PODA 10 - BIBEL JAMITA NA DENGGAN

Angka poda ni si Salomo

¹ Angka on ma poda ni si Salomo: Anak na marroha, i ma jagar-jagar ni amangna; anak na oto, hasusaan ni roha ni inangna.

² Sinadongan na dapot sian hageduhan nada mangalehen hauntungan; tapi hatigoran bisa do paluahon halak sian hamatean.

³ Nada padiaron ni Tuhan halak na burju malean; tapi anggo hagiot ni halak na jahat nada marhatulusan.

⁴ Halak na losok madabu tu hapogoson, marhite hapadoton markarejo dapot hamoraon.

⁵ Halak na pistar palagut suha di musimna; tapi barang ise na modom hatiha manyabi, i ma na parohon ila tu dirina.

⁶ Maruli pasupasu do halak na denggan. Martabuni do hakejamon di balik ni hata ni halak na jahat.

⁷ Marrumang pasupasu do halak na burju diparningotan, tapi halak na jahat ompot do dihalupahon.

⁸ Diparrohahon na malo do hata sipaingot, tapi giot madabu do anggo halak na oto mangkobar.

⁹ Sonang do halak na burju, tapi tartangkup do halak na jahat.

¹⁰ Sanga ise na mangkidopkon mata, patubu hasusaan; sanga ise na oto manghatai, angkon madabu.

¹¹ Pamangan ni halak partigor i do haroroan ni ngolu, tapi manyimpan hakejamon do pamangan ni halak parjahat.

¹² Goyak ni roha patubu partongkaran; holong ni roha mangampuni sudena hasalaan.

¹³ Halak na pistar paruarkon hata na marbisuk, halak na oto porlu do hona sambok.

¹⁴ Halak na bisuk palagut parbinotoan; muda mandok hata halak na oto, sai pabingkas parbadaan.

¹⁵ Diondihon sinadongan i do na kayo, tapi disegoi hapogoson i do halak na pogos.

¹⁶ Upa ni halak partigor mambaen hangoluan, tapi padapotan ni halak parjahat hum na manambai dosa.

¹⁷ Sanga ise na manangihon sipaingot, na giot masonang ma i, sanga ise na so ra mangoku dosana, di bagasan bahaya ma i.

¹⁸ Halak na manabunihon hosom ni rohana, panipu do i, halak na pasarsarkon late, na bodo do i.

¹⁹ Mur bahat mangkobari, mur bahat do hatiha mardosa, muda giot bisuk, gumonan do hohom sajo iba.

²⁰ Hata ni halak na burju, songon perak na asli pikiran ni halak na jahat nada mararti.

²¹ Hara ni hata ni halak na burju, bahat halak dipasupasu haotoon ni halak na bodo mangago dirina sandiri tutu.

²² Hara ni pasupasu ni Tuhan do jolma gabe makayo, marloja-loja markarejo nada patamba harto.

²³ Halak na oto dihagioti do mambaen sala; halak na bisuk sai manjalahi habisuhon.

²⁴ Halak na bulus dapotsa por ni rohana; halak na jahat dumpangan na nihabiaranna.

²⁵ Muda mangalantap topan, mago ma parjahat i, hape anggo halak na jujur sai malua do i.

²⁶ Songon asom tu ipon sanga songon timus tu mata, songon i do halak na losok tu na marsuru ia.

²⁷ Pasangap ma Tuhan, anso lolot ho mangolu; anggo halak na jahat mate do painte so dapot hatihana.

²⁸ Arop ni roha ni halak na denggan mambaen ia marjop roha; arop ni roha ni halak na jahat do na soada.

²⁹ Halak na jujur dilinggomi Tuhan; halak na mambaen jahat diabiskon.

³⁰ Halak na ias marroha mangolu aman; halak na jahat usiron do sian tano pusakona.

³¹ Halak na bulus marroha pajojorkon hata na bisuk; halak na jahat, hona gotap do dilana.

³² Halak na bulus marroha pangkataina pasonang roha; hata ni halak na jahat sai pahancit roha.