ZAKARIA 3 - BIBEL JAMITA NA DENGGAN

Parnidaan taringot tu Malim Godang Josua

¹ Di bagasan parnidaan na asing muse, dipataridahon Tuhan ma tu au Malim Godang Josua na topet jongjong di jolo ni Surusuruan Ni Tuhan. Jongjong do di lambungnia Sibolis na dung hobas laho manuhas ia.

² Didok Surusuruan ni Tuhan ma tu Sibolis i, “Sai diuhum Tuhan ma ho, ale Sibolis! Sai diuhumi Tuhan na manghaholongi Jerusalem i ma ho. Nada he surpu na nitarik sian api do ia?”

³ Jongjong ma si Josua di adopan ni Surusuruan i marpakean na dursun situtu.

⁴ Jadi mangkuling ma surusuruan i tu angka pangurupi na di banua ginjang ninna ma, “Ambungkon ma pakean na dursun na nipake ni bayo on.” Jana tu si Josua didok ia ma, “Madung huambungkon sude dosami, lehenonku ma di ho pakean na imbaru.”

⁵ Diparentahon Surusuruan i ma tu angka donganna pangurupina i laho mamasang saroben na ias tu ulu ni si Josua. Dioloi halahi ma i jana dung salpu i dipapakehon halahi ma pakean na imbaru i tusia dipamanat-manat Surusuruan Ni Tuhan i.

⁶ Dung i dipalalu Surusuruan i ma hata na nidok ni Tuhan tu si Josua,

⁷ “Muda dioloi ho angka aturanKu jana didalankon ho angka karejo na Hulehen tu ho, jadi bolas ma ho gabe pamimpin tu pudi on di bagasan BagasKu dohot mangurus alamanna i. TangihononKu ma angka tangiangmu, songon panangihonKu di angka tangiang ni angka surusuruan na donok tu lambungKu.

⁸ Tangihon ma, ale Malim Godang Josua, dohot hamu ale angka malim na asing, hamu ma da na songon gambaran ni hatiha hasonangan na giot ro. PatidahononKu ma di hatiha i naposongKu i ma Sada Tunas.

⁹ Hupayakkon ma di jolo ni si Josua pitu mata di ginjang ni batu na sasada i, na giot gorgaonKu dohot surat, ninna Tuhan Na Markuaso. Jana apuskononKu ma dosa ni luat on di bagasan sadari.

¹⁰ Jadi muda dung dapot ari i, marsipio hombar bagasna be ma halak anso ro mangarasoi dame dohot hasonangan di tonga-tonga ni angka kobun anggur dohot angka bona ni aramu.”