PODA 24 - BIBEL JAMITA NA DENGGAN

–19–

¹ Ulang iba mangiburu mida halak na jahat, jana ulang por roha pardongankon halahi.

² Hum na mamikirkon hakejamon do halahi jana hum na manghobari hajahatan.

–20–

³ Mardongan bisuk dohot parbinotoan do dibangun rumahtangga.

⁴ Sanga di dia adong parbinotoan, disi do adong angka kamar na singkop dohot barang-barang sigodang arga jana na jeges.

–21–

⁵ Marsahalaan do halak na bisuk ulang pado halak na gogo; umporlu do parbinotoan sian gogo.

⁶ Nada he jolo nibaen do sangkap na tangkas painte so marporang hita? Mur bahat na manuturi, mur umbahat do panagaman monang.

–22–

⁷ Magincattu do bisuk anggo di halak na oto. Nada tardoksa sanga aha muda hatiha manghobari halak taringot tu angka pangalaho na penting.

–23–

⁸ Halak na sai mambaen sangkap hajahatan, goaron do i sipanggaori.

⁹ Dosa do sandok siasat ni halak na oto. Jolma na sai manggorahon halak na asing, nada adong sanga ise pe na manghajopkon i.

–24–

¹⁰ Jolma na mandele di bagasan pangalaho na sompit, i ma halak na tutu situtu gale.

–25–

¹¹ Ulang ho ganggu paluahon halak na dung didabu uhuman hamatean markite-hite uhum na so tingkos, palua ma halak na ditogu tu inganan habuangan.

¹² Bolas do dokkononmu, “Nada ahana i di au.” Tapi diboto Debata do pikiranmu jana adilanNa do ojahan ni pikiranmu. Dijago Ia do ngolumu jana baloskononNia do di ho marguru tu pambaenanmu.

–26–

¹³ O anakku, pangan ma aer ni loba, angke denggan do i. Songon tonggi ni aer ni loba na sian asarna nipangan,

¹⁴ songon i muse ma dengganna bisuk ni tondimu. Muda marbisuk ho, torang ma ari pangapudianmu.

–27–

¹⁵ Ulang iba songon halak na jahat na marpokat manyamun halak na burju jana mangarampas bagasna.

¹⁶ Harana, haru pe tinggang halak na burju i marpupu, sai na mulak jongjong do i. Tapi suhar-suharna, dilantuk hamamago do halak na jahat.

–28–

¹⁷ Ulang sonang rohamu muda marmara musumu, jana ulang ho marjop ni roha muda tinggang ia.

¹⁸ Harana, pasti idaon ni Tuhan do pangalahomi jana nada jop rohana mida ho, jadi nada diuhum ia be musumu.

–29–

¹⁹ Ulang dut rohamu sanga mangiburu ho tu halak na jahat.

²⁰ Nada adong ari pangapudian ni parjahat jana mintop do ancogot lampuna.

–30–

²¹ O anakku, habiari ma Tuhan, jana pasangap ma raja. Ulang ho dohot-dohotan tu na mangalo halahi.

²² Bolas do mago santongkin i jolma sisongon i, harana parmaraan na niparo ni Debata sanga raja, indada parkaro na menek.

Deba nari poda

²³ Unjung do didok angka halak na bisuk songon on: Panguhum nada tola borat sabola.

²⁴ Muda didok ia halak na sala nada marsala, gabe hona bura do panguhum i jana dihasogohon sude halak.

²⁵ Tapi anggo panguhum na manguhumi halak na sala, marpasupasu do i jana sihalomohonon.

²⁶ Alus na tigor, i do tanda ni pardonganon na tutu.

²⁷ Ulang marrumahtangga, anggo so jolo diparade ho ladangmu jana adong pancarianmu.

²⁸ Ulang ho na gabe saksi maradopkon halak na asing anggo so adong alasan na patut; jana ulang ho margabus salaho tusia.

²⁹ Ulang dokkon, “Giot baloskononku tusia sanga aha na nibaennia tu au!”

³⁰ Unjung do mamolus au sian ladang dohot kobun ni halak na losok.

³¹ Hum duri-duri do dohot ri huida na tubu disi. Handangna i pe ma pola unggal.

³² Dung huparrohahon jana hupasari-sari salaho tusi, dapot au ma songon parsiajaran:

³³ Markite na mondohondok jana modom santongkin, marhite na juguk lompit tangan jana maradian sangombas,

³⁴ mangaroro ma hapogoson i songon panyamun na marsinjata.