PODA 22 - BIBEL JAMITA NA DENGGAN

¹ Ummarga do goar na denggan ulang pado hakayoon, jana dumenggan do di haholongi ulang pado sere sanga perak.

² Adong do sada pangalaho na dos di na kayo dohot na pogos: Rap na ditompa ni Tuhan do i sudena.

³ Monjap do halak na marroha muda diida ro jaya; anggo halak na bodo sai mardalan do torus gabe marmara.

⁴ Halak na burju mangoloi Tuhan jana patoruk rohana, gabe martua, sangap jana sonang ngoluna.

⁵ Tirangkap dohot jorat adong do i di dalan ni halak ma jahat; sanga ise na giot manjagohon ngoluna, dipadao ma dirina sian i.

⁶ Ajarkon ma tu na poso parngoluon na pajop roha ni Tuhan, gabe songon i ma ngolunia sapanjangna.

⁷ Guru dok ni paradongan do halak na pogos gabe hatoban ni parsingir do parutang.

⁸ Halak na manyuan na so tigor, sabionna ma hamagoan, ujungna mago muse ma kuasona.

⁹ Pasupasuon ni Tuhan do halak na denggan marroha, dibaen marbagi rasoki do ia dohot halak na hurangan.

¹⁰ Paorot ma halak na sai tagi patubu-tubu layas jadi gabe mantak ma bada dohot na marsitilakoan.

¹¹ Halak na manghagioti habulusan jana na tabo pangkulingna i do na gabe dongan ni raja.

¹² Dijagohon Tuhan do parbinotoan ni na tigor; direngreng Ia do gabus ni halak na geduk.

¹³ Halak na losok mandok: “Adong singa di luar dijomak au annon di tonga dalan.”

¹⁴ Songon lobung do pamangan ni dadaboru panggampang halak na nimuruhan ni Tuhan, madabu tu bagasanna.

¹⁵ Somalna do dakdanak mambaen angka pangalaho na so patut patupaon, tapi tarajar do i dohot loncing-loncing paubahon pangalahona.

¹⁶ Sanga ise na mamisat halak na so marnampuna jana marsilua tu halak na mora mardongan maksud anso mamora gabe marpogos situtu do i di ujungna.

Tolu pulu poda habisuhon

¹⁷ Tangihon ma, anso huajarkon tu ho poda ni halak na marroha! Parrohahon ma pangajaran i,

¹⁸ anso gabe masonang ho muda bolas ho marningot dohot pajojorkonsa sanga na andigan.

¹⁹ Giotku sugari nian, Tuhan ma sihaporsayaanmu; jadi saonnari paboaonku ma tu ho angka pangajaran i.

²⁰ Madung husuratkon tolu pulu poda di ho – angka poda na marisi parbinotoan dohot sipaingot na denggan

²¹ jana na mangajarkon tu ho sanga aha na tutu. Sanoli on, muda disuru ho manangkasi, tarlehen ho ma alus na tumbuk.

–1–

²² Ulang akali na pogos harana bisa mangakali ho, ulang akali halak na so margogo di pangadilan.

²³ Belaon ni Tuhan do parkaro ni halahi jana diparkanciti Ia halak na mamparkanciti halahi.

–2–

²⁴ Ulang nipardongan halak na mura muruk.

²⁵ Gabe muli tiruonmu do i, jana nada margogo be ho mangagohon hasomalan na songon i.

–3–

²⁶ Ulang nijanjihon laho mananggung utang ni halak na asing.

²⁷ Muda nada sanggup ho muse mangalunasi, salang podomanmi pe gabe hona sintak.

–4–

²⁸ Sanga na bia pe, ulang nipaimbar parbalohan ni tano na dung ditotopkon ni ompuniba.

–5–

²⁹ Unjung dehe diida ho halak na malo mangkarejohon karejona? Di bagas godang ni angka raja do halahi baenonna karejo, nada di bagas ni halak na somal.