IBRANI 5 - ANKANKINEM ḆEḆYE RO FAFISU INE

¹ Snar imam ḇeba oser-oser, skinfir rofandu snonkaku, sikanow faḇeḇeḇru ḇeyuffarmyan Allah, fararur ḇyedi isoine ḇyuk farsarser faro Allah ro rosai ssḇuk fasna ḇesom snar sasar sena.

² Imam ḇeba ani mankundi syambraḇ ḇa ro roi nabor, rarirya ikḇaḇ snonkaku ḇefawi royoḇa ma ḇembran sasarsya,

³ mankundi syambraḇ ḇa kako, inja ḇyuk farsarser som snar sasar kawasa sena monda ḇa, ḇape faro mankundi kako.

⁴ snonkaku osoḇa kako dun ḇaḇesyowi ani faro mankundi ḇardi, ḇape Allah dori faro nasan ani imnis raris Harun.

⁵ MaKristus kako rarirya, ikanow mankundi ḇa faḇye Imam Ḇeba, Allah, mankundi ḇekanow i, Allah ikofen faro i: “Awkada Rumkun ayedi! Ro ras ine yaḇe Kma faro aw.”

⁶ Allah ikofen kako ro mnuk oso ḇese: “Awkada nari be Imam ro fyoro-fyoro, imnis raris rarwas imam Melkisedek.”

⁷ Rofyor Yesus ikenem imnis snonkaku, ḇyenadi kwar ma dor kuker kankanes faro Allah, ḇepok ḇefaspar i bur marmari, ma snar kyunem faro Allah inja Allah imnaf i.

⁸ Yesus ikada Rumkun Allah, ḇape isouser rosai isma kandera kukerya kwar,

⁹ ma isma payamyum ḇyedi kwar, ḇyeknam ro koreri ḇekain fyoro faro snonkaku ḇesouser i sya,

¹⁰ ma Allah fyasna i fabye Imam Ḇeba ro rarwas imnis imam Melkisedek.

Swarapepen 5:11–6:8

¹¹ Ro Yesus ḇaḇenasan ḇyedi imnis Imam Ḇeba, roi nabor nkoḇenkoḇaryas faro mko, ḇape nsamswen faneḇekofen snar nari mkofawi fasaw na ḇa.

¹² Fafisu mkoḇedi imnis kwar fa mkoḇe guru, ḇape mkofandun kaku snonkaku ono ḇese fasḇuk farkarkor ḇemko ro Allah fasasna ḇyena moḇ neknam raya ma nari mkosma roḇean ḇepnas ḇa mboi mkinem sus monda.

¹³ Snar mansei ḇeḇefandun ḇeyinem sus kaker, ḇyewombrek kaker, ifawi ḇaim roi ḇekaku ma roi ḇesasar na.

¹⁴ Roḇean ḇepnas kada faro ḇebasya, snar sima sifawi smambir kwar roi ḇeḇye ma roi ḇeḇarḇor.