FILEMON 1 - ANKANKINEM ḆEḆYE RO FAFISU INE

Aroo 1-3

¹ Ro Paulus, snon ḇesmai snar Yesus Kristus ma ro Timotius naek koḇedi, faro Filemon yaswar kaku, bati ḇefararur kayam

² ma faro Apfia, srar koḇedi ma faro Arkipus, bati ro fararur koḇedi ma faro jemaat ḇefananjur ro rum ḇyedi:

³ Saswar-fakamaman ma aski-ḇaḇenaḇye ro Allah, Kma koḇedi ma ro Manseren Yesus Kristus ryous mko kada!

Kafkofen kasumasa 4-7

⁴ Rofyor yabenadi, yap snonsnon bedi ma yakofen kasumasa faro Allah yedi.

⁵ Snar yamnaf saswar bedi faro Allah kawasa ḇyesi, ma kakyar ḇena faro Manseren Yesus.

⁶ Ma yanadi, insa ḇaḇeoser koḇedi ro kakyarya iso ḇefrur fawawi ḇeḇye rofandu ko faro Kristus.

⁷ Ro saswar bena yasma kwar marasrisen ḇeba ma samambraḇ, ma Allah kawasa ḇyesi sisma sneprei snar aw.

Paulus fararyor ḇyedi faro Filemon snar Onesimus 8-22

⁸ Snar rarirya naek ḇena kakyar oser eḇedari yaḇuk sasoser faro naek aw insa wafrur rosai nari wafrurna,

⁹ ḇape yaswarepen saswar ḇena, iḇye syadi yor faro aw. Aya, Paulus, yaḇemansar kwar, ma baboine kako yasmai ro bui snar Yesus Kristus,

¹⁰ inja yor ro aw snar romawa yedi Onesimus yasma kwar rofafisu aya isya ro bui

¹¹ – randakya ḇyefainda faro aw ḇa, ḇape baboine ḇyefainda kaku iḇye faro aw ma aya kako.

¹² Yawan kaḇer i faro aw – ikada sneuser yedi. –

¹³ Yaḇe yakarwarek kaku i rodine faisadwer aw insa duffarmyan aya rofyor yasmai ro bui snar Ankankinem Ḇeḇyeya,

¹⁴ ḇape rofyor wamarisen ḇaim, nari yafrur roi oso ro marisen ayedi ḇa, insa roi ḇeḇyena wafrur awerna kuker ḇaḇedafdifer mboi wafrurna kuker marisen.

¹⁵ Eḇedari Onesimus byinkwanbur aw resari, insape nwa i isof fyoro-fyoro,

¹⁶ imnis manfyan wer ḇa, mboi isyadi ro manfyan, isoine imnis naek koswar kaku, faro aya rarirya, rosai wer faro aw, iḇye faro snonkaku ma faro Manseren kako.

¹⁷ Rofyor kwara aya ḇemin bedi ḇena kakyar oser, nwa Onesimus imnis nwa aya.

¹⁸ Ma rofyor ifrur fromo faro aw roḇawer ḇyenyaki faro aw, buknama yaḇarna kam, –

¹⁹ aya, Paulus, yafaduru i kuker fasfas ro mankundaya: Nari yaḇakna – insa yakofen awer: “Aw ḇeḇarna kamya!” – snar ḇyenyaki maro aya, isoine mankundaw ḇardi.

²⁰ O, naek ayedi, befaindama ḇeaya kada snar Manseren: Buk sneprei maḇe aya snar Kristus!

²¹ Yafas mufaḇe aw, snar yakyar nari beuser wos ayena. Mboi yafawi nari wafrur syadi ro fararyor ayedine.

²² Rofyor ani fasos kako fabuk moḇ yaḇeryar ro, snar yakyar nadi ḇena nari yakaḇer faro aw.

Aroo ḇepupes 23-25

²³ Aroo faro aw ro Epafras, min ayedi ḇeyaksmai fnoḇek aya ro bui snar Yesus Kristus,

²⁴ ma ro Markus, Aristarkus, Demas ma Lukas, min ḇefararur kayam kuker aya.

²⁵ Saswar-fakamaman Manseren Yesus Kristus ryous rur mkoḇesi kada! Ro aya, Paulus