PANGARATAION 4 - BIBEL JAMITA NA DENGGAN

Disosoi si Musa halak Israel anso mangoloi

¹ Dung i didok si Musa ma tu bangso i, “Oloi hamu ma sude aturan na huajarkon tu hamu, anso tola hamu mangolu dohot mangingani tano na giot silehenon ni Tuhan, Debata ni ompumunu tu hamu.

² Sandok na huparentahon i, ulang tambai sanga urahi hamu saotik pe. Oloi hamu ma angka parenta ni Tuhan Debatamunu na hulehen i tu hamu.

³ Diida hamu sandiri do sanga aha na nibaen ni Tuhan di Dolok Peor. Sandok halahi na marsomba Baal di inganan i, dipusa Ia do,

⁴ hape anggo halak na tongtong setia tu Tuhan Debatamunu laing mangolu do lopus saonnari.

⁵ Madung huajarkon sude angka aturan i tu hamu, songon na niparentahon ni Tuhan Debata tu au. Karejohon hamu ma sudena i di tano na giot simasuhan dohot siingananmunu.

⁶ Patutna ma nian setia hamu patuluskon sude aturan i. Muda dibaen hamu songon i, nalnal ma abisuhonmunu maradopkon angka bangso na asing i. Muda dibege halahi taringot tu angka aturan i, dokkonon ni halahi ma, ‘Na bisuk jana na pistar ma da antong bangso na godang on!’

⁷ Anggo angka bangso na asing sanga na bia pe godangna, nada adong debatana na songon i donokna muda dihaporluhon songon donok ni Tuhan Debatanta tu hita. Dialusi Ia do hita sanga na andigan sajo hita pio-pio mangido tolong.

⁸ Angka bangso na asing sanga na bia pe godangna, nada adong aturanna na songon tigor ni angka aturan na huajarkon tu hamu sadari on.

⁹ Parrohahon jana denggan ingot hamu, anso ulang lupa hamu sapanjang mangolu di sude na nisaksihonmunu sandiri. Baritahon hamu ma i di pomparanmunu,

¹⁰ taringot tu ari i di na jongjong hamu di adopan ni haroan ni Tuhan Debatamunu di Dolok Sinai. Didok Ia do di hatiha i tu au, ‘Palagut ma bangso i. GiotKu anso ditangihon hamu sanga aha na giot sidokkononKu, anso marsiajar halahi marpangoloion tu Au sapanjang mangolu halahi jana anso diajari halahi angka dakdanak ni halahi marpangoloion tu Au.’

¹¹ Baritahon hamu ma tu angka dakdanakmunu sanga songon dia parromunu lalu jongjong di pangkal ni dolok i na nitutupan ni timus na manggolap songon ombun na manyorop dohot api na gara-gara lalu tu langit.

¹² Baritahon hamu ma tu halahi songon dia pangkuling ni Tuhan tu hamu sian api i, songon dia pambegemunu di soraNa i, tapi umpe haidaan sanga na songon dia pe rupana.

¹³ Disi do dipabotohon Ia tu hamu sanga aha sipatupaonmunu laho manggohi parjanjian na nibaenNia dohot hamu. Parenta na sampulu na nisuratkonNia tu batu na dua hoping i angkon oloanmunu do.

¹⁴ Disuru Tuhan do au mangajarkon sude aturan sioloanmunu di tano na giot masuhan dohot siingananmunu i.”

Sipaingot anso ulang marsomba tu debata na asing

¹⁵ “Di na mangkuling Tuhan tu hamu sian api i di Dolok Sinai, nada adong diligi hamu rupaNa. Jadi, anso padenggankon di hamu sandiri, patut ma ingotonmunu!

¹⁶ Jago ma hamu anso ulang jabat mardosa hamu hara ni na mambaen patung di hamu sandiri gabe sisombaon sanga na bia pe rupana, halaklahi sanga dadaboru,

¹⁷ binatang sanga unggas,

¹⁸ binatang na manjurur sanga ihan.

¹⁹ Ulang jabat mardosa hamu hara ni na marsomba jana mangoloi tu sanga aha na niidamunu di langit, i ma mataniari, bulan dohot angka bintang. Dipadiar Tuhan Debatamunu do anggo angka bangso na asing manyomba angka i.

²⁰ Tapi anggo hamu bangso na nipaluaNia do sian Mesir, inganan liang bosi di hamu. Dioban Ia do hamu haruar sian luat i, anso gabe bangsoNia sandiri, songon na masa di hamu saonnari.

²¹ Patunda ni hamu ma muruk Tuhan Debatamunu i tu au jana disumpahon Ia anggo au na so jadi manaripari Batang aek Jordan laho mamasuhi tano napu na giot silehenonNia tu hamu.

²² Nada sadia honok nari taripar ma hamu jana ingananmunu ma tano na napu i, hape anggo au nada dohot be, marujung dison noma ngolungku.

²³ Denggan ma paingot-ingot hamu! Ulang lupa hamu di parjanjian na nibaen ni Tuhan Debatamunu dohot hamu. Oloi hamu ma parentaNia; ulang baen hamu di hamu sandiri patung na gabe sisombaon sanga na bia pe rupana,

²⁴ dibaen songon api do Tuhan Debatamunu i na mamosokkon; nada ra Ia padiarkon adong imbangNia.

²⁵ Muda dung honok hamu sanoli on maringanan di luat i, jana madung maranak marpahompu, ulang muse mardosa hamu hara ni na mambaen di dirimunu patung ni bagi aha sajo pe. Hajahatan do pangalaho na songon i di adopan ni Tuhan, jana na mambaen bonsir gabe muruk Ia.

