PANGARATAION 3 - BIBEL JAMITA NA DENGGAN

Israel manaluhon Raja Og

¹ “Dung i mardalan tu Utara ma hita mandapotkon Luat Basan. Ro ma si Og raja ni Basan mardongan sude tentarania laho mamorangi hita di lambung ni kota Edrei.

² Tapi didok Tuhan ma tu au, ‘Ulang ho mabiar tusia, Musa. Giot pasahatonKu do ia, tentarania dohot sude luatnia i tu ho. Baen ma tusia songon na nibaenmu tu si Sihon raja ni halak Amori na mamarenta di Hesbon i.’

³ Jadi laing Tuhan do na pasahatkon Raja Og dohot rayatna i tu hita, jana madung tabunu halahi sudena.

⁴ Di sada hatiha do tarampas sude kotana i – umpe sada kota na tinggal. Adong do onom pulu kota sudena na tarampas di sude Luat Argob na niparenta ni Raja Og na sian Basan.

⁵ Na nipatogu do kota i dohot angka tembok na gincat, pintu horbangan dohot goruk-goruk ni pintuna laho manutup angka horbangan i. Asing ni i adong dope bahat kota na asing na so martembok.

⁶ Taabisi do sude kota i jana tabunu sude halaklahi, dadaboru dohot dakdanak, laing songon na tabaen di angka kota ni Raja Sihon na sian Hesbon.

⁷ Tapambuati pahan-pahanan ni halahi jana tarampasi angka kota i.

⁸ Di hatiha i ma tabuat sian raja ni halak Amori na dua i tano na di Habincaran ni Batang aek Jordan, dohot Batang aek Arnon lalu tu Dolok Hermon. (

⁹ Sirion do didok halak Sidon goar ni Dolok Hermon jana Senir didok halak Amori.)

¹⁰ Tabuat do sude tano na nigomgoman ni Raja Og na sian Basan, angka kotana na di partoran, na di Gilead dohot Basan, lopus tu Habincaran marbalokkon kota Salka dohot Edrei.” (

¹¹ Hum Raja Og noma, na mangolu sian halak Refaim. Sian batu do dibaen poti ni bangkena, opat meter ginjangna, jana bidangna mardonok dua meter mamake suhat-suhat na somal. Lopus saonnari tarida dope i di Raba, kota ni halak Amon.)

Angka Marga na mangingani tano na di Habincaran ni Batang aek Jordan

¹² “Dung gabe hita nampuna tano i, hupasahat ma tu Marga Ruben dohot Gad luat na di Utara ni kota Aroer na di lambung ni Batang aek Arnon, dohot deba tano partoran Gilead dohot angka hutana.

¹³ Tu satonga Marga Manase hupasahat Luat Gilead na asing i, songon i Luat Basan na niparenta ni si Og humani, i ma sandok Luat Argob.” (Tarbarita do Basan na gabe tano Refaim.

¹⁴ Si Jair na sian Marga Manase, mambuat sude Luat Argob, i ma Basan lopus tu parbalohan ni Gesur dohot Maaka. Dibaen ia ma goar ni angka huta i mangihutkon goarnia sandiri, jana lopus saonnari laing tarbarita do i angka huta ni si Jair.)

¹⁵ “Anggo Gilead hupasahat tu horong Makir na sian Marga Manase.

¹⁶ Jana tu Marga Ruben dohot Gad hulehen ma luat na adong di antara ni Gilead dohot Batang aek Arnon. Parsitongaan ni batang aek i ma batas ni halahi di Selatan, jana di Utara Batang aek Jabok ma parbalohan ni halahi, deba nari i ma na gabe batas ni luat ni halak Amon.

¹⁷ Di Hasundutan manggistang ma tano ni halahi lopus tu Batang aek Jordan, sian Dano Gilead di Utara lopus tu Laut Mate di Selatan, torus tu pat ni Dolok Pisga di Habincaran.

¹⁸ Laing huparentahon do di hatiha i tu halahi: ‘Madung dipasahat Tuhan Debatanta i tu hamu tano na di Habincaran ni Batang aek Jordan baen siinganan. Saonnari, pasingkop hamu ma sinjata ni angka tentaramunu jana suru hamu ma halahi manaripari Batang aek Jordan manjoloi angka marga ni Israel na asing i, laho mangurupi halahi mambuat tano i.

¹⁹ Anggo dakdanak, dadaborumu dohot pahan-pahananmunu na bahat i, anggo i angkon tinggal ma jolo di angka kota na dung hulehen i di hamu.

²⁰ Urupi hamu ma dongan sabangsomunu lopus taringani halahi tano na giot silehenon ni Tuhan di halahi di Hasundutan ni Batang aek Jordan jana lopus tumbuk di roha ni Tuhan sonang ngolu ni halahi, songon na dung dibaenNia tu hamu dison. Dung salpu i tola ma hamu mulak tu tano na dung hupasahat on tu hamu.’

²¹ Dung i hudok ma tu si Josua, ‘Madung diida ho sandok na nibaen ni Tuhan Debatamu maradopkon si Sihon dohot si Og raja na dua i. Songon i muse ma baenonNia tu sandok raja na nirampasmunu tanona.

²² Ulang ho mabiar tu halahi, angke Tuhan Debatamu do na giot marporang di ho.’ ”

Anggo si Musa nada dipatola masuk tu Kanaan

²³ “Hupangidohon do di hatiha i tu Tuhan,

²⁴ ‘O Tuhan Na Gumincat, huboto do anggo na nipatuduhonMon tu au hum songon pamungkaan ni angka pambaenanMu na godang jana hahomangan do. Nada adong debata na asing di langit bope di tano on na margogo mambaen angka pangalaho na godang songon Ho.

²⁵ Patola ma au manaripari Batang aek Jordan ale Tuhan, laho mangaligi tano na napu na di bariba an, tano partoran na jeges dohot tano Libanon.’

²⁶ Tapi hara ni hamu ma umbaen muruk Tuhan tu au lopus nada ra Ia mangoloi pangidoanki. Mur didok Tuhan noma tu au, ‘Tuk ma i da Musa ulang pupu be manaringoti i!

²⁷ Kehe ma ho tu puncut ni Dolok Pisga jana tatap ma tu Utara dohot tu Selatan, tu Habincaran dohot tu Hasundutan. Tangkas ma parrohahon na niidami, angke anggo ho, indangkon na dohot be ho manaripari Batang aek Jordan.

²⁸ Lehen ma panogu-noguon tu si Josua. Pasobar rohania, angke ia do na giot mamimpin bangso i tu bariba laho mambuat tano na niidami.’

²⁹ Jadi gabe maringanan di rura na di bariba ni kota Bet-Peor ma hita.”