PODA 8 - BIBEL JAMITA NA DENGGAN

Jamita sian habisuhon

¹ Tangihon ma! Pio-pio do habisuhon, dipatubegehon hapistaran do soarana.

² Jongjong do ia di angka tor di lambung ni dalan, dohot di angka sirpang.

³ Di pintu horbangan ni kota, disi ma tarbege sorana.

⁴ “O ale jolma manusia, tu ho do au pio-pio; pangisi ni portibi on, tangihon hamu ma na husosohon!

⁵ Ale jolma na bajar jalahi ma hapistaran, ale jolma na oto parsiajari ma pangastuion.

⁶ Tangihon ma, angke dohononku ma angka parsoalan na maol, jana paboaonku ma angka na tutu.

⁷ Tutu do na hudokkon i sudena dibaen goyak do rohangku tu buras.

⁸ Hombar do tu hatutuan angka na hudokkon, umpe sada na sala sanga pe na paliluhon.

⁹ Torang do i sudena di halak na cerdas; di halak na marroha sudena i tangkas.

¹⁰ Argahon ma sipaingotku mangalobii perak na asli, haporluhon ma parbinotoan manyalpui sere na polin.

¹¹ Angke ummarga do habisuhon sian permata; nada tarpatudos tusi bagi aha diparhagiot jolma.

¹² Au ma da habisuhon; di au do adong pangastuion; malo do au jana marparbinotoan.

¹³ Biar mida Tuhan dos do i dohot na magigi mida hajahatan; nada huhagioti ginjang ni roha dohot hagakgakan. Goyak do rohangku mida pangalaho hajahatan, dohot hata-hata na mambaen haliluan.

¹⁴ Hubaen do sangkap, lalu hupadalan. Pistar do au boti muse marhagogoan.

¹⁵ Hubantu do angka raja mandalankon pamarentaon angka parkuaso hutolong manjongjongkon hatigoran.

¹⁶ Harana au do mambaen markuaso pamimpin, dohot parpolitik, dohot panguhum di tano on.

¹⁷ Huhaholongi do na marholong ni roha di au; na manjalahi au, gabe dapot ia do au.

¹⁸ Rade do di au hakayoan dohot hasangapan; bope sinadongan na hot dohot hatigoran.

¹⁹ Sanga aha pe na dapot ho sian au ummarga do i sian sere na polin; jana sian perak na jumeges.

²⁰ Dalan hajujuron do na huihutkon, di dalan hatigoran do na hulangkahon.

²¹ Angke hulehen do hakayoon tu na manghaholongi au; sinadongan manggohi bagasna.

²² Au do na nitompa ni Tuhan parjolo, au ma da parbatu ni karejoNia sian mulana di hatiha najolo.

²³ Madung di tompa au di mula ni mulana, dompak so adong dope tano on.

²⁴ Sorang au taran so adong dope laut, dompak so adong dope mata ni aek.

²⁵ Ma sorang au dompak so dipajongjong dope angka dolok, taran so dipajongjong dope angka tor.

²⁶ Taran so Ditompa Debata tano dohot angka padang, na podo tehe adong sangkimpal tano na parjolo.

²⁷ Huida do langit dipahembang, dohot awang-awang dipahirbang di ginjang ni lautan,

²⁸ di na nipayakkon ni Tuhan ombun di langit, dohot di na mambuka angka bubusan ni lautan,

²⁹ di na niparentahonNa galumbang ni laut anso ulang salpu di angka batasna. Au pe dohot do disi di na mamayakkon ojahan ni portibi.

³⁰ Di lambungNia do au songon anak hasian, ganup ari do au mambaen jop ni rohaNa jana tongtong marmayami di adopanNia.

³¹ Marsonang-sonang do au di ginjang ni tano on jana jop do rohangku di jolma.

³² Tangihon ma au, ale na poso-poso! Ihutkon ma panogu-noguonku anso martua ho.

³³ Jagit ma poda jana marroha ma ho, ulang layas rohamu disia.

³⁴ Martua ma sanga ise na manangihon au, na juguk ganop ari paintehon di pintu ni bagasku.

³⁵ Sanga ise na mandapot au, maruli hangoluan, tusia ma lomo roha ni Tuhan.

³⁶ Sanga ise na so mandapot au, mangarugii dirina sandiri, halak na manghasogohon au, hamatean do dihaholongi.”