PODA 29 - BIBEL JAMITA NA DENGGAN

¹ Sanga ise na manangkang muda dipaingot, di sada hatiha gabe maropuk jana nada be tarpauli.

² Muda mamarenta halak na tigor, moga ma halak na bahat. Tapi muda markuaso halak na jahat marhancit ma rayat.

³ Sanga ise na manghalomohon bisuk, pasonang roha ni amangna. Sanga ise na mardongan dohot panggampang mermur hepengna.

⁴ Muda dirohahon parkuaso hatigoran, togu ma negarana. Tapi muda hepeng dirohahon, maronco ma luatna.

⁵ Na paoto-oto donganna, mambaen jorat do i tu dirina.

⁶ Tardapot do parjahat dibaen dosana, halak na tigor bebas jana moga pangkilalaanna.

⁷ Diboto halak na burju do hak ni halak na gale, tapi anggo halak na jahat nada diastuisa be.

⁸ Halak na sai tagi pasalahon, bolas do i manggaori kota. Tapi anggo halak na marroha sai dipademak do na masa.

⁹ Muda parkaro halak na marroha dohot halak na oto, hum na panyaor-nyaorkon dohot na martata do na oto i.

¹⁰ Goyak do roha ni sibunu jolma tu na bulus marroha, tapi anggo halak na burju ondihononna do ia.

¹¹ Halak na oto muruk marsitangkas, tapi halak na marroha sobar do i jana ditahan do murukna.

¹² Muda diparrohahon na markuaso do barita na so tutu, pagawena pe gabe pargabus do sude.

¹³ Adong do na sarupa di halak na pogos dohot na mamisatsa; rap dilehen Tuhan do tu halahi na dua mata laho marnida sinondang hangoluan.

¹⁴ Muda diondihon raja hak ni halak na gale, martaon-taon do ia mamarenta.

¹⁵ Pangajaran dohot gora pabijakkon jolma. Anak na sai pangidoanna dipaolo-oloi gabe pailahon inangna.

¹⁶ Muda markuaso halak na jahat, martamba ma hajahaton. Tapi jabat do idaon ni halak na tigor hamamago ni halak na jahat.

¹⁷ Ajar ma anakmu, jadi gabe hagodangan ni rohamu ma ia jana hatuaonmu.

¹⁸ Muda nada adong panogu-noguon ni Tuhan di sada bangso, gaor ma bangso i. Martua ma halak na maniop uhum.

¹⁹ Nada tarajar sada hatoban dohot hata-hata sajo. Mangarti do ia nian, tapi na so diparrohahon do.

²⁰ Umbahat do na niarop ni roha ni jolma na oto, umpado halak na manghobari na so marpikir jolo.

²¹ Hatoban na dipamanja sian na poso, ujungna na so tarkuasoi do.

²² Halak na muruk mura mambaen jolma bahat martongkar jana susa.

²³ Na laho madabu do siginjang roha sipasangapon do halak na toruk roha.

²⁴ Halak na manjagit parbagian sian panangko, na mangago dirina sandiri do i. Dibege ia pe bura, nada ra ia mangkobarkon. Tapi muda hohom sajo ia, hona ma uhuman ni Debata tusia.

²⁵ Muda jolma do dihabiari ho, na mambaen jorat do ho di dirimu; tapi haposi ma Tuhan, anso dijagohon Ia ho.

²⁶ Bahat do halak marpor ni roha anso dihalomohon parkuaso, tapi na mangalehen hatigoran hum Tuhan do.

²⁷ Halak na burju nada sonang rohana tu halak na jahat; magigi do halak na jahat tu halak na burju.