FILIPI 1 - ANKANKINEM ḆEḆYE RO FAFISU INE

Aroo 1:1-2

¹ Syap ro Paulus ma Timotius, Yesus Kristus manfamyan ḇyesi, faro Allah kawasa ḇyesi kam ro Yesus Kristus ro Filipi, kuker manfarkin ma ḇeyuffarmyan (syamas) jemaat.

² Saswar-fakamaman ma aski-marisen ro Allah, Kma koḇedi, ma ro Manseren Yesus Kristus ryous mko kada.

Paulus inadi warek jemaat 1:3-11

³ Rofyor yaswarepen mko rofafisu ono yakofen kasumasa faro Allah yedi.

⁴ Ma rofyor yanadiwarek mko kam, yaḇenadi ḇesya kwar kuker sneḇemarisen.

⁵ Yakofen kasumasa faro Allah yedi snar ḇaḇeoser mkoḇedi ro ḇararyas Ankankinem Ḇeḇye ro ras randakya isof baboine.

⁶ Inja yakyar kuker sne ḇesiper, insa Allah, ḇerandak fararur ḇeḇye ine rofandu mko, nari ifnoḇek pdefi isof ro papupesya ro ras Yesus Kristus kyaḇer muma werya.

⁷ Mboi yakara rarirya kwar ro mko kam, snar yaswarepen mko ro sneri, snar mko kam mkosma rarwas ro saswar-fakamaman Allah ḇyuk ḇeaya, iḇye rofyor yasmai ro bui, iḇye kako rofyor yaḇesanowarek Ankankinem Ḇeḇyeya.

⁸ Snar Allah ḇyesaksi ḇeaya ro roi yakofen na kaku ḇeri yaswar mko kuker saswarkuf ro Yesus Kristus mankundi.

⁹ Ma yanadi radine, iḇyekada saswar mkoḇena nafo ro fawawi ḇenapes ma kakara ḇeḇor kam,

¹⁰ isof mkokinfir roi ḇeḇye kam, insa mkosren ma mkofarorewḇa famkowaf Kristus ras ḇyedi,

¹¹ ḇefo kuker bon napnapes Yesus Kristus ifrur kwar faro payamyum ma sanandik Allah.

Paulus ḇaḇesaksi ḇyedi ro bui 1:12-26

¹² Yamarisen, insa naek srar mkofawi, mboi roi ḇeradine kuker aya nane, nai ḇeḇewar fa Ankankinem Ḇeḇye iryer,

¹³ isof ḇekon ro istana (rum) Gubernur ma snonkaku ḇese ḇero diansya kam sakfawi yasmai ro bui snar Kristus.

¹⁴ Ma samamyai yedi eḇedari naek srar ḇena kakyar oser sibor sikyar syadi faro Manseren ma simsik ḇo siwawos ro Allah wos ḇyedi kuker makakak ḇa.

¹⁵ Snonkaku ono sisya sḇaryas Kristus snar masasor ma rakrakrok, ḇape ono kako sḇaryasi kuker kakara ḇeḇye.

¹⁶ Snonkaku sine kada sḇaryas Kristus kuker saswar, snar sifawi, mboi aya isya rodine fayaḇesanowarek Ankankinem Ḇeḇyeya,

¹⁷ ḇape ḇesesya snar ḇaḇefandun mankunsi sena ma kuker kakara ḇenapesḇa, skara ḇo soḇo kuker rarirya sifrur samamyai yedi famyarḇak ro bui.

¹⁸ Ḇape rariryano royoḇa, snar rariso wer kako, Kristus ḇyeḇeḇaryas, kuker kakara ḇesasar roḇaido kakara ḇeḇye. Roi ḇeradine yamarisen na. Ma nari yamarisen faswef,

¹⁹ snar yafawi, mboi ro roi ḇeḇor nane kam ḇarpurya isoine yasma aski snar nadi mkoḇena ma fafnoḇek ro Yesus Kristus Rur ḇyedi.

²⁰ Snar roi yaḇe ḇare ma yakyar kakuya isoine mboi ro roi ḇeḇor anna kam nari yamai ḇa, mboi raris fafisu nakam, rarirya baboine, Kristus isma syom snar aya, ro kankenem yedi, iḇye ro marmar yedi kako.

²¹ Snar kankenemya maḇe aya Kristus irya ma marmarya fainda rirya.

²² Ḇape rofyor nari yakenem ro supswan ine, irya fyasna ḇeaya yafararur fayaḇuk bon. Inja rosai nari yakimfirya, yafawi ḇa.

²³ Ḇar risuru suḇedifer aya: yamarisen yara yakain fnoḇek Kristus – ikada iḇye syadi kaku;

²⁴ ḇape fandun syadi yakain ro supswan ine snar mko.

²⁵ Ma ro kakyar ine yafawi: nari yakain ma nari yarowus mko kam wer, insa mkosamberen syadi ma nkoryaḇ snar kakyarya,

²⁶ isof masasik mkoḇena ro Yesus Kristus nasyadi wer snar aya, rofyor yakaḇer faro mko.

Ananun arores faswef ro fararur 1:27-30

²⁷ Iḇye syadi mkokenem namnis kuker Kristus Ankankinem Ḇeḇye ḇyedi insa rofyor yaramufa yamam, mboi rofyor yarafa ḇaido yamnaf, mboi mkores nako ro rur oser, ma mkoḇe sne oser ro fararur faro kakyar ḇerama ro ḇaryas Ankankinem Ḇeḇye,

²⁸ kuker makakak kermkuno ḇaḇeri faro mbroḇ mkoḇesi. Faro sikam irya aḇyair raroya, ḇape faro mko aḇyair ro askiya, ḇerama ro Allah.

²⁹ Snar faro mko mkosma fakamaman snar kakyar faro Kristus monda ḇa, mboi mkoḇekandera kukeri kako,

³⁰ ḇaḇesewar mkoḇedi imnis kuker rosai mkomam ro aya, ma baboine rosai mkomnaf ro aya.