karkara namuk fa yafrurna ḇesyap fa namnis faro au,

⁴ insa wafawi, roi ḇeḇor sḇukfarkor au na nkaku rarirya.

Ḇaryas ḇekur Yohanes Ḇemasi ḇye ḇeyaḇenya 1:5-25

⁵ Ro awar Herodes, koranu fiak ro sup Yudea, imam oso isya snori Zakharia ro rarwas imam-imam Abia. Swari kako ḇyeknam ro kpu Harun, snori Elisabet.

⁶ Imbeswa suine sukenem nasren, ro Allah ḇarpon ḇyedi ma sukenem kuker ḇaḇeuser sasoser nakam raris Manseren moḇ ḇyukraya ma suḇeyuk royoḇa.

⁷ Ḇape sukada suna romawaḇa, snar Elisabet pyansnasem ma suḇe insar mansar kwar.

⁸ Rofyor oso, ro fafisu rarwas skofararurya syuḇer Zakharia ifrur fararur ḇaḇeimam ro Manseren ḇarpon ḇyedi.

⁹ Snar fafisu skinsor, imnis rari sedi, insa kinsorya fyasnai imam ḇefararur ya, iso sfasnai fa ḇesun ro Rum Ḇesrenya ma ḇekun mamboḇo ro dia.

¹⁰ Ro fafisu ani kawasa ḇeḇor ansi sfanjur ro ḇuḇes ma senadi. Rofyor anikada fyor kankun mamboḇo.

¹¹ Zakharia myam Manseren malaikat ḇyesi oso dores ro ḇar raku rokef kankun mamboḇo.

¹² Myam roi ḇeḇesya ani ikandor ma imkak.

¹³ Ḇape malaikat ani ikofen faroi: “Ne, Zakharia, wamkak awer, snar nadi ḇena nasmai kankarem kwar ma swambri, Elisabet, nari daḇen romawa snon oso faro au ma nari nwir iḇe Yohanes.

¹⁴ Nari wamarisen ma waryaḇ, rarirya kawasa ḇeḇor nari sakmarisen snar ḇaḇeḇeyaḇen ḇyedi.

¹⁵ Snar nari iba ro Manseren ḇarpon ḇyedi ma nari dinem anggur roḇa aninem ḇeparek ḇa ma nari ifo kuker Rur Ḇesrenya randak ro snari sneuser ḇyena;

¹⁶ nari ikfin kawasa Israel sibor fa skaḇer faro Manseren, Allah sedi,

¹⁷ Ma nari imbran ḇepon Manseren kuker Rur ma papoik Elia fa dun kaḇer sinansya sisnesna faro romawa sesi ma snonkaku ḇeḇarḇor sisnesna faro karkara snonkaku ḇenapes ma rarirya fyasos sasrai ḇepyum oso faro Manseren.”

¹⁸ Raimnai Zakharia ikofen faro malaikat ani: “Rariso nari yafawi, roi ḇeḇor nane moḇ ndamumaraya? Snar yaḇe mansar kwar ma swayedi kako dakḇe insar kwar.”

¹⁹ Malaikat ani kyarem faroi: “Aya ine Gabriel ḇeyuf farmyan Allah ma Allah iwan aya kwar insa yawawos kuker au ma yun ankankinem ḇeḇye ine faro au.

²⁰ Kaku ḇeri snar wakyar wos ayenaḇa, nari ḇeawer ma wawosḇa isof ro ras rosai, roi ḇeḇor nane kam ndarirya.”

²¹ Rofyor ani kawasa ḇeḇor ansi siwaf Zakharia. Sikam sikmom, snar ḇyeuryar ro Rum Ḇesrenya dori.

²² Ro fafisu isasyar, iwawos kuker siḇa ma sifawi, mboi isya myam mamam oso ro Rum Ḇesren ani. Raimnai ḇyoi ḇramin ḇyedi farosi, snar ḇyeawer.

²³ Ro fafisu fararur ḇyedi imnai kwar, ibur ḇerum ḇyedi.

²⁴ Raimnai fyoroḇa swari Elisabet, imoḇesḇa paik ririm ma iyokef ḇinkundi, ḇo ikofen:

²⁵ “Inekada, fararur oso ro Manseren maḇeaya, ma knikine imarisen ipyos mamyai ayena ro ḇarpon snonkaku.”

