ZAKARIA 6 - BIBEL JAMITA NA DENGGAN

Parnidaan taringot tu opat kareta porang

¹ Huida ma parnidaan na asing. Anggo sanoli on, huida ma opat kareta porang na ruar sian antara ni dua dolok tumbaga.

² Kareta na parjolo ditarik kudo na rara, kareta paduahon ditarik kudo na lomlom,

³ na patoluhon kudo na bontar jana na paopatkon kudo sibolang.

⁴ Husapai ma tu surusuruan i, “Aha dehe tuan, astuan ni angka kareta porang i?”

⁵ Dialusi ia ma, “Halahi ma da na haruar tu opat jurusan ni alogo, dung sidung halahi mangadop tu Tuhan ni sude tano on.

⁶ Kehe ma kareta porang na nitarik ni kudo na lomlom i sabola tu Utara adop Babel. Kudo na bontar i kehe adop Hasundutan jana kudo sibolang i kehe adop Selatan.”

⁷ Di na haruar kudo sibolang i, songon na so sobar be idaon halahi laho kehe mandalani sude tano on. Didok surusuruan i ma, “Kehe ma ne hamu mandalani sude tano on!” Jadi kehe ma halahi.

⁸ Dung i pio-pio ma surusuruan i tu au, ning ia ma, “Kudo na kehe tu Babel i ma na giot paombun muruk ni Tuhan.”

Parenta laho papakehon tuku tu si Josua

⁹ Dilehen Tuhan ma tona on tu au.

¹⁰ Didok Ia ma, “Buat ma haul na nilehen ni si Heldai, si Tobia, dohot si Jedaya i, i ma angka halak na baru mulak sian habuangan na di Babel i. Oban ma manigor haul ni halahi i tu bagas ni si Josia anak ni si Zepanya.

¹¹ Baen ma sada tuku sian sere dohot perak na nihaulkon ni halahi i jana papakehon ma i tu ulu ni Malim Godang Josua anak ni si Josadak.

¹² Palalu tusia na Hudok, Au Tuhan Na Markuaso mandok tusia, ‘Halak na margoar Tumbur i manjadi do karejonia sanga na di dia pe inganannia jana paulionnia ma mangulahi Bagas Ni Tuhan.

¹³ Ia ma da halakna na giot mambangun Bagas Ni Tuhan jana na manjagit hasangapan songon sada raja, jana mamarenta ma ia tu rayatnia i. Adong ma sada malim na gabe dongan pangalambunginia jana denggan do halahi rap saparkarejoan jana di bagasan dame.’

¹⁴ Disimpan ma tuku i di bagasan BagasKu baen parningotan tu si Heldai, si Tobia, si Jedaya dohot si Josia.

¹⁵ Marroan be ma angka halak sian na dao jana urupanna ma pajongjong Bagas Ni Tuhan. Muda dung sidung dibangun Bagas Ni Tuhan, botoonmunu ma bahaso Tuhan Na Markuaso i do na marsuru au mandapotkon hamu. Tulus ma sudena i muda tutu situtu dioloi halahi angka parenta na sian Au Tuhan Debata ni halahi.”