PARJAMITA 3 - BIBEL JAMITA NA DENGGAN

Marhatiha do sasudena

¹ “Marhatiha do sude na masa, jana sanga aha pe di toru ni langit adong do hatihana.

² Adong do hatihana tubu, dohot hatihana mate, adong do hatihana manyuan, dohot hatihana mambuat suha.

³ Adong do hatihana mamunu dohot hatihana pamalumkon, manyego-nyego, dohot hatihana paturehon.

⁴ Adong do hatihana tangis dohot hatihana martata; hatihana mangandungi dohot hatihana manortor.

⁵ Adong do hatihana mangambungkon batu dohot hatihana papunguhon batu; hatihana marsihaolan dohot hatihana mangorom diri taringot tusi.

⁶ Adong do hatiha laho padapotkon dohot hatiha agoan; hatiha laho pasimpankon dohot hatiha marabur-abur.

⁷ Adong do hatihana manyibak-nyibak dohot hatihana manjaiti; hatihana mangkohom dohot hatihana mandok hata.

⁸ Adong do hatiha manghaholongi dohot hatiha margoyak ni roha; hatiha laho marporang dohot hatiha mardame.

⁹ Aha ma he guna ni sude halolojanta?

¹⁰ Huboto do, dilehen Debata do di hita boban na dokdok.

¹¹ Ditontuhon Ia do hatiha na topet di sasude na adong. Dilehen Ia do di hita por ni roha laho umboto ari na giot ro, tapi nada unjung dilehen Ia hasosombu di hita laho mangastui sude pambaenanNia.

¹² Huboto do, nada adong na dumenggan di hita sian na marjop ni roha dohot na mangkilalahon ngolu on salolot di ngolunta.

¹³ Angkon mangan do hita sudena, minum dohot mangarasoi suha ni karejonta. Silehen-lehen ni Debata do i.

¹⁴ Huboto do na tongtong do adong salolot-lolotna sude pambaenan ni Debata. Nada tartambai sanga tarurahi jolma pambaenan i, haru hum saotik pe. Jana songon i do dibaen Debata, anso mabiar hita tuSia.

¹⁵ Na masa saonnari, na dung masa do na salpu i. Na giot adong, na dung honok do i adong. Ditontuhon Debata do anso masa mangulahi, na dung masa hian.”

Hageduhan di tano on

¹⁶ Adong dope na huida di tano on: Sanga na di dia adong hatigoran dohot hadengganan, disi muse do adong hajahatan.

¹⁷ Ninna rohangku do di bagasan, uhumon ni Debata do halak na burju dohot halak na jahat, angke sude pangalaho dohot sude pambaenan na tarjadi do i di hatiha na nitontuhon ni Debata.

¹⁸ Pangkilalaanku songon on do: Diuji Debata do halahi laho patuduhon bahaso na so marasing halahi dohot binatang.

¹⁹ Sanga na bia pe, sarupa do tutu jambar ni jolma dohot binatang. Na sada muli mate, na asing i pe songon i muse. Rap na ditompa do na dua i. Jadi nada maruntungan jolma sian binatang, angke magopo do ngolu i di na dua i.

²⁰ Manuju tu inganan na sarupa do halahi. Na marmula sian abu do halahi jana muli mulak tu abu.

²¹ Nada he taboto, na manaek do tondi ni jolma tu ginjang jana tondi ni binatang i mijur tu bagasan tano?

²² Jadi hara ni i huboto ma na so adong do na dumenggan di jolma sian mangkilalahon parkarejoanna dohot suha ni karejona. Lobi sian i nada adong na tarkarejohonsa. Nada botoonnia sanga aha na giot masa dung mate ia.