PARJAMITA 4 - BIBEL JAMITA NA DENGGAN

¹ Dung i huparrohahon muse ma sada hageduhan na masa di tano on. Martangisan angka halak na hona sosak jana nada adong na ra mangurupi halahi. Umpe sahalak na ra mangurupi, harana godang do kuaso ni angka na manyosak i.

² Mangiburu do au marningot angka halak na dung honok marujung ngoluna harana martuaan do halahi ulang pado na mangolu.

³ Tapi na gumodang dope tuana muse, i ma angka jolma na so sorang dope, harana nada diida halahi dope hajahatan na dikarejohon di tano on.

⁴ Laing huboto muse dope bahaso songon i situtuna jolma markarejo, hum hara ni na mangiburu paida-ida pandapotan ni hombar bagasna. Magopo do sudena i songon karejo na manangkup angin.

⁵ Anggo ninna, hum halak na oto sajo do na juguk mangalompit tangan jana na padiarkon dirina mate malean.

⁶ Aropku tutu do i, tapi gumonan do sinadongan na so sadia mardongan hasonangan umpado karejo marsitutu mamake dua tangan jana manangkup angin.

⁷ Adong dope na magopo di ngolu on.

⁸ Adong do halak na mamunjung ngoluna so mardakdanak, sanga pe marhahanggi. Haru songon i pe, laing marsitutu do ia karejo jana rohania pe nada jungada sonang dibaen artania. Na giot di ise dehe ia maridi hodok dohot na manulak sude hasonangan? I pe laing magopo do, jana i ma sada parngoluon na mardangol.

⁹ Maruntungan do sidua halak sian na mamunjung. Muda markarejo halahi, dumenggan ma suhana.

¹⁰ Muda tinggang na sada, tartolong na sada nari. Hape muda tinggang sada halak, hape sasada ia sajo do, marjaya ma ia, dibaen nada adong na tarbaen manolong ia.

¹¹ Di borngin na ngali, marsipalasan do dua halak na modom palambung-lambung, tapi bia ma baenon ni halak palaskon pamatangna anggo sasadasa do?

¹² Tartangkis do serangan muda mardalan dua halak sauduran, tapi halak na mamunjung sasahalak mura do ditaluhon. Tolu tali na dipuyu gabe sada, maol do gotapkonon.

^13-14 Bolas do halak na pogos gabe raja, jana sada halak tahanan bisa do pinda tu ginjang ni habangsa. Tapi muda maototu do raja i manjagit sipaingot di umurna na tobang, gabe jumatjat dope jambarnia sian doli-doli na pogos tapi pistar.

¹⁵ Hupikirkon salaho tu sude jolma na di tano on, gabe huboto ma na ingkon adong do sian tonga-tonga ni halahi sada doli-doli na giot manggontihon raja.

¹⁶ Nada taretong bahat ni rayat na nipimpinnia, tapi muda mijur ia sian habangsa i, nada adong na mandok tarimakasi marningot na denggan na nibaennia. Tutu do, magopo do sudena songon karejo na manangkup angin.