²⁶ Langit dohot tano ma na gabe saksimunu sadari on, muda ampot nada marpangoloion hamu tu na hudok i, manigor mago ma hamu sian tano na giot siingananmunu na di ipar ni Batang aek Jordan i. Nada pola honok hamu tinggal disi, tapi roncohononkon do sudena.

²⁷ Sarsarkonon ni Tuhan ma hamu di tonga-tonga ni angka bangso na asing jana saotik noma sian hamu na mangolu.

²⁸ Marsomba tu angka debata na nibaen ni tangan ni jolma ma hamu disi, tu angka debata na sian hayu dohot batu, na so marnida sanga marbinege, na so tarbaen mangan sanga marnianggo.

²⁹ Jalahanmunu ma disi Tuhan Debatamunu, jana muda sian sandok roha dohot tondimunu hamu manjalahi Ia, dumpang hamu ma Ia.

³⁰ Muda di bagasan hasusaan hamu, jana timpal sude parmaraan i tu dirimunu, gabe mulak tu Tuhan ma hamu ujungna jana oloanmunu ma Ia.

³¹ Debata na gok ibo ni roha do Tuhan i. Nada tadingkononNia sanga abiskononNa hamu, jana nada halupahononNia parjanjian na nibaenNia sandiri dohot ompumunu.

³² Tangkasi hamu ma hatiha na dung salpu, dao taran so sorang dope hamu, mamungka sian ari di na nitompa ni Debata jolma di tano on. Jalahi hamu ma di sandok portibi on. Unjung dehe tarjadi pangalaho na songon on godangna di jolo ni on? Adong dehe halak na jungada umbege taringot tu na masa sisongon on?

³³ Unjung ma he adong sada bangso na hot mangolu dung dibege sada debata mangkuling tu halahi sian api, songon na nialamanmunu i?

³⁴ Jungada ma he adong sada debata na puluk mambuat sada bangso sian bangso na asing lalu mambaen halahi bangsonia sandiri, songon na nibaen ni Tuhan Debatamunu di hamu di Mesir? Diida hamu sandiri do sanga songon dia godang ni hagogoon ni Debata parohon parmaraan dohot porang, mambaen angka hahomangan dohot patuluskon angka pangalaho na jorbut.

³⁵ Dipatuduhon Tuhan do sudena i tu hamu laho patorangkon na sasada Ia do Debata, jana nada adong be na asing.

³⁶ Sian langit, dipatubegehon Ia do soraNia tu hamu laho mangajari hamu; di tano on, madung dipatidahon Ia tu hamu apiNia na badia, jana sian api i pe mangkobari do Ia tu hamu.

³⁷ Hara ni na holong rohaNia di ompumunu, madung ditodo Ia hamu; mardongan godang ni kuasoNia, madung dioban Ia hamu ruar sian Mesir.

³⁸ Di jolomunu, diusir Ia angka bangso na gumodang boti na gumogo sian hamu, laho pataruhon hamu tu tano ni halahi na giot silehenon ni Debata tu hamu, i ma luat na gabe hamu puna saonnari.

³⁹ Antong sadari on, ingot jana na so tola lupa hamu: Debata di langit dohot di ginjang ni tano on do Tuhan. Nada adong debata na asing be.

⁴⁰ Oloi hamu ma sandok aturan na hulehen tu hamu sadari on, jadi gabe horas ma hamu dohot pomparanmunu. Sai torus ma hamu mangolu di tano na nilehen ni Tuhan na gabe hamu puna salolot-lolotna.”

Angka kota haporusan di Habincaran ni Batang aek Jordan

⁴¹ Dung i ditodo si Musa ma tolu kota di Habincaran ni Batang aek Jordan

⁴² na gabe kota haporusan inganan ni halak paluahon dirina muda adong halak sian na so nisangajona mamunu jolma na so musuna. Tola ma ia maporus tu sada sian kota i anso ulang mate niuhuman ia.

⁴³ Di Marga Ruben dibaen ma kota Beser, na di napa parhorsihan na di dolok. Di Marga Gad kota Ramot na di Luat Gilead; jana di Marga Manase kota Golan, na di Luat Basan.

Patujolona di na mangalehen aturan ni Debata

⁴⁴ Dilehen si Musa ma angka aturan dohot pangajaran ni Debata tu bangso Israel.

⁴⁵ Dilehen ia angka aturan tu halahi dung haruar halahi sian Mesir,

⁴⁶ jana taran di rura na di Habincaran ni Batang aek Jordan, na patongtang dohot kota Bet-Peor. Si Sihon raja ni halak Amori humani do nampuna luat i, i ma na sanga mamarenta di kota Hesbon. Ditaluhon si Musa dohot bangso Israel ma ia di na haruar halahi sian Mesir.

⁴⁷ Dibuat halahi ma tano ni Raja Sihon i, bope tano ni Raja Og na sian Basan, i ma raja ni halak Amori na asing na maringanan di Habincaran ni Batang aek Jordan.

⁴⁸ Manggistang ma tano i sian kota Aroer di topi ni Batang aek Arnon, torus tu Utara lopus tu Dolok Sirion, i ma Dolok Hermon.

⁴⁹ Laing masuk tu luat i do tano na di Habincaran ni Batang aek Jordan tu Selatan lalu tu Laut Mate, dohot tu Habincaran lalu tu pangkal ni Dolok Pisga.