PARJAMITA 5 - BIBEL JAMITA NA DENGGAN

Ulang matibutu iba marjanji

¹ Jamot ma muda giot kehe tu Bagas Ni Tuhan. Dumenggan do kehe tusi laho marsiajar ulang pado laho manghaulkon haul, songon na nibaen ni angka jolma na oto. Nada tarpaasing halahi sanga dia na tutu dohot sanga dia na sala.

² Jolo nipikiran ma painte so nidok hata, jana ulang matibutu marjanji tu Debata. Di banua ginjang do Ia jana ho di tano on, jadi bangkol ma ho mandok hatamu.

³ Harana songon nipi na ro hara ni bahat ni halojaan, songon i muse ma hata na oto ro hara ni bahat ni pangkataion.

⁴ Jadi muda marjanji ho tu Debata, sigop ma ho patuluskon i. Nada dihagioti rohaNia jolma na bodo pangalahona. Antong patulus ma janjimu.

⁵ Dumenggan do indangkon sai nibaen janji ulang pado na so patuluskon.

⁶ Ulang ma angka hatamu sandiri mambaen mardosa ho, jadi gabe tarpaksa noma ho mandok tu malim na marhobas tu Tuhan, bahaso na sala do ho. Porlu ma he Debata gabe muruk hara ni angka hatamu jana manyegohon angka na nikarejohonmu?

⁷ Songon nipi bahat na so adong artina, laing songon i muse ma na so marguna bahat hata-hata. Tapi habiari ma Tuhan.

Magopo do ngolu i

⁸ Ulang ma longang muda niida parkuaso mamisat halak na pogos, mangarampas hak ni halahi jana nada dilehen hatigoran tu halahi. Diondihon atasanna do ganop pagawe jana halahi na dua diondihon pajabat na umpangkat.

⁹ Jana ngolu ni raja pe marguru tu suha ni karejona do.

¹⁰ Barang ise na impol rohana tu hepeng, nada tarpapuas dohot hepeng, jana barang ise na impol rohana tu sinadongan, nada tarpapuas dohot pandapotanna. On pe magopo do.

¹¹ Mur bahat sinadongan mur bahat do halak silehenonniba mangan. Umpe adong hauntungan di nampunasa, hum na kayo ma ia na binotonia.

¹² Sada halak parkarejo bolas jadi do nada tuk panganonna, tapi palamani tarbaen do modom sinok. Sabalikna, sada halak na mora na songon i bahat sinadonganna, gabe nada tarbaen ia modom patunda ni sinadonganna i.

¹³ Huida do di tano on sada pangalaho siarsakkonon: Sada halak na palagut arta tu hamamasa ni hamagoan.

¹⁴ Hape mago ma arta i hara ni sada-sada hasusaan, jadi gabe nada adong be na nipateankonnia tu angka dakdanaknia.

¹⁵ Marsaemara do hita sorang; songon i muse do tadingkononta tano on, umpe maroban sanga aha sian sasude na tahalojahon.

¹⁶ Nada tigor i! Parkehenta laing songon hatiha di na ro hita. Marloja-loja hita laho manangkup angin, jana aha do gunana?

¹⁷ Di bagasan hagolapan, hasusaan, arsak ni roha, hamuruhon dohot parkancitan do hita salolot mangolu.

¹⁸ Jadi gabe huboto ma, anggo na dumenggan di hita, i ma mangan, minum dohot mangkilalahon parkarejoan dohot suha ni karejonta salolot di ngolu na pendek na nilehen ni Debata di hita; i do jambarta.

¹⁹ Muda maruli sada halak hamoraon sanga sinadongan sian Debata, jana dipaloas ia mangkilalahon hamoraon i, angkon mandok tarimakasi ma ia jana daionnia ma sude suha ni karejonia. I pe laing silehen-lehen ni Debata do i.

²⁰ Digohi Debata ma roha ni halakna i dohot hamogaan, jadi gabe nada sak rohania mamikirkon salaho tu pendek ni ngolu on.