PODA 25 - BIBEL JAMITA NA DENGGAN

Deba nari poda na asing sian si Salomo

¹ Adong muse dope dison deba nari poda na asing sian si Salomo na nienet ni angka halak na di bagas godang ni si Hiskia, raja ni Juda.

² Marmulia do Debata hara ni angka na nirahasiahonNa; raja dipasangap hara ni angka na tarpatorangsa.

³ Songon laut na bagas dohot langit na gincat, pikiran ni raja nada hadodoan.

⁴ Jolo paias ma perak sian dahina, baru pe tarbaen tangan ni na malo sian i sinajegesna.

⁵ Paruar ma angka panuturi na jahat sian bagas godang, baru pe togu pangarajaion hara ni hatigoran.

⁶ Muda mangadop tu raja toruk ma nian roha; ulang nipaula songon halak na pangkat iba.

⁷ Gumonan do disuru juguk tu inganan na sumangap, ulang pado disuru mangalehen inganan tu na umpangkat.

⁸ Ulang iba mopop maroban parkaro tu pangadilan; harana, muda tardapot do iba muse sala aha dope he na bolas baenonniba?

⁹ Bela ma parkaromu dohot donganmu, tapi anggo rahasia ni halak na asing ulang paboa-boa.

¹⁰ Angke gabe dicap do ho muse siruak baba jana goarmu pe hodar sapanjangna.

¹¹ Pandapot na dipajojor topet pandohanna tudos tu batu sere do i di pinggan perak.

¹² Panggora ni halak na bisuk tu halak na ra manangihonsa, tudos tu tintin sere do i sanga parhiasan sigodang arga.

¹³ Suruan na nihaposan, mambaen sonang na marsurusa, tudos tu aek na borgo di halak na manyabi di saba.

¹⁴ Angka janji na so tarpatulus, tudos tu ombun dohot alogo na so parohon udan.

¹⁵ Hasobaron mardongan hata na tabo tarbaen do i paposkon roha ni halak na markuaso, jana marhite hata na lambok tarbaen ia mangagohon hata na risi.

¹⁶ Ulang nipangan bahat-bahat aer ni loba gabe gialan do ho baenonna.

¹⁷ Ulang majotjottu iba ro tu bagas ni hombarniba, betak sobalan ia lalu margoyak ni roha.

¹⁸ Bolas do mamatehon hata-hata na dipatubu-tubu, songon podang, potuk-potuk sanga pana na tajom situtu.

¹⁹ Manghaposi panggete-gete di hamamasa ni hasusaan tudos ma i songon na manghilkil dohot ipon na muit-uit sanga songon pardalan ni halak na mengkat-engkat.

²⁰ Mangendei halak na marsak roha tudos do i tu na mambuka pakeanna di ngali ni ari songon na mamoro asom tu na mahancitna.

²¹ Muda male musumu, lehen sipanganon disia; muda manguas ia, lehen siinumonna.

²² Marhite na songon i gabe maila ma ia dibaen ho jana pasupasuon ni Tuhan ma ho.

²³ Alogo sian Utara pasti parohon udan; songon i muse ma na pahata-hatahon tontu patubu hamuruhan.

²⁴ Sumonang dope tinggal di suhi ni loteng ulang pado sabagas dohot dadaboruniba na sai martongkar matubekbek.

²⁵ Manjagit barita na denggan sian luat na dao tudos do i dohot manguas minum aek na borgo.

²⁶ Halak na burju na patalu roha tu halak na jahat tudos ma i tu mual ni aek na horu sanga sumur na hodar.

²⁷ Nada denggan mangan aer ni loba marlobian, songon i muse ma nada denggan manjalahi bahat pujian.

²⁸ Jolma na so tarbaen mangarajai dirina tudos do i tu kota na dung marumpak partahananna.