ZEPANYA 3 - BIBEL JAMITA NA DENGGAN

Hona uhum jana dipalua Jerusalem

¹ Marjaya ma si pangalo dohot si jurngit, ale kota na jotjot mamparkanciti, kota na jurngit na sai mangalo tu Tuhan dohot na mamisat halakna sandiri!

² Nada ra i manangihon jana nada ra manjagit sipaingot. Nada porsaya tu Tuhan jana nada ra mangido tolong tu Debata.

³ Songon singa na marngaur-ngaur do angka pamimpin ni kota i. Angka hakimna pe songon angka sorigala na malean do; santak do lahap ni halahi, sada holi-holi pe nada adong na tading tu ancogot ni halahi.

⁴ Nada adong idaon tanggung jawab ni angka panurirang ni halahi jana panghianat do halahi. Angka malim na manghodari na badia, jana mamparmayam-mayamkon tona.

⁵ Tapi na tigor do anggo Tuhan di tonga-tonga ni halahi, nada unjung dibaen Ia hakejamon, na so unjung dihalupahon di hatiha manyogot. Tapi halak na kejam nada mamboto hahaila.

⁶ “Ma pola bahat angka bangso na mago Hubaen; Huroncohon angka tugu ni halahi na gincat i, Husegoi dalanna lopus nada adong be pamolus, madung dipagariang kota ni halahi nada adong be pangisina.”

⁷ Ning rohangKu ma, “Anggo saonnari pasti pasangapan ni bangsongKi ma Au, jana tangihononna sandok sipaingotKu. Hapengani, mur tu jotjotna do halahi mambaen jahat martimbangkon na salpu.

⁸ Hara ni i painte ma Au – ninna Tuhan – di ari harorongKu jadi saksi. Harana haputusanKu i ma papunguhon angka bangso dohot harajaan anso Huusehon rimasKu na marapi purun, harana sude tano angkon abis dibaen api ni pangiburuonKu.

⁹ Tapi dung salpu i paubaonKu ma roha ni angka bangso-bangso i gabe martangiang tu Au sajo noma halahi, jana nada be tu angka debata na asing. Oloan ni angka bangso i noma Au.

¹⁰ Salang sian Kasdim na dao i pe marroan ma angka bangsongKu na marserak i jana haulkononna haul tu Au.

¹¹ Anggo di hatiha i, ale bangsongKu nada pola porlu be ila rohamunu hara ni na dung mangalo tu Au. UsironKu ma sanga ise halak siginjang roha dohot na gakgak, jana nada be sai mangalo hamu tu Au di dolokKu na badia i.

¹² PadiaronKu ma disi maringanan tongtong sada bangso na toruk roha, na ro tu Au mangido pangurupi. Tola ma halahi maringanan disi.

¹³ Halak Israel na malua i, nada mambaen jahat be sanga na tu ise pe; nada margabus be halahi jana nada paoto-otohon. Sonang ma halahi jana dame, jana nada mabiar sanga na tu ise pe.”

Ende hamogaan

¹⁴ Ale Israel, marsurak ma hamu jana marende! Ale Jerusalem, marmoga-moga ma hamu sian sandok ate-ate.

¹⁵ Angke madung mantak Tuhan manguhumi hamu; ma pola dipaorot Ia sude musumunu. Tuhan raja ni Israel maringanan di tonga-tongamunu; nada mabiar be ho maradopkon hasusaan.

¹⁶ Dokkonon ni halak ma di sada hatiha, ale Jerusalem; “Ulang ho mabiar, ale Sion ulang ma gale-gale tanganmi!

¹⁷ Diondihon Tuhan Debatamunu na gogo i do hamu. Hara ni gogo ni kuasoNia, monang hamu. Marmoga-moga Tuhan jana marjop ni roha hara ni hamu, di bagasan holong ni rohaNa dilehen Ia di hamu ngolu na imbaru. Hara ni hamu marende ma Ia jana marjop ni roha hara ni hamu,

¹⁸ songon halak na topet marpesta.” Didok Tuhan, “AngkatonKu ma hasusaan sian ho, jadi nada tanggungonmu be halayasan.

¹⁹ Ro do i hatihana ropukkononKu na mamisat hamu, jana halak na tengka paluaonKu; sude halak buangan mulak toguonKu. Muba habilean ni halahi gabe hasangapan; sanga di dia, disandok portibi, marmulia ma halahi jana dipuji.

²⁰ Ro do i hatihana, jana ro ne noma i, toguonKu ma mulak halakmu na marserak i. BaenonKu tarbonggal hamu di sandok portibi, jana Hupasuang hasonangonmu mangulahi.” Madung didok Tuhan songon i.