Ḇaryas ro Ḇaḇe ḇeyaḇen Yesus 1:26-38

²⁶ Ro paik ḇeḇewonemya, Allah iwan malaikat Gabriel ifa ryaḇe mnu oso ro sup Galilea snoriso Nazaret,

²⁷ faro inkbor oso snoriso Maria; inkbor ani ssḇuki dapsasor snonkbor oso snoriso Yusuf, ro kina Daud;

²⁸ Rofyor malaikat ani syunro Maria rum ḇyedi, ikofen: “Aroo faro au, inkbor ḇesma fakamaman; Manseren ryous au.”

²⁹ Maria imnaf wos ani, ikandor ma kyara ro sneri, wos samsom ani knam ḇyedi moḇ ryaya.

³⁰ Malaikat ani ikofenwer faroi: “Ne, Maria, wamkak awer! Snar wasma saswar ma fakamaman ro Allah ḇarpon ḇyedi.

³¹ Kaku ḇeri, nari wamoḇesḇa, ma nari waḇen rumkun snon oso, ma nwiriḇe Yesus.

³² Nari romawa ani iba ma nari sapiḇe Rumkun Allah ḇekaki syadi. Ma Manseren Allah nari ḇyuk faroi, karapesa nasan Daud, kpu ḇyedi,

³³ ma nari ḇye wairek faro Yakub kpu ḇyesi, isof fyoro-fyoro, ma nasan ḇyedi ipok imnaiḇa.”

³⁴ Maria ikofen faro malaikat ani, “Roi wakofen ine nari ryamuma rariso, snar ayaine yafakawin ḇaim?”

³⁵ Malaikat ani kyarem: “Rur ḇesrenya nari isabu faro au, ma papoik Allah ḇekaki syadi nari kyadiren au, inja Rumkun waḇen ani sapiḇe Rumkun Allah ḇesren.

³⁶ Ma kaku ḇeri Elisabet, napirman bani soḇo ḇepasnanasem ani ma ḇeḇeinsar kwar, ikako imoḇesḇa kuker romawa snon oso, ḇye paikri wonem kwar.

³⁷ Snar Allah isma papoik ro roiḇeḇor nakam.”

³⁸ Maria ikofen: “Kaku ḇeri, ayaine Manseren infamyan ḇyedi; roi wakofen anna ndarirya mura.” Raimnai malaikat ani ipromes buri.

Maria ma Elisabet 1:39-45

³⁹ Fafisu ono nasyonde kwar, Maria imbranḇeri ḇebon, ipdefḇe mnu oso ro sup Yehuda.

⁴⁰ Fyor ryakwar ro mnu ani, syun ro Zakharia rum ḇyedi, ma ikofen aroo faro Elisabet.

⁴¹ Ma rofyor Elisabet imnaf Maria aroo ḇyena, romawa dores ani dapoper ro sneyuser ḇyena, ma Elisabet ifo kuker Rur Ḇesren.

⁴² Rarirya ibras naba: “Au ḇesmai ḇokro fandu binsyakam, ma sneuser bedi ismai ḇok kako.

⁴³ Manseiso ayaine, isof Manseren yedi snari ryakaki aya?

⁴⁴ Snar kaku ḇeri, rofyor yamnaf aroo bena, romawa ḇekain ro sneuser yedi iryaḇ ma dapoper.

⁴⁵ Ma aski faroi, snar rosai sikofen faroi ro Manseren snonsnon ḇyedi, ikyar nari ndarirya.”

Maria Dow Sanandik ḇyedi 1:46-56

⁴⁶ Raimnai Maria ikofen: “Ruryedi isandik Allah,

⁴⁷ ma sneri iryaḇ snar Allah, knam korer ayedi,

⁴⁸ snar myamepen kwar, ranrun snero manfamyan ḇyedi. Kaku ḇeri, randakro knikine er-er syakam nari sap ayaḇe bin ḇeḇe aski,

⁴⁹ Snar Allah Ḇepoik syadi, ifrur kwar fararur ḇebasyadi faro aya, ma snonsnon ḇyediso besren.

⁵⁰ Ma ḇaḇe naḇye ḇyedi kyonro syosḇe syos, faro snonkaku ḇemkak ḇeyararyofi.

⁵¹ Fyasnai papoik kuker ḇraurḇyena, ma dun ḇesisye snonkaku sneḇeḇemararessya;

⁵² Pyandun snonkaku ḇepoksyafa sisaburo karapesa nasan sena, ma ikanow snonkaku ḇerun snesya;

⁵³ Ḇyuk faro snonkaku ḇebisersya, roi ḇeborkam, kuker farsbawer, ma iwan snonkaku ḇenanasyafa sibur beidi.

