PODA 13 - BIBEL JAMITA NA DENGGAN

¹ Diparrohahon dakdanak na bisuk do poda ni amangna, tapi muda halak na bulbul nada ra manangihon sipaingot.

² Hata ni halak na denggan parohon hauntungan; halak na geduk giotna mangasa hagogoan.

³ Halak na jamot mandok hatana, gabe aman; halak na purpur hatana dondonan ni partinaonan.

⁴ Bahat do por ni roha ni na losok hape umpe sada na dapotsa; halak na padot markarejo dapotsa do sude por ni rohana.

⁵ Halak na jujur nada dihagioti pargabuson, tapi pangalaho ni na jahat hahaila do dohot sigoraon.

⁶ Hajujuron do mangalinggomi halak na burju; hajahatan mangago halak na so tontu.

⁷ Adong do halak paula-ula na kayo hape nada mararta; adong halak na paula-ula pogos hape na sun morana.

⁸ Dipake na kayo do hepengna anso aman ngoluna; hapengani halak na pogos bebas do sian ancaman.

⁹ Songon sinondang na manyirlak do halak na daulat; tapi halak na jahat songon lampu na giot mintop do ia.

¹⁰ Mambaen parbadaan do gincat ni roha; tapi na manangihon poda dapotan bisuk do.

¹¹ Momo do abis arta na ompot harorona, tapi mur tu kayona do na palagutkon sasaotik.

¹² Pahancitkon roha do arop ni roha na sundat, tapi jop do roha muda tulus arop ni roha.

¹³ Sanga ise na manulak poda mananggung resikona, tapi sanga ise na mangoloi parenta, dapotan upa do ia.

¹⁴ Haroroan ni ngolu do pangajaran ni halak na bisuk, na mambaen malua halak sian parmaraan.

¹⁵ Hapistaran mangkorhon hasangapan, tapi muda dalan ni parjehe parohon tilako.

¹⁶ Jolo marpikir anso nibaen, i do halak na marroha; halak na bodo paboa-boahon haotoonna.

¹⁷ Utusan na marroha jahat patubu parbadaan; suruan na nihaposan parohon pardamean.

¹⁸ Jolma na so ra ajaran gabe marpogos jana marlayas, halak na mangargahon sipaingot dipasangap donganna.

¹⁹ Dengganna i antong anggo dapot por ni roha! Halak na jahat nada ra morot sian hajahatanna.

²⁰ Muda mardongan dohot halak na marroha, gabe marbisuk iba; muda margaul tu halak na bodo, gabe iba hona mara.

²¹ Sai dikojar hasusaan do halak pardosa, halak na denggan sai manjagit hadengganan.

²² Halak na denggan pateankon sinadongan tu pomparanna; sinadongan ni pardosa pinda ma i tu halak na burju roha.

²³ Tano na kosong tarbaen parohon bahat panganon tu halak na so marsinadongan, hape dipadiar halak na jungkat do i tarulang.

²⁴ Na so mangaloncing anakna, nada marholong ni roha tusia muda holong roha, angkon barani iba mangaloncingsa.

²⁵ Sai na tuk do baenon ni halak na burju roha, hape anggo halak na jahat sai marhahurangan.