PODA 2 - BIBEL JAMITA NA DENGGAN

Guna ni na maniop habisuhon

¹ Jagit ma angka pangajaranku, ale anakku, jana paingot-ingot ma angka sipaingotku tu ho.

² Parrohahon ma sanga aha na bisuk jana parayak ma mangastuisa.

³ Olo, ale anakku, halungunkon ma parbinotoan jana pangido ma pangastuion.

⁴ Jalahi ma i songon na manjalahi sere, jana kojar ma i songon na mangkojar arta na buni.

⁵ Muda songon i botoonmu ma sanga aha arti ni biar maradopkon Tuhan jana maruli parbinotoan ma ho taringot tu Debata.

⁶ Tuhan do na mangalehen habisuhon; sian Ia do dapot jolma parbinotoan dohot pangastuion.

⁷ Dilehen Ia do tu halak na daulat pangurupion dohot parlinggoman.

⁸ Dijagohon Tuhan do angka halak na manghaholongi Ia jana dijagohon Ia do halak na tigor pambaenanna.

⁹ Muda dioloi ho do au, ale anakku, botoonmu ma sanga aha na tigor, na jujur dohot na denggan. Laing botoonmu muse ma sanga na songon dia ho patut mangolu.

¹⁰ Gabe marbisuk ma ho jana lehenon ni parbinotoanmu ma hasonangan di ho.

¹¹ Jagohonon ni pangastuionmu dohot hamaloonmu ma ho,

¹² jana sundatanna ma ho mangkarejohon na sala, boti muse padaoonna ma ho sian angka jolma na patubu-tubu parbadaan.

¹³ Nada ra be halahi mangolu mangihutkon dalan na sintong, hara ni na mangihutkon parngoluon na gok dosa.

¹⁴ Dihajopkon roha ni halahi mambaen hageduhan jana dijalahi halahi do hapuasan ni rohana di bagasan parbuatan na jat.

¹⁵ Panipu do halahi jana nada tarhaposi.

¹⁶ Anggo ho, ale anakku, tartulak ho do elek-elek ni dadaboru na so ture, dohot boru sileban na manggogo mangela ho marhite hata-hata na tabo.

¹⁷ Dadaboru na so setia do i tu halaklahina sandiri jana madung dihalupahon ia janjina tu Debata.

¹⁸ Muda kehe ho tu bagasna, dos do i na kehe ho tu hamatean. Kehe tusi sarupa dohot na kehe tu inganan ni jolma na mate do i.

¹⁹ Sanga ise na mandapotkon i nada jungada mulak be i tu dalan na manuju hangoluan.

²⁰ Hara ni i, ale anakku, tiruan ni halak na denggan ma ihutkon, jana jagohon ma dalan-dalan ni halak na tigor.

²¹ Angke, halak na jujur do na mangingani tano, jana halak na bulus marroha do na angkon tongtong tinggal disi.

²² Tapi anggo halak na jahat dohot parjehe paruaron do sian luat on, songon duhut na niumpat sian tano.