ZAKARIA 7 - BIBEL JAMITA NA DENGGAN

Digorahon Tuhan puaso na so ias

¹ Di tanggal opat bulan Kislew, i ma di bulan sambilan, taon paopatkon hatiha mamarenta Raja Darius, dilehen Tuhan ma tu au mangulahi parentaNia.

² Na dung diutus ni halak Betel do si Sareser dohot si Regem-Melekh dohot angka anak bua ni halahi tu Bagas ni Tuhan Na Markuaso laho palamamkon roha ni Tuhan.

³ Laing disuru do halahi marsapa tu angka malim dohot panurirang, songon on, “Angkon tangis dope he hami jana puaso ganop di bulan palimahon songon na dung hami dalankon martaon-taon honokna?”

⁴ Dung i ro ma parenta ni Tuhan Na Markuaso i tu au songon on,

⁵ “Palalu ma tu sude halak na maringanan di luat on dohot tu angka malim songon on: Dompak marpuaso hamu jana mangandungi di bulan palimahon dohot papituhon salolot na pitu pulu taon on, adong ma he sian situtu ni rohamunu marpuaso di Au?

⁶ Laing songon i muse muda mangan sanga minum hamu, nada he na mangan dohot minum tu hamu sandiri do?”

⁷ Nada he on ma hata ni Tuhan na nipalalu marhite angka panurirang na jolo, hatiha Jerusalem dohot angka kota na humaliangna diingani angka jolma di bagasan sonang, dohot tano Negeb jana dohot luat partoran laing di ingani?

Panggagaion mambaen tu habuangan

⁸ Dilehen Tuhan Na Markuaso i ma tu si Zakaria tona songon on,

⁹ “Songon on ma hata ni Tuhan Na Markuaso i, ‘Karejohon ma angka tona na tigor jana maribo ni roha dohot marroha na denggan maradopkon donganmunu jolma.

¹⁰ Ulang pisat hamu angka na mabalu, angka dakdanak na so marama so marina, angka halak na asing na maringanan di tonga-tongamunu, sanga na tu ise pe tehe na di bagasan hasusaan. Jana ulang baen hamu muse sangkap na jahat tu hamu sama hamu.’

¹¹ Tapi nada diantureskon halahi jana mangalo, jana dipaingol do pinggolna anso ulang marbinege.

¹² Dipapir halahi do rohana lopus songon pir ni batu intan, anso ulang dibege halahi tona i dohot hata na nitongos ni Tuhan Na Markuaso marhite sian tondiNa, dohot marhite sian panurirang na jolo i. Hara ni i ma umbahen na ro rimas ni Tuhan.

¹³ Nada Hualusi tangiang ni halahi, harana halahi pe antong nada ditangihon halahi taran mangkuling Au ninna Tuhan Na Markuaso.

¹⁴ Songon halingsungsung, Huombuskon halahi tu tonga-tonga ni angka bangso na so nitanda ni halahi. Dung i mamolngit ma tano i, nada adong be na manginganisa. Songon i ma tano na jeges i gabe mamolngit dibaen halahi.”