RUT 2 - BIBEL JAMITA NA DENGGAN

Markarejo si Rut di ladang ni si Boas

¹ Adong do sada halak sisolkot ni si Naomi sian pihak ni halaklahinia si Elimelek. Halak na kayo do bayo i jana na tarpandang. Si Boas goarna.

² Sanoli didok si Rut ma tu si Naomi, “Kehe au jolo namboru tu ladang laho mamuai burir-burir na nipardabuhon ni angka parkarejo i. Pos do rohangku sai adong do i halak na paloaskon au mambaen songon i.” “Denggan, maen!” ning si Naomi mangalusi, “kehe ma da ho.”

³ Jadi kehe ma si Rut manjomputi burir-burir na nipardekdekkon ni angka na markarejo di ladang i. Topet muse ma ia kehe tu ladang ni si Boas.

⁴ Nada sadia lolot, ro ma si Boas sian Betlehem laho manghoras-horasi angka parkarejo i. “Sai didongani Tuhan ma hamu,” ning ia. Dialusi angka parkarejonia i ma, “Sai dipasupasu Tuhan ma ho amang.”

⁵ Dung i disapai si Boas ma tu mandurna i, “Ise anak boru i?”

⁶ Dialusi mandur i ma, “Boru sian bangso na asing do i na ro rap dohot si Naomi sian Moab.

⁷ Ma dipangido ia tu au anso tola ia dohot di pudi ni angka parkarejo i manjomputi burir-burir na mardabuan i. Sian na sogot do ia mamungka markarejo, jana saonnari na baru maradian pe ia laho marsilaung jana so santongkin.”

⁸ Dung i didok si Boas ma tu si Rut, “Bege jolo. Ulang pola kehe ho mamuai burir-burir tu ladang ni halak na asing. Dison sajo pe ho manjomputi. Parrohahon ma sanga na di dia angka dadaboru markarejo;

⁹ ihutkon ma halahi jana ulang ho kehe dao-dao. Madung hudok tu angka halaklahi parkarejo i bahaso na so tola halahi mangganggu ho. Muda manguas ho, kehe sajo ma ho minum tu angka inganan parminuman na niparade ni angka parkarejo i.”

¹⁰ Umbege i, manungkap ma si Rut di jolo ni si Boas jana didok ia ma, “Halak sileban do au, amang, hape biasi pola songon i denggan ni roha ni amang tu au jana diparrohahon amang au?”

¹¹ Dialusi si Boas ma, “Madung hubege taringot tu sude na nibaenmu maradopkon namborumu mamungka sian dung jumolo halaklahimu. Huboto na dung ditadingkonmu simatobangmu, huta hagodanganmu anso ro maringanan dison rap dohot angka halak na so nitandaanmu hian.

¹² Sai dibalos Tuhan ma hadenggananmi. Jana hara ni na dung ro ho marsilaung tu Tuhan, Debata ni Israel, sai dilehen Ia ma antong parlinggoman sagokgokna di ho!”

¹³ Dialusi si Rut ma, “Na denggan ma antong pambaenanmi tu au, amang. Tarapul do rohangku, dibaen lambok ni pangkuling ni amang i tu au, haru pe tumoruk au sian sada parkarejo ni amang i.”

¹⁴ Di hatiha giot mangan, didok si Boas ma tu si Rut, “Beta hita mangan roti. Indon ma ingkayuna.” Gabe juguk ma si Rut mangan dohot angka parkarejo i. Dilehen si Boas muse ma disia roti na nipanggang, jana mangan ma si Rut lopus butong. Dung mangan, laing adong dope na teba.

¹⁵ Dung i diulahi si Rut ma mangulahi manjomputi burir-burir. Dung kehe ia, didok si Boas ma tu angka parkarejo i, “Muda manjomputi ia di angka inganan na dung ditambati angka burir-burir i, padiar hamu sajo ma; ulang larang hamu ia.

¹⁶ Denggan do sangajo hamu manguldus sasaotik sian na dung nitambatan i, jana dabuhon hamu baen disia anso adong jomputannia.”

¹⁷ Jadi torus ma si Rut manjomputi burir-burir di ladang i lopus potang ari. Dung dibantingi ia angka batang ni burir-burir i laho mangarurus batuna i sian bonana i, hapengani ma tarpalagut ia hira-hira sakaleng burir-burir.

¹⁸ Dung i muli ma ia tu kota maroban na nijomputannia i, jana dipatidahon ia ma tu namborunia i sanga sadia bahat na nijomputannia i. Jana dilehen muse ma tu namborunia i panganon na nipaindingnia i di hatiha mangan.

¹⁹ Jadi didok si Naomi ma tusia, “Di dia dehe dapot ho sudena on? Di ladang nise ho markarejo sadari on? Sai dipasupasu Debata ma da halak na marroha na denggan i tu ho!” Gabe dipaboa si Rut ma tu si Naomi bahaso ladang inganannia mamuai burir-burir i nampuna ni sada bayo na margoar si Boas.

²⁰ “Laing hita na sakahanggi do da i,” ning si Naomi. “Ia ma sada sian tonga-tonga ni kahangginta na angkon martanggung jawab salaho tu hita.” Laing didok si Naomi muse dope, “Sai dipasupasu Tuhan ma da si Boas. Tutu nian, sai na nipatulus ni Tuhan do janjiNa – tu angka halak na mangolu dope bope tu halahi angka na dung monding.”

²¹ Dung i didok si Rut ma muse, “Laing didok bayo i dope anso laing torus au manjomputi burir-burir rap dohot angka parkarejonia i lopus abis suha ni ladangnia i dibuat.”

²² “Olo da, maen,” ning si Naomi mangalusi si Rut, “na tutu do i, dumenggan ma ho rap markarejo dohot angka dadaboru di ladang ni si Boas i. Angke muda kehe ho tu ladang ni halak na asing, ra do i diganggu halak na asing ho!”

²³ Jadi kehe ma si Rut markarejo di ladang ni si Boas. Dipanjomputi ia ma disi burir-burir dohot gandum lopus sidung mambuat suhana. Jana tongtong do si Rut sainganan dohot namborunia i.