PODA 20 - BIBEL JAMITA NA DENGGAN

¹ Inumon na koras mambaen jolma hurang ajar jana gaor oto do halak na minum lopus mabuk.

² Muruk ni raja songon pangorong ni babiat do, barang ise na mangalapi muruk ni raja na mambaen parmaraan do i tusia.

³ Sude halak na oto malo do mamungka partongkaran; anggo sikap na tarpuji, i ma na pasiding paraloan.

⁴ Partani na losok nada di hatihana mangkarejohon ladangna; ujungna di masa ni na mambuat, nada dapotsa sanga aha suhana.

⁵ Isi ni roha ni jolma tarsongon sumur na bagas; tapi tartimba halak na adong parbinotoanna do sumur na bagas i.

⁶ Bahat do halak na mandok dirina na setia, tapi na tutu situtu setia jarang do adong dapot da.

⁷ Maruntung do anak na marama, na jujur boti na patulus hagiot ni Debata.

⁸ Muda mangadili raja, dipareso ia do sudena, jana dibuka ia sandok hajahatan.

⁹ Adong ma he halak na bolas mandok hatana, “Ias do rohangku, madung malua au sian dosa!”

¹⁰ Timbangan dohot parsuhatan na geduk nada i di roha ni Tuhan na tumbuk.

¹¹ Nitanda dakdanak sian pambaenanna; botoon do sanga na denggan jana jujur bakona.

¹² Dilehen Tuhan do di hita mata laho mangaligi, dohot pinggol laho marbinege.

¹³ Halak parmodom, sai na marhahurangan. Halak na padot karejo, adong bahat panganonna.

¹⁴ Sai na humolos do panobusi salaho tu arga ni sitobusan. Tapi dung ditobusi, sonang rohania di arga na dapotnia.

¹⁵ Ummarga do hata na marisi parbinotoan sian sere dohot sian parmata.

¹⁶ Sanga ise na mananggung utang ni halak na so nitandana, patut dibuat sinadonganna gabe jaminan ni janjina.

¹⁷ Santak tabona mangan na ditipu, tapi murlolot gok ma pamangan dohot horsik.

¹⁸ Pangido ma sipaingot na denggan, painte so mambaen haputusan; ulang ma niparjuangkon anggo so adong sangkap na torang.

¹⁹ Nada tarsimpan na ramos mangecet rahasia; jana dohot halak na mabekbektu indangkon sai mardongan iba.

²⁰ Muda diburai ho simatobangmu, mago ma ngolumu songon lampu na mintop di borngin na golap.

²¹ Mur mura halak dapotan sinadongan mur so denggan do panginonaanna.

²² Ulang nibaloskon hajahatan. Nihaporsayaan ma Tuhan, anso Ia paturehon.

²³ Nada dihalomohon Tuhan na mangicu di kiloan dohot batu ni timbangan.

²⁴ Tuhan do manontuhon dalanta; tapi bia ma baenon ni jolma mangastui pardalanan ni ngoluna.

²⁵ Taran so manjajihon haul ho tu Tuhan, jumolo tangkas pikiri. Harana bolas do gabe manyosali di pudi.

²⁶ Diboto raja na marbisuk do sanga ise na marsala; diuhum ia do halahi nada adong ampunanna.

²⁷ Dilehen Tuhan do di hita panggora ni roha anso dirinta sandiri bolas tandaonta.

²⁸ Muda mardongan hatigoran, holong dohot setia raja mamarenta, gabe totop ma markuaso ia.

²⁹ Dihajopkon roha do na poso hara ni hagogoonna, jana marsahala do halak na matobang hara ni ubanna.

³⁰ Huhul marguna do parsorion na paet i, anso dipauba halak parngoluonna na sala i.