PODA 23 - BIBEL JAMITA NA DENGGAN

–6–

¹ Muda juguk ho mangan dohot sada halak na godang, parate-atehon ma dohot denggan aha na adong di jolomu.

² Baen ma piso tu rungkungmu, muda nada tarorom ho hagiotmu.

³ Ulang ho mangapian di sipanganon na tabo i, angke bisa do i manipu.

–7–

⁴ Ulang nihalojahon laho makayo, tinggalkon ma hagiotmi.

⁵ Harana di bagasan sangombas sajo pe bolas do mago sinadonganmi, songon na marhabong ia jana habang tu langit songon unggas rajawali.

–8–

⁶ Ulang mangan iba dohot jolma na holit. Ulang muse por roha di sipanganonnia hara ni tabona.

⁷ Harana, dokkononnia do i, “Tole mangan hita; tambai hamu da,” hape anggo rohania nada songon i. Hum tabo begeon do hatania, tapi anggo rohana asing do.

⁸ Utahononmu do muse na nibondutmi, jana nada adong guna ni sude hata na nidokmu mamanggar ia.

–9–

⁹ Ulang nipaingot halak na oto; indangkan na argahononna sipaingotmi.

–10–

¹⁰ Sanga na bia pe, ulang nipaimbar parbalohan ni tano sanga nibuat tano ni na so marama so marina.

¹¹ Harana, Tuhan do pambela na gogo; Debata do na mambela halahi laho mangalo ho.

–11–

¹² Parrohahon ma pangajaran ni gurumu jana gogoi ma na marsiajar.

–12–

¹³ Ulang alang rohamu mandidik anakmu. Muda hona loncing ia dibaen ho, nada jabat mate ia,

¹⁴ gabe malua noma gari ada.

–13–

¹⁵ O anakku, jop sajo do rohangku muda marbisuk ho.

¹⁶ Godang do rohangku muda hubege ho mandok hata na marbisuk.

–14–

¹⁷ Ulang iba mangiburu mida halak pardosa. Oloi ma torus Tuhan,

¹⁸ anso torang ari pangapudianmu jana nada mago arop ni rohaMu.

–15–

¹⁹ Tangihon ma, ale anakku! Marbisuk ma ho. Situtui ma mamparrohahon parngoluonmu.

²⁰ Ulang ho margaul dohot parmabuk sanga halak na songkal,

²¹ angke na gabe marpogos do halahi. Muda modom sajo ho, nada sadia honok nari marpakean na masibak-sibak noma ho.

–16–

²² Oloi ma amangmu; angke nada adong ho anggo so hara ni ia. Muda dung matobang inangmu, patuduhon ma paboa na niargahonmu ia.

²³ Angka tona ni Tuhan, bisuk, pangajaran, dohot pangastuion patut do tobusan sudena i, tapi maargatu do i gadison.

²⁴ Marjop ni roha do sada ama muda dihabiari anakna Debata, godang do rohana muda marbisuk anaknia.

²⁵ Sai pajop roha ni inangmu ma ho nian; sai martua ma dadaboru na manubuhon ho.

–17–

²⁶ Denggan-denggan ma parrohahon jana tiru ma ngolungku, ale anakku!

²⁷ Tirangkap parmaraan do dadaboru panggampang na marmainan.

²⁸ Mangadang do halahi songon panyamun jana patunda ni halahi bahat halaklahi na marmainan.

–18–

^29-30 Diboto ho dehe na tarjadi tu halak na minum anggur lalu tonga borngin, dohot na manguji siinumon na koras? Mardangol do i jana marhancit. Sai martongkar ma ia jana humolos. Matana i marrarai jana pamatangna mabugangi, nada diboto sanga hara ni aha.

³¹ Ulang padiar ho digoda anggur, haru pe manarik tompana i jana gerger di bagasan galas boti tabo panjururna laho masuk.

³² Ancogotna i manyogot songon na dipagut ni ulok na marbisa ma hilalaonmu.

³³ Ligionmu ma angka na so pade harana madung sala pangaligimu, jana gaor ma panghobarimu.

³⁴ Songon na di ujung ni tiang ni kapal na di tonga laut ma pangkilalaanmu; hancit ma ulumu jana lenong-lenong ma ho.

³⁵ Jadi gabe dokkononmu ma, “Na hona pukul ni halak do au lakna jana ditampeleng, tapi nada huingot sanga aha na dung tarjadi. Ah, mondohondok sajo au! Porlu dope minum au!”