PARJAMITA 1 - BIBEL JAMITA NA DENGGAN1 On ma angka hata ni Parhapistaran, i ma anak ni si Daud, raja di Jerusalem. 2 Didok Parhapistaran i do: Magopo do sasudena jana nada marguna! Parcuma do ngolu i, nada adong artina sudena. 3 Markarejo hita salolot mangolu, maradu hodohan. Hape dia ma suhana na tarhagodangkon hita? 4 Tarida sundut na sada jana mago ma sundut na asing, hape nada marnamuba tano on. 5 Laing bincar do mataniari jana laing lusut muse. Jana mulak tu ingananna humani, dung i bincar mangulahi. 6 Mangombus ma alogo tu Selatan, dung i mangombus tu Utara; marputar-putar ia, dung i mulak mangulahi. 7 Mardalan tu laut do sude batang aek, hape laing so marnagok do laut i. Mulak aekna i tu julu ni batang aek i, dung i mardalan pahae mangulahi. 8 Sude do paloja roha jana nada tarhatahon loja ni roha i. Nada marnabutong matanta i manatap; pinggolta i nada marnapuas manangihon. 9 Sanga aha na jungada tarjadi, tarjadi muse do mangulahi. Sanga aha na nibaen, giot baenon muse dope. Nada adong sanga aha na imbaru di tano on. 10 Adong halak na mandok, ‘Ligi ma, indon na imbaru!’ Hape, na dung adong hian do i dompak so sorang hita. 11 Nada diingot jolma na masa di hatiha na salpu. Laing songon i muse ma na masa saonnari dohot sanoli on, indangkon na ingoton ni halak i di hatiha na giot ro. Pangalaman ni Parhapistaran i 12 Au Parhapistaran, mamarenta di Jerusalem gabe raja di Israel. 13 Hupasada do rohangku laho manangkasi dohot marsiajari sude na masa di tano on. Sun do dangolna jambar na dilehen ni Debata tu hita. 14 Madung huida sude na masa di tano on. Pos ma rohamu, magopo do sudena i, tarsongon karejo na manangkup angin. 15 Na peol nada tarpatigor, jana na so adong nada taretong. 16 Ninna rohangku, “Na pistar do au, dao umpistar sian sude halak na mamarenta di Jerusalem dompak so au. Torang situtu do huastui arti ni habisuhon dohot parbinotoan.” 17 Jadi hupasada do rohangku laho mamboto parkotian ni parbinotoan dohot haotoan, antara ni habisuhon dohot na pamalo-malohon. Hape songon na manangkup angin sajo do au. 18 Harana, mur bahat maruli habisuhon, mur martamba do arsak ni roha. Jana na manambai parbinotoan, mur manambai angka hasusaan do. |
Indonesian Bible Society
Indonesian Bible Society