PANGARATAION 32 - BIBEL JAMITA NA DENGGAN

¹ “Tangihon, o langit, giot mangkuling au, o tano, patinggil ma pinggolmu!

² Sai songon parmijur ni udan ma pangajaranku manetehi ma i songon ombun. Jana songon udan ma na hudokkon i tungkis tu suan-suanan na martumbik, songon panetek-netek ni udan di ginjang ni duhut na martubuan.

³ Hupagodang do goar ni Tuhan bangsoNa i mamaritahon hagodanganNa.

⁴ Tuhan ma da na mangondihon ho gumogo, sude dalanNa tigor jana sanggam do. Setia do Debatamu jana ias rohaNa, na denggan dohot na patut do dibaen Ia.

⁵ Tapi anggo hamu, i ma sada bangso na sai marroha mago, na so patut gabe bangsoNa, na gok akal busuk dohot dosa.

⁶ Songon i ma he pamalosmu di hadengganan ni Tuhanmu, ale jolma na so marbisuk boti na sun otomu? Nada he Amangmu do Ia, na manjadihon ho, na manompa hamu gabe sada bangso?

⁷ Ingot ma ari na salpu, hatiha najoloan, barita di parningotan laing tarsimpan, sapai angka amantamunu, sude angka na masa na salpu, sapai ma angka hatobangonmunu, anso dipaboa tu hamu angka na masa na salpu.

⁸ Ditontuhon Ia batas di ganup bangso, dibagi do i hombar tu torop ni bangso Israel.

⁹ Hape anggo pompar ni si Jakob on dipili Tuhan diSia sandiri antong.

¹⁰ Dapot Ia halahi hatiha diparedang-edangan, di na lungun boti na harsang di halongonan. Dipahan Ia halahi antong jana diondihon Ia, songon na manjagohon di diriNa.

¹¹ Songon halihi na mangajar anakna habang, ditarehon habongna anso ulang madabu. Songon i do Tuhan manjagahon Israel, anso ulang madabu.

¹² Tuhan i sandiri do mamimpin bangsoNa, so pola diurupi angka debata.

¹³ Tola ma halahi mangarajai partoran, di tano na marbatu inganan ni zetun martubuan. Panganon ni halahi do parbatu ni angka ladang minum aer ni loba harangan sian batu na marigang.

¹⁴ Dumenggan pahan-pahananna boti bahat susuna; gandum dohot aek ni anggur, i noma na dumengganna.

¹⁵ Gabe maradong bangso ni Tuhan, tapi sai tagi mangalo, ditulak halahi do Sipalua na gumogo. Mamokmohi halahi, butongan sipanganon. Ditadingkon halahi do Debata Na Manjadihon.

¹⁶ Marsomba halahi tu patung, gabe mangiburu ma Tuhan. Gurgur ma murukNa dibaen hajahatan i.

¹⁷ Marhaul halahi tu angka sombaon angka debata na so ditanda, sanga na so dihabiari angka ompuna.

¹⁸ Ditadingkon halahi do Debata Sipalua, Tuhan silehen ngolu dihalupahon.

¹⁹ Marnida pangalaho ni angka dakdanakNa, muruk Tuhan jana manulakkonsa.

²⁰ Didok ma, ‘Nada parduli Au di halahi, bangso sijogal roha na so setia i.’

²¹ Patung na nipele ni halahi do mambaen muruk Au, tu na nigoaran ni halahi debata mangiburu Au, debata na so tutu Debata. BaenonKu ma sada bangso anso mangiburu halahi muruk tu bangso ni angka jolma na bodo i satutuna nian bangso na so adong do i.

²² Mamulatak ma murukKu songon api na mangabiskon sasude na di portibi. Api na rarat lalu tu taruma ni tano i manutung dolok lalu tu angka uratna i.

²³ Nada mantak Huparo mara Hupake siorKu mangalosa.

²⁴ Marmatean ma halahi baenon ni arun dohot na malean disintak hamatean hara ni nyae sihabiaran. Marroan binatang panyoro manjomahi ulok na marbisa mambaen mangangguhi halahi.

²⁵ Parporangan mambaen marmatean di dalan-dalan, na di bagas pe didondoni habiaran. Naposo nauli bulung jagar-jagar ni bangso ma giot mate na baru sorang, na maradu tobang pe nada dia imbarna be.

²⁶ Sai giot pusaonKu do halahi sudena nian, anso ulang be adong tu halahi parningotan.

