PODA 4 - BIBEL JAMITA NA DENGGAN

Labo manjalahi habisuhon

¹ Hamu ale dakdanak, tangihon hamu ma sipaingot ni amangmu! Parrohahon ma i, jadi gabe marbisuk ma ho.

² Na denggan do na huajarkon tu ho, hara ni i ulang layas rohamu saotik pe.

³ Dompak menek dope au diajari damang do au, jana anak sasada ni dainang do au;

⁴ diajar dainang au. Didok ia do, “Ingot ma angka sipaingotku, sanga na bia pe ulang halupahon i. Dalankon ma angka panogu-noguon na sian au, anso malua ho.

⁵ Marbisuk ma ho jana marroha! Argahon ma angka sipaingotku jana ulang halupahon.”

⁶ Argahon ma habisuhon, gabe ondihonon ni habisuhon ma ho; haholongi ma i gabe jagohononna ma ho anso totop aman.

⁷ Pangalaho na umpenting angkon patulusonmu, i ma na parayakkon habisuhon. Sanga aha pe na nikojarmu, na umporlu, i ma angkon usahahononmu dapotan pangastuion.

⁸ Hunti ma habisuhon, gabe pagincaton ni habisuhon i ma ho. Haol ma i, gabe paroonna ma hasangapon di ho.

⁹ Lehenonnia ma di ho bunga na niatak jeges jana dibasabasahon tu ho tuku na jogi.

¹⁰ Ale anakku! Tangihon ma sipaingotku anso ginjang umurmu dohot dalan na sintong.

¹¹ Madung huajarkon habisuhon tu ho jana hupatuduhon parngoluon na tutu.

¹² Muda marbisuk ho mangolu, nada jabat ho tarambat di hatiha mardalan, jana nada jabat tartuktuk di na marlojong.

¹³ Ingot ma sanga aha na dung niparsiajaranmu, i do hangoluanmu, hara ni i jagohon ma i.

¹⁴ Ulang ho kehe tu angka inganan na somal didapotkon halak na jahat. Ulang tiru parbuatan ni halahi.

¹⁵ Tulakkon jana padao ma na jahat, ulang ho manyirpang sian dalan na tigor.

¹⁶ Nada tarpodom halak na jahat anggo so jolo mambaen na so ture. Nada ra halahi mondohondok anggo so jolo mangago halak na asing.

¹⁷ Hajahatan dohot hakejamon tarsongon sipanganon dohot inumon do di halahi.

¹⁸ Songon parbincar ni mataniari do anggo dalan na nibolus ni halak na denggan; mur lolot mur torang, jana ujungna ari pe gabe torang sajo.

¹⁹ Sabalikna, anggo dalan ni halak na jahat golap do songon golap ni borngin. Tinggang ma halahi nada dibotosa sanga hara ni aha.

²⁰ Parrohahon ma angka na hudok, ale anakku! Tangihon ma angka sipaingotku.

²¹ Ulang paboa-boa, tapi pasimpan ma i tongtong di bagasan rohamu.

²² Sanga ise na mamoto taringot tusi mangolu ma i jana gabe horas.

²³ Jagohon ma pikiranmu denggan, harana pikiranmi do manontuhon pardalan ni ngolumu.

²⁴ Sanga na bia pe ulang jabat tardokkon ho angka hata na so tutu. Padao ma angka pandohan na laho mangaliluhon halak.

²⁵ Sian torang ni panailimu tarida ma nian hatigoran ni rohamu; ulang jabat unduk ho hara ni ila ni rohamu.

²⁶ Jolo denggan ma nipikiran painte so nikarejohon, anso mardohar ho di bagasan sude parkarejoanmu.

²⁷ Padao ma na jahat, jana tigor ma ho mangolu. Ulang jabat ho manyirpang sian dalan na tigor.