PODA 3 - BIBEL JAMITA NA DENGGAN

Sipaingot tu angka doli-doli

¹ Ulang ma halupahon sanga aha na dung huajarkon tu ho, ale anakku. Sai paingot-ingot ma na huparentahon,

² anso ginjang umurmu jana sonang ngolumu.

³ Sai totop ma ho marholong ni roha jana pangalahomu pe setia tu Debata dohot tu donganmu. Paingot-ingot ma i jana simpan di bagasan rohamu,

⁴ gabe dapotan holong ma ho dohot hasangapan, di bagasan parnidaan ni Debata dohot jolma.

⁵ Haporsayai ma Tuhan sian sude rohamu, jana ulang pangasahon pangartianmu sandiri.

⁶ Ingot ma Tuhan di bagasan sude na nikarejohonmu, anso dipatuduhon Ia tu ho dalan parngoluon na sintong.

⁷ Ulang etong dirimu na ummalo sian satutuna; oloi ma Tuhan, jana pasimbil ma hajahatan.

⁸ Gabe songon ubat i di ho na pamalumkon angka bugangmu jana na panayangkon holi-holimu.

⁹ Pasangap ma Tuhan marhite na manghaulkon na dumenggan sian suha ni tanomu tuSia,

¹⁰ jadi gabe gok eme ma angka talobatmu; jana aek ni anggurmu pe marlobi-lobi lopus nada tuk be inganan panyimpananna.

¹¹ Ampot dipamasa Tuhan singot-singot tu ho, ale anakku, jagit ma i jana ulang menek rohamu tuSia.

¹² Dipasingot Tuhan do halak na nihaholonganNia, dos dohot sada ama na paingotkon anak haholongan ni rohana.

¹³ Martua ma halak na dapotan bisuk dohot pangastuion – i ma halak na denggan roha.

¹⁴ Umbahat do labona umpado na dapotan perak; gumincat argana sian sere.

¹⁵ Ummarga do habisuhon umpado angka permata; jana sude na nihalungunkonmu nada tuk manyarupaisa.

¹⁶ Dilehen habisuhon do di ho umur na ginjang, sinadongan dohot hasangapan.

¹⁷ Sonang jana maduma do ngolumu baenon ni habisuhon.

¹⁸ Na martua do halak na marbisuk; malua do ia patunda ni habisuhon i.

¹⁹ Marhite habisuhon, ditompa Tuhan tano on; marhite rohaNa na denggan i dipahembang Ia langit di ingananna i.

²⁰ Marhite parbinotoanNa dibaen Ia angka batang aek mardalan dohot ombun manduruskon aek tu tano on.

²¹ Antong hara ni i, marsitiopan ma ho tu habisuhon dohot tu roha na denggan, ale anakku! Sanga na bia pe ulang palua i,

²² I ma na gabe hangoluanmu jana sorminan di dirimu.

²³ Sonang ma ho mardalan, jana nada tartuktuk ho.

²⁴ Jadi nada marbiar ni roha be ho modom, jana sinok ma ho modom sasaborngin.

²⁵ Nada porlu ho mabiar salaho tu parmaraan na ompot ro songon halingsungsung jana na mangalingkup angka halak na jahat.

²⁶ Jagohonon ni Tuhan ma ho. Nada padiaronNia ho runcur tu bagasan tirangkap.

Poda mangkarejohon na denggan

²⁷ Intap ni na tarbaen ho, baen ma na denggan tu angka halak na manghaporluhon hadenggananmu.

²⁸ Ulang ma suru donganmu paintehon lalu tu ancogot anggo tarurupi ho do ia antong saonnari.

²⁹ Ulang pikiri giot manyusai donganmu na donok tu ho, jana na manghaposi ho.

³⁰ Ulang ma martongkar ho di na so dalanna dohot halak na so jungada mambaen na jahat tu ho.

³¹ Ulang ma mangiburu ho maradopkon halak na mangasahon gogo, jana ulang tiru halahi,

³² angke sogo do roha ni Tuhan mida halak na mambaen na jahat, tapi dipatulus Ia do sangkap ni halak na tigor.

³³ Diburai Tuhan do bagas ni parjahat, tapi dipasupasu do bagas ni partigor.

³⁴ Dipaila Ia do halak sigincat roha, tapi dipasupasu Ia do halak na toruk roha.

³⁵ Dapotan hasangapon do halak na marbisuk, tapi martilako do halak na oto.