²⁷ Tapi nada musuna marginjang ni roha songon na maropuk bangsongKu patundana, angke hum Au, Au sajo do da na mangabiskonsa.

²⁸ Israel ma bangso na so marroha nada adong di halahi na bisukna.

²⁹ Nada diastuisa biasi talu halahi; nada mamoto sude na masa i.

³⁰ Biasi talu saribu dibaen na sada jana saratus ribu dibaen na dua alona? Na ditadingkon Tuhanna do halahi dipalapas Debata na gumogo i.

³¹ Diboto musu ni Israel sandiri do na so margogo debatana i, nada alona Debata ni Israel na hebat i.

³² Musu ni Israel na songon jahat ni Sodom dohot Gomora, suman tu bona ni anggur, paet boti halalango batuna

³³ aek ni anggurna i ma rasun ni ulok na marbisa.

³⁴ Diingot Tuhan do sude, pangalaho ni musuna, Diuhumi Ia halahi, di hatiha hadenggananNa.

³⁵ Palaluon ni Tuhan ma hosomNa, anso didabu tu halahi uhumanNa; ro do hatihana madabu halahi; ma pola donok arina maropuk halahi.

³⁶ Paluaon ni Tuhan ma bangsoNa, jana haholonganNia angka naposoNa, muda diida Ia halahi gale-gale, jana abis gogona sude.

³⁷ Sapaan ni Tuhan ma tu bangsoNia i, ‘Di dia ma he angka debata na niarop ni rohami?

³⁸ Dilehen ma tu halahi haul na martabo-tabo, minum aek ni anggur bahat dilehen ho. Padiar ma halahi mangurupi ho, suruhon halahi anso ro anso saonnari halahi ro paluahon ho.’

³⁹ Tapi songon i pe Au, Au sandiri do na tutu Debata; asing sian Au nada adong be Debata. Au do na mamunu, dohot na pangoluhon mambugangi dohot na pamalumkon. Muda jabat do Hubaen pangalaho sanga na aha sahalak pe nada tarbaen mangalosa.

⁴⁰ Au do satutuna na mangolu, Au do Debata, Huangkat tanganKu laho marsumpa,

⁴¹ dung salpu kuaso ni podangKu na tajom na marhillong padalanonKu ma hatigoran. Hupalalu ma hosom tu sudena na magigi tu Au Hudabu uhumanna.

⁴² Margulu podangKu sap mudar ni halahi hona bunu ni podangKu sude na mangalo i. Nada paluaonKu hosa ni alo-alongki mate muse do na margasa dohot na tartaban i.

⁴³ Pasangap ma bangso ni Tuhan i, hamu ale angka bangso, sude na mamunu halahi uhumonNa do. PalaluonNa hosom tu musuna tapi ampunanNia do anggo dosa ni bangsoNa.”

⁴⁴ Diendehon si Musa dohot si Josua anak ni si Nun i ma ende on, gabe sudena ma halak Israel manangihonsa.

Dilehen si Musa angka sipaingot na parpudi

⁴⁵ Dung sidung pasahatkon angka parjanjian ni Tuhan tu bangso Israel,

⁴⁶ didok si Musa ma, “Jagohon hamu ma anso oloi hamu sude parenta na hulehen tu hamu sadari on. Ajarkon hamu ma i tu angka dakdanakmunu, anso dioloi halahi sude pangajaran ni Tuhan i di bagasan haburjuon.

⁴⁷ Nada hata na rumar angka pangajaran on, tapi hangoluan do. Oloi hamu ma sude pangajaran i, anso ginjang umurmunu di tano na so sadia lolot nari be buatonmunu, di bariba ni Batang aek Jordan i.”

⁴⁸ Laing di na sadari i, didok Tuhan ma tu si Musa,

⁴⁹ “Kehe ma ho tu partoran Abarim na di Luat Moab di bariba ni Jeriko. Manangkok ma ho tu Dolok Nebo jana tatap ma tano Kanaan na so sadia lolot nari be giot pasahatonKu tu bangso Israel.

⁵⁰ Anggo ho, Musa, di ginjang dolok i ma marujung ngolumu songon angkangmu si Harun na dung jumolo i di Dolok Hor.

⁵¹ Nada setia hamu na dua tu Au jana nada dipasangap hamu Au di adopan ni bangso Israel dompak di mual ni Batang aek Meriba hamu, i ma na di lambung ni kota Kades, di Halongonan Zin.

⁵² Jadi hara ni i, nada tola ho masuk tu tano na giot silehenonKu tu bangso Israel; hum manatap sian na dao do ho na tola.”