⁵⁴ Ifnoḇek Israel, manfamyan ḇyedi, snar iswarepen ḇaḇenaḇye ḇyena,

⁵⁵ imnis ḇyeasas kwar faro up koḇesi, faro Abraham ma syos-syos ḇepur ḇyesi isof fyoro-fyoro.”

⁵⁶ Ma Maria ryows Elisabet indokada paik rikior, raimnai ibur wer ḇerum ḇyedi.

Yohanes Ḇemasi ḇye ḇeaḇen 1:57-66

⁵⁷ Ḇarpurya Elisabet rasḇyena namnis inja daḇen romawa snon oso.

⁵⁸ Rofyor snonkaku ḇero mnu ḇyedi ma naek srar ḇyesi simnaf, Manseren fyasnai ḇaḇenaḇye ḇyedi ḇeḇa kaku faroi, sikam simarisen kuker i.

⁵⁹ Ma ras ḇeḇewarya srama fa sifrur sofakfuk faro romawa ani ma simarisen sniriḇe Zakharia imnis kmari snonsnon ḇyedi,

⁶⁰ ḇape snari ikofen: “Roḇa, mkonir iḇe Yohanes.”

⁶¹ Sikofen faroi: “Oso ro fandu naek besi daknir rarirya ḇa.”

⁶² Raimnai spankai kmari fa sifuken snonsnon rosai imarisen ḇyuk faro romawa ḇyedi.

⁶³ Dor karu fas oso, raimnai fyas: “Snonsnon ḇyedi isoine Yohanes.” Ma sikam sikandor.

⁶⁴ Ma ro fafisu ani beri sḇari ḇyas ma ramar ḇyedi pyer wer, ma iwawos ḇo isandik Allah.

⁶⁵ Rarirya snonkaku ḇekain yar-yar i sya simkak kam, ma roi ḇeḇesya anna kam nefarfyar pampyam ro bran Yudea ḇesiper.

⁶⁶ Ma snonkakusya kam, ḇemnaf nasya skara na ma sikofen: “Nari rosai ḇeḇesya kuker romawa ine?” Snar Manseren ryous i.

Zakaria Dow Sanandik ḇyedi 1:67-80

⁶⁷ Ma Zakharia, romawa ani kmari, Rur ḇesrenya kyanosni ma ḇyardi ḇo doḇo:

⁶⁸ “Sanandik faro Manseren, Allah Israel, snar ryakaki er ḇyesi, ma dun fasaspar farosi.

⁶⁹ Ḇyuk aḇyair papoik oso kwar, ḇeḇuk koreri maḇeko, ro manfamyan ḇyedi Daud, kpu ḇyesi;

⁷⁰ – raris moḇ ikofenkwar ro awar madero, kuker sḇayoi nabi-nabi ḇesren ḇyesi –

⁷¹ insa fyaspar kobur mbroḇ koḇesi ma roḇramin snonkakukam ḇeyayin konsya,

⁷² fa fyasnai ḇaḇe naḇye ḇyena faro Up koḇesi ma swarapepen faro asas ḇesren ḇyena,

⁷³ isoine soar ikofen kwar faro Abraham, kpu ḇepon koḇedi mboi ḇyuk fakamaman maḇeko,

⁷⁴ insa kosma fasasparbur mbroḇ koḇesi ma kuker kakyar, koḇenadi faroi kuker makakakḇa,

⁷⁵ kuker saranden ma napnapes ro ḇarpon ḇyedi ro kankenem koḇena ḇesiper.

⁷⁶ Ma au, romawayedi, nari sap auḇe nabi Allah, Ḇekaki Syadi; snar auso nari ḇepon Manserenfa ḇefasos nyan faroi,

⁷⁷ insa ḇyuk fawawi faro kawasa ḇyesi mboi nari sismai korer ḇekakuya, rofyor Allah ipyos nyaki sasar sena kwar,

⁷⁸ snar ḇaḇenaḇye ma saswar ro Allah koḇedi, ma kuker nyan rosai ḇyuki ryakakiko, imnis ori ḇeyekro arwo,

⁷⁹ fa isnai kawasa ḇekainro pampan, ma kadaun marmarsya, fa ikfin kowesna faro nyan ḇeḇeaski.”

⁸⁰ Ma romawa ani isur ma iba ma rur ḇyedi syambraḇ. Ma ikenem ro sup ḇeursḇa isof ro ras fyasnai mankundi faro er Israel.