PODA 31 - BIBEL JAMITA NA DENGGAN

Sipaingot tu raja

¹ Angka on ma hata na nipajojor ni inang ni Raja Lemuel tu anakna,

² “Anakku, hasudungan ni rohangku, na hutubuhon songon alus ni tangiangku. Aha ma sidohononku tu ho?

³ Ulang parsua-saehon gogomu sanga diaburkon ho hepengmu tu dadaboru. Madung bahat raja na madabu hara ni dadaboru.

⁴ Ingot ma, Lemuel! Na minum anggur dohot na nirajaan ni siinumon na koras, nada patut gabe raja.

⁵ Angke muda lalap minum, lupa ma ia di uhum na tigor, gabe dipaegol ma uhum tu halak na dangol.

⁶ Siinumon na koras tu halak na susa do lehenon jana anggur tu halak na marsak.

⁷ Diinum halahi ma i anso dihalupahon pardangolanna.

⁸ Ho ma mangkobarkon lalu palaluhon hobar ni na so bisa mangkobarkon hobarna.

⁹ Manghatai ma ho pajongjongkon hatigoran. Pahot ma hak ni halak na pogos dohot na dangol.”

Dadaboru na pistar

¹⁰ Maol do dapot dadaboru na pistar, ummarga do i umpado permata na marlinang-linang.

¹¹ Nada hurangan sanga aha halaklahina, harana pos do rohana disia.

¹² Nada unjung dibaensa na jahat tu halaklahina; salolot ngolunia sai denggan do dibaensa tusia.

¹³ Ringgas do ia manonun abit sian imbulu ni biri-biri dohot linen.

¹⁴ Sian na dao diparo ia sipanganon, songon na nibaen ni angka kapal boniaga.

¹⁵ Sogot dope ma ngot ia manghobasi panganon ni halahi sabagas dohot marbagi karejo ni angka pangoloina.

¹⁶ Dijalahi ia do saladang tano, lalu digarari; diusahoi ia sada kobun anggur sian pandapotannia.

¹⁷ Dipasada ia do rohania laho markarejo sagogona.

¹⁸ Diboto ia do arga ni sasude na nibaennia; lopus bagas borngin markarejo ia.

¹⁹ Dipuyu ia bonang jana ditonun ia abit.

²⁰ Nada mangholit ia tu na marhahurangan; denggan do rohania tu na mamorluhon tolongan.

²¹ Nada ganggu rohania muda dapot musim ngali, dibaen singkop do baju panas di isi ni bagasna.

²² Ia sandiri do mambaen permadanina; pakeannia pe sian abit linen bunga torung na arga.

²³ Halaklahina pe tarbarita; sada pamimpin di kota.

²⁴ Dibaen ia pakean dohot bobat lalu digadis ia ma i tu parboniaga.

²⁵ Marsahala ia jana dipasangap; jana nada ganggu rohana salaho tu ari na ro di pudi.

²⁶ Lambok ia manghobari, hatana pe marbisuk do i.

²⁷ Sai ringgas ia karejo dohot mangarohahon haporluan ni dongan sabagasna.

²⁸ Mandok tarimakasi do tusia angka dakdanakna, jana halaklahinia pe mamuji ia.

²⁹ “Bahat do dadaboru na denggan,” ning halaklahina; “tapi ho ma i na dumenggan sian sudena halahi.”

³⁰ Nada haposan jogi ni rupa jana hajegeson muli hambar do i; tapi dadaboru na mangoloi Tuhan patut dapot pujian.

³¹ Balosi sude hadenggananna, ia ma dadaboru na patut pasangapon sanga na